Beriktik belgisi – birlik

Astana qalasynda «Qazaqstan-2050» Strategııasy: beıbitshilik, rýhanııat jáne kelisim mádenıeti» atty taqyrypta Qazaqstan halqy Assambleıasynyń XXI   sessııasy bolyp ótti. Onyń jumysyn ashyp, sóz sóılegen Elbasy Nursultan Nazarbaev sessııanyń ózegi bolyp otyrǵan beıbitshilik, rýhanııat jáne kelisim mádenıeti týraly jan-jaqty baıandady. Biz Aqtóbe oblysy Qazaqstan halqy Assambleıasy ǵylymı-saraptamalyq ortalyǵynyń múshesi Pavel Maglelımen kezdesip,  sessııa týraly pikirin suraǵan bolatynbyz. – Sessııa jumysyn teledıdardan kórip, Elbasynyń sózin zer sala tyńdadym. Aıtary joq, bul sessııa da burynǵylaryndaı    óte iskerlik jaǵdaıda ótti. Biz elimizde tatýlyq pen dostyqtyń, bereke men birliktiń bastaýshysy da, qoldaýshysy da Prezıdentimiz Nursultan Nazarbaev ekenine taǵy bir kóz jetkizdik. Elbasy ózi qurǵan Qazaqstan halqy Assambleıasynyń jumysyn jandandyryp qana qoımaı, «Qazaqstan-2050» Strategııasyn júzege asyrýda úlken isterge uıytqy bolatynyna senim artýynyń ózi nege turady. Assambleıa ózin osy jyldarda eldegi saıası turaqtylyqtyń, konfessııaaralyq jáne ultara­­­­lyq kelisimniń kepili retinde tanytqanyn kózimiz kórip, kóńilimiz sezip otyr. Elbasy óz sóziniń basynda-aq: «Mádenıet – tirshiliktiń tiregi, ortaq ıgilik­terdi ulyqtap, ultty uly isterge uıystyrýdyń biregeı tetigi», dep atap ótti. Shynynda da, barlyǵy mádenıetten, mádenıettilikten arna tartady. Iаǵnı, adamdardyń bir-birine degen túsinistigine, ózara yntymaǵyna qaı ult bolmasyn mádenıetti bolǵanda ǵana qol jetkizedi. Mine, memleket quraýshy ult – qazaq halqynyń atadan balaǵa mıras bolyp kele jatqan ózara tatýlyqqa, úlkendi syılaýshylyqqa, joq-jitikterge qaıyrymdy bolýǵa, jalpy baýyrmaldyq qasıetterge negizdelgen mentalıteti men mádenıeti ózge ulttardy da ortaq múddege uıystyryp otyr desem, artyq aıtqandyq bolmas. Elimizdegi osyndaı birliktiń berekege bastap otyrǵanyn qurmetteýimiz kerek. Eń bastysy, «Biz halyqty ortaq patrıottyq tuǵyrnamada toptastyrýdyń birden-bir senimdi tetigin taptyq. Onyń máni árkimge de túsinikti jáne qarapaıym adamı suranystardy – jumysty, otbasyndaǵy ál-aýqatty, balalar úshin bilim berýdi, densaýlyqty, qaýipsizdik pen demalysty qamtamasyz etýge kómektesedi», deýiniń jany bar. Adamǵa budan artyq ne kerek. Al bul árbir sanaly adamnyń ómirlik ustanymy ekeni de sózsiz. Mine, sessııada sóılegenderdiń oı-pikirlerin osy arnada órbitýi de sondyqtan. Urpaq ósirip, baqýatty ómir súrý ár adamnyń armany. Bizdiń eldiń álemdegi damyǵan 30 eldiń qataryna enýge talaptanýynyń ózi bizde mundaı múmkindikterdiń bar ekenin áldeqashan dáleldep berdi. – Bizdiń basty baǵdarymyz «Qazaqstan -2050» Strategııasyn oıdaǵydaı júzege asyrý ekeni sózsiz. Elbasy bul baǵytta Assambleıanyń árqashan ýaqyt­pen birge qadam jasap kele jatqanyna toqtala kelip, strategııada bizdiń kópetnosty hal­qymyzdyń danalyǵy kórinis tapqanyna toqtaldy. Bizdiń basty maqsatymyz álemdegi damyǵan 30 eldiń qatarynan kóriný ekenin taǵy jadymyzda jańǵyrtty. Bul baǵytta bitimniń, rýhanı kelisimniń aıryqsha joǵary mádenıetiniń bes qaǵıdatynan arqaý tabatynyn jetkizdi. Elbasy XXI ǵasyrdyń bes myzǵymas shyndyǵyn da ashyp aıtty. Olar: turaqty ekonomıka, memlekettiń táýelsizdiginiń saqtalýy, etnos­aralyq qatynastyń turaq­tylyǵy, azamattyq teń quqylyq, ıntegrasııalyq damý. Prezıdent jetekshi ıadrolyq derjavalardyń ıadrolyq materıaldy fızıkalyq qorǵaý salasyndaǵy yntymaqtastyqty toqtatýy yqtımal degen aqparattyń alańdatatynyn da jasyrmady. Elbasy Assambleıa jumysynyń basty baǵyty jastarǵa patrıottyq tárbıe berý, fashızmdi talqandaýdaǵy Jeńistiń 70 jyldyǵy sheńberinde ótkiziletin sharalar ekenin alǵa tartty. Assambleıa jumysynyń tatýlyqtyń tuǵyryn bekitýge baǵyttalatynyn jetkizdi. Qashanda tyń ıdeıa, baǵaly bastamalarǵa jol ashatyn Nursultan Ábishulynyń 2015 jyldy Qazaqstan halqy Assam­bleıasynyń jyly dep jarııalaýǵa usynys bildirýiniń ózi birlik pen dostyqtyń, tatýlyq pen turaqtylyqtyń uıytqysy bolyp otyrǵan qoǵamdyq qurylymnyń eldiń qoǵamdyq-saıası, ekono­mıkalyq jáne áleýmettik ómirindegi róliniń zor ekenin kórsetse kerek. Assambleıanyń qurylǵanyna jáne referendýmda el Konstıtýsııasynyń qabyldanǵanyna 20 jyl tolýyna oraı atqarylatyn jumystardy anyqtap berdi. Elbasy Assambleıanyń óńir­degi qurylymdaryn kúsheıtýge kóńil bólýde. Assambleıa hat­shylyǵyna Atyraý, Batys Qazaqstan, Qaraǵandy, Qyzyl­orda, Mańǵystaý oblystarynda Dostyq úılerin salýdy baqylaýdy tapsyrýynyń ózi ulttar men ulystardyń tilin, mádenıetin, ádet-ǵurpyn damytýǵa qanshalyqty mańyz berilip otyrǵanynyń naqty kórinisi deý oryndy. Aqtóbe óńirinde 90-ǵa jýyq ulttardyń ókilderi bir ata­nyń balasyndaı tatý-tátti ómir súrýde. Oblys ortaly­ǵyn­daǵy Dostyq úıinde on segiz etno­mádenı birlestik ju­mys isteıdi. Al Elbasy N.Nazar­baev­tyń Qazaqstan halqy Assam­bleıasynyń XXI sessııa­synda sóı­legen sózi barsha qazaq­stan­dyqtardy burynǵydan góri de bir maqsat, bir múdde, bir bolashaq ıdeıasy tóńiregine toptastyryp, bıik mindetterdi júzege asyrýǵa jumyldyra túseri sózsiz.  Jazyp alǵan Satybaldy SÁÝIRBAI, «Egemen Qazaqstan». Aqtóbe oblysy.