Búginde memleket tarapynan densaýlyq saqtaý salasyna jetkilikti kóńil bólinýiniń nátıjesinde, elimizdegi dárigerler de árbir naýqastyń janyna jalaý bolyp, olardyń ómirin saqtap qalýǵa bar kúshin salýda. Aq halatty abzal jandardyń bul eńbegi óz jemisin berip te keledi. Bir aı buryn Taraz qalalyq kópbeıindi aýrýhanasynda bilikti mamandarmen donorlyq búırekti aýystyrý boıynsha joǵary tehnologııalyq operasııa jasalǵan bolatyn. Bul iske óńir dárigerleri belsene kirisip, bir adamnyń ómirin saqtap qaldy. Qalalyq kópbeıindi aýrýhanasynda alǵash ret jasalǵan operasııa sátti aıaqtalyp, 22 jastaǵy Uldaı Uzaqbaeva aýrýhanadan shyqty.
Uldaı talaı jyldan beri búırek jetkiliksizdiginiń aýyr túrimen aýyryp keledi. Tipti zaqymdanǵan eki búıregi isten shyqqan ol 2013 jyly dıalız apparatyna tańylǵan. Qarshadaı qyzdyń derti janyna batqan soń, olar otbasymen Qaraqalpaqstan elinen Taraz qalasyna kóship kelipti. Otbasynda Uldaıdyń ózinen basqa tórt baýyry bar eken. Ákesi de aýyr syrqattan baqılyq bolypty. Taǵdyr taýqymetine tap bolǵan boıjetkenniń anasynan basqa súıener eshkimi de qalmaǵan. Perzentiniń derti janyna batqan ana oblystyq densaýlyq saqtaý basqarmasynyń basshysy Áset Qalıevke ózi ótinishpen shyǵyp, otbasyndaǵy jaǵdaıdy jetkizedi. Bul jaǵdaıdan habardar bolǵan óńirdiń bas dárigeri jedel sheshim qabyldap, balasynyń jaǵdaıyna alańdaǵan ananyń tilegimen donorlyq transplantasııa baǵdarlamasyn 5 mamyr kúni bastap ketedi. Al bul bastamaǵa qýanyp, qyzynyń amandyǵyn tilegen Uldaıdyń 56 jastaǵy anasy donor bolýǵa kelisim beredi. Oblystyq densaýlyq saqtaý basqarmasynyń málimetinshe, búırekti transplanttaý boıynsha hırýrgııalyq operasııa sátti ótken. Nur-Sultan qalasynan kelgen transplantologtiń qatysýymen Taraz qalalyq kópbeıindi aýrýhanasynyń hırýrgteri men ýrologteri 5 saǵat ishinde jumysty oıdaǵydaı oryndap shyqqan. Búırekti almastyrý operasııasynan keıingi birinshi táýlikte aǵzada jınalǵan 4 lıtr zár syrtqa shyǵyp, boıjetken ózin jaqsy sezingen. Sonymen qatar taldaý saraptamalary da oń nátıje kórsetken. Naýqastyń jaǵdaıyn qalt jibermeı baqylyp otyrǵan jergilikti dárigerler úshinshi táýlikten keıin ony palataǵa aýystyrǵan.
Derti janyna batsa da tabandylyq kórsetken boıjetken ózine kómektesken jandardyń bárine alǵys aıtýda. «Operasııadan keıin esimdi jıǵanda, maǵan ekinshi ret ómir syılap, búıregin bergen anamdy eske aldym. Onyń jaǵdaıy nasharlap qala ma dep ýaıymdadym. Telefonmen sóılesip, daýysyn estigen soń ǵana kóńilim ornyna tústi. Qazir anamnyń da, meniń de jaǵdaıym jaqsy. Operasııadan keıin, onyń nátıjesin kórgende qýanǵanymnan jylap jiberdim. Onyń ústine on jyldan beri mazalaǵan aýrý ábden sharshatyp, tıtyqtatyp jibergen soń ómirden kúderimdi úzip te qoıǵan edim. Jambyl oblystyq densaýlyq saqtaý basqarmasynyń basshysy Áset Qalıevtiń bastamasymen dárigerler kelip, tez arada donorlyq is-shara bastalyp ketti. Jumys istemeıtin anamnan basqa eshkimimiz joq bizdiń barlyq shyǵynymyzdy ol ózi jeke qarajatynan tóledi. Shetelderde mundaı operasııalardyń óte qymbat turatynyn bilemin. Qazaqstanda da oǵan ońaılyqpen qol jetkizý múmkin emes. Anam ekeýmizdiń azamattarǵa rızashylyǵymyzda shek joq», deıdi Uldaı Uzaqbaeva.
Búginde dertinen aıyǵyp kele jatqan boıjetken bolashaqta mýzyka pániniń muǵalimi bolýdy armandaıdy. О́zi de dombyrany sheber shertetin bolyp shyqty. Qazaqtyń ónerine, áni men kúıine qurmeti bólek Uldaı qazir M.H.Dýlatı atyndaǵy Taraz óńirlik ýnıversıtetiniń stýdenti. Atalǵan joǵary oqý ornynda densaýlyq jaǵdaıyna baılanysty tegin bilim alýda. Al Uldaıdyń jaǵdaıyn baqylap otyrǵan dáriger Azamat Chýpeev aldaǵy ýaqytta anasy men qyzy turaqty túrde turǵylyqty mekenjaıy boıynsha emhanaǵa qaralyp turýǵa tıis ekenin aıtty. Olardyń jaǵdaıy edáýir jaqsarǵan soń ǵana dáriger aýrýhanadan shyǵaryp, em-sharalaryn úı jaǵdaıynda jasaýǵa ruqsat beretinin jetkizdi.
Talaı jannyń taǵdyryna arasha bolǵan Taraz qalalyq kópbeıindi aýrýhanasynyń quramynda búginde nefrologııa jáne gemodıalız bólimshesi jumys isteıdi. Munda bıyl búırek transplantasııasy boıynsha 2 maman biliktiligin arttyrǵan. Oblystyq densaýlyq saqtaý basqarmasynyń málimeti boıynsha óńirde búırek fýnksııasynyń sozylmaly jetkiliksizdigi bar 903 pasıent dınamıkalyq baqylaýda eken. Onyń ishinde búıregi aýystyrylǵan 64 adam jáne baǵdarlamalyq gemodıalızdegi 722 pasıent bar. Qazirgi kezde óńirde dárigerlerge senim artyp otyrǵan naýqastar az emes. Al Uldaı Uzaqbaeva úshin barsha Áýlıeata jurtshylyǵy qýanýda. Aldaǵy ýaqytta da talaı jannyń dertinen aıyǵyp, qalypty ómirge oralatynyna senim mol.
Jambyl oblysy
