Búkilálemdik serııa: Astana arlans - Baku Fires 3:2

ASTANA. 26 sáýir. Astanadaǵy «Saryarqa» velotreginde Astana arlans jáne Baku Fires komandalary arasynda Búkilálemdik boks serııasynyń birinshi jartylaı fınaldyq kezdesýi aıaqtaldy. Ol 3:2 esebimen alań ıeleriniń paıdasyna sheshildi. Bul týraly egemen.kz habarlady. Sharshy alańǵa birinshi bolyp 49 kılodaǵy Temirtas Júsipov – Hamza Nametov juby shyqty. Urys astanalyqtyń jeńisimen aıaqtaldy. Biraq budan keıingi eki jekpe-jekte de alań ıeleri ese jiberip qoıdy. Aldymen 56 kılodaǵy Mádı Sholaqov qarsylasy Gaırbek Germahanovtan utyldy. Sodan soń 64 kılolyq Ashat Ýálıhanov ta Gaıbatýlla Gadjıalıevten asa almady. Munyń esesine, sońǵy eki shaıqasta da astanalyqtardyń mereıi ústem shyqty. Muny 75 kılodaǵy legıoner Sergeı Derevıanchenko urys barysynda Soltan Mıgıtınovti nokaýtqa jiberý arqyly bastap berdi. Al sońynda 91 kılodaǵy Vasılıı Levıt áriptesi Abdýlkadyr Abdýllaevty (sýrette) utyp, komandasyna túpkilikti jeńis alyp berdi. Endi qarymta match mamyrdyń basynda Bakýde ótedi. Damır Qojamqul. Derekkóz: egemen.kz. Foto: VKontakte.