Jezqazǵandy damytýǵa jańa baǵyt

Bul óńir jaıly sóz qozǵala qalǵanda keleshegine alańdaýshylyq, alypqashpa áńgime aldan shyǵatyny bar. Ken qory azaıdy, óndiris aýqymy tarylyp barady, jumys tabý qıyndady delinedi. Belgisiz emes jaıt. Jezqazǵan mys qorytý zaýytynyń gıdrometallýrgııalyq tehnologııaǵa kóshýine baılanysty qýat arttyrýǵa toqtatylýy, Sátbaevtaǵy baıytý fabrıkasynyń qaıta jańǵyrtýǵa qoıylýy ónerkásip ónimin, ınvestısııa kórsetkishin tómendetkeni ras. Ras bolǵanda, negizgi tirek sanalatyn eki kásiporyn jumysyndaǵy ýaqytsha irkilis bul. Jaǵdaı múldem sondaı kúıde qalmaq emes. Aldaǵy jyldarda qaıta jandanys bitetin osynaý qos óndiris órleý ózegi bolǵaly tursa, Jezqazǵan, Sátbaev qa­la­laryn jáne Ulytaý aýdanyn ekonomıkalyq-áleýmettik damytýdyń 2012-2020 jyldarǵa arnalǵan keshendi josparyn júzege asyrý aımaq ómirine odan saıyn úlken jańǵyrý jasatady. Munymen birge, eki jaqtan tartylýdaǵy Jezqazǵan – Sekseýil, Shubarkól – Arqalyq temirjoly ózgeristerge bastap jatyr. Mine, qysqa qa­ıyryp aıtqanda, mysty ólke bolashaǵyna alańdaıtyn esh­teńe joqtyǵy osy jaılardan baıqalady emes pe. Al bul baǵyttaǵy ister oblystyń basty nazarynda ekenin kópshilik bilýge tıis. Elba­synyń tapsyrmasy boıynsha aımaqty damytý baǵdarlamasy naqtylanyp, qosymsha sharalarmen tolyqtyrylyp, tyńǵylyqty atqarylýyna talap kúsheıip otyr. Sondyqtan Jezqazǵanda jıi bolatyn oblys ákimi Baýyrjan Ábdishev kezekti saparynda jaǵ­daı­men taǵy bir tikeleı tanysyp, úlken mindetter qoıdy. Atap aıtqanda, mıneraldyq-shıkizattyq bazany keńeıtý, ındýstrııalyq-ınnovasııalyq da­mýdy qamtamasyz etý, kom­mýnaldyq jáne áleýmettik ın­fraqurylymdy jetildirý ba­ǵytyndaǵy 80 sharany qam­tıtyn atalǵan aýqymdy jos­parǵa bólingen 350 mlrd. teńge bir tıyny shashaý etilmeı ári belgilengen merzimderine sáıkes ıgerilýi qajet. О́ńirdiń óndiristik áleýetin kóterýge múmkindik beretin Jezdide marganes, Qııaqtyda qońyr kómir óndirý, Saryoba, Itaýyz, Jomart kenishterinen ken alý kólemin arttyrý, tehnogendik qaldyqtardy óńdeý, quramy baı jańa ken kózderin taýyp, ıgerý jolǵa qoıylady. Bul bir desek, sondaı-aq, Uly­taý aýdanynyń Qarsaqbaı, Baıqońyr, Kumkól tarabyn basyp ótetin jańa temirjol boıynda 5 stansa, 12 razezd boı kóteretindigi alystaǵy el ishine qýanyshty oqıǵa bolǵaly tur. Oń qubylystyń basy tamyryn jaıa bastady. Munymen birge, jańartylyp jatqan Jezqazǵan – Qyzylorda, Ulytaý – Arqalyq avtojoldary bólikteri de kúre joldardan burystaý aımaqtyń óńirlermen baılanysyn ke­ńeıtedi. Atalǵan keshendi jos­par aıasynda óndiris oryndaryn ashýǵa, shaǵyn jáne orta bıznesti qoldaýǵa, ekonomıkany ártaraptandyrýǵa arnalǵan is-sharalar óńirdiń tynysyna tyń serpin bere bastaǵany kúnnen-kúnge baıqalyp keledi. Jumysqa qamtylmaq 10 myń adamnyń aldy japandy dúbirletken eńbekke aralasty. Segiz jylǵa belgilengen baǵ­darlamanyń arqanyń keńge salynbaı, kezeń-kezeńimen tyn­dyrymdy atqarylýyna ta­lap bıikteı beretin bolady. Jaýapkershiliktiń ortaq eke­ni jıynda basa aıtylyp, kó­te­r­ilgen barlyq máseleler bo­ıyn­sha naqty tapsyrmalar berildi. Aıqyn NESIPBAI, «Egemen Qazaqstan». JEZQAZǴAN.