Banknottar senimsizdik týǵyzady

Aq telefon shyldyr ete qaldy. Tutqany kóter­gen­de arǵy jaǵynan jasy egdeleý tartqan er adamnyń daýy­sy estildi. – Maǵan «Egemen Qazaqstannyń» oblystaǵy tilshisi kerek edi, – dedi ol kisi. – Izdegen adamyńyz tyńdap tur, aıta berińiz, – dedim men. Men sizge Saraljyn aýylynan telefon soǵyp tur­myn. Aty-jónim – Beısenǵalı Jabasov. Zeınet­­­­­­ker­min. Mundaǵy ár shańyraq «Egemendi» jazdyryp aldyrady desem qatelespesim anyq. Basylymda «Ult­tyq bank habarlaıdy» degen úlken taqyryppen mate­rıaldar berilip turady ǵoı. Osy aıdar boıynsha bárimizdiń kóńilimizdi alańdatyp júrgen máselege qatysty túsiniktemeler men málimetter berýlerińizdi suraımyn. – Ol qandaı málimetter edi, Beısenǵalı aǵa? –dedim men telefon qońyraýynyń ıesine. – Máseleniń mánisi mynada. Biz tym shalǵaıda jatqan jurtpyz. Aıtaıyn degenim, sońǵy kezde qoldanystaǵy teńge banknottarynyń keıbiriniń aınalymnan shyǵyp qalǵandyǵy nemese taıaý arada shyǵatyndyǵy jóninde alyp-qashpa áńgimeler aýyl turǵyndary arasynda jıi estilip júr. Onyń qaısysy durys, qaısysy burys? Aq-qarasyn ajyratýdan qalyp baramyz. Mysaly, búginde aqsha aınalymynda 1000, 2000, 5000 jáne 10 000 teńgelik banknottardyń birneshe nusqa­daǵy túrleri qatar qoldanylyp júr. Ásirese, ártúrli dızaındaǵy, ártúrli pishin men kólemdegi 1000 teńgelik banknottar jóninde alyp-qashpa áńgimeler kóp. Taıaýda Kúltegin jazbasy beınelengen onyń jańa dızaındaǵy túri aınalysqa engizildi. Soǵan baılanysty osy banknottyń burynǵy túrleri endi qoldanylmaıdy eken degen sybystardy da estip qalyp júrmiz. Buǵan ne senerimizdi, ne senbesimizdi bilmeı dal boldyq. Sóıtip, mundaı banknottardy jumsaýdan nemese keri qolǵa qaıtaryp alýdan birtúrli seziktenip turatyn kúıge jettik. Sondyqtan da, álgi ózim aıtqanymdaı «Egemen Qazaqstan» betinde tıisti túsinikteme berýlerińizdi ótinemiz. Taǵy da qaıtalaǵym keledi. El gazeti «Egemende» «Ulttyq bank habarlaıdy, túsinikteme beredi» degen aıdar bar. Jaýapty soǵan salsa jetedi. Artyq eshteńeniń qajeti joq. Bizdi tolǵandyryp júrgen másele osy, dep aıaqtady sózin aýyl aqsaqaly. Álbette amanatqa qııanat jasaýǵa bolmaıdy. Osy oıdyń jetegimen joǵarydaǵy joldardy «Egemenge» joldaýdy jón kórdik. Mundaı kórinis tek Saraljyn aýylynda ǵana emes, ózge óńirlerde de kezdesip qalýy ábden múmkin emes pe? Temir QUSAIYN, «Egemen Qazaqstan». Batys Qazaqstan oblysy, Qaratóbe aýdany, Saraljyn aýyly.