Tańdaý talaby joǵary

Qazaqstan Prezıdenti janyndaǵy Ortalyq kommýnıkasııalar qyzmetinde ótken keshegi brıfıngte Memlekettik qyzmet isteri agenttiginiń tóraǵasy Álıhan Baımenov memlekettik qyzmettiń jańa modeliniń negizgi aspektileri men «A» korpýsyna irikteýdiń aralyq qorytyndylary týraly jan-jaqty aıtyp berdi. Agenttik tóraǵasynyń málimetinshe, qazirgi tańda Qazaqstanda 97 myń memlekettik qyzmetshi bolsa, sonyń 54 myńy aýdan jáne aýyldyq deńgeıde jumys jasaıdy. Sońǵylarynyń 33 myńy aýdan ákimine baǵynyshty bolsa, al qalǵany ortalyq organdardyń aýdandyq bólimshelerinde óz qyzmetterin atqaryp keledi. Sol aýdan nemese aýyldyq jerde júrgen memlekettik qyzmetshilerdiń 5 myńy «kadr qyzmetin» qosa atqarsa, al 2013 jyldyń naýryzynan bastap jalpy sany 500 adamnan turatyn 191 personaldy basqarýdyń biryńǵaı qyzmeti qurylyp, olarǵa kásibı deńgeıde kadr saıasatyn júrgizý júktelip otyr. Budan basqa, jergilikti jerlerde konkýrstyq komıssııa, attestasııalyq komıssııa jáne tártiptik komıssııa jumys istep kelse, byltyrdan bastap aýdan, oblys ákimderine aýdandyq jáne oblystyq deńgeıde Biryńǵaı konkýrstyq komıssııa qurý múmkindigi zań júzinde berilgen eken. Sonymen qatar, biryńǵaı kadr máselesin sheshý múmkindigi de nazardan tys qalmaǵan. Agenttik tóraǵasy endi personalmen jumys isteıtin 500 adamnyń sheshim qabyldaýdaǵy róli artady jáne sol bólimdegi azamattardy júıeli oqytýǵa múmkindik týyp otyr degendi basa aıtyp ketti. Onyń sózinshe, buryn formaldi ótkizilip kelgen aýdandyq jáne oblystyq konkýrstar ortalyqtandyrylǵannan keıin olar jańasha sıpat alǵan. Buǵan deıin kózge túspeı júrgen, elenbeı kelgen aýyl azamattary, tipti, aýdan men oblystyq deńgeıge de laıyqty dep baǵalanypty. Endeshe, «áleýmettik lıft» jumysyn jańasha bas­tapty. Ári qaraı bul mamandardyń jumy­syn ońtaılandyrý úshin kelesi jyly «e-qyzmet» júıesi iske qosylatyn bolady. Onyń jumys isteýimen kúndelikti sharýa­lar elektrondyq formatqa aýystyrylyp, qyzmetkerlerdiń qoly bosaıdy. Bul olar­dyń shyǵarmashylyq izdenisine negizde­letin jumysyna kóp mán berilerin bildiredi. Personaldy baǵalap irikteýde sheshýshi ról atqaratyn tetik – testileý. Byltyrdan beri kez kelgen azamat ortalyqtarda testileýden ótip, sertıfıkat ala alatyn. Bıyl test tapsyrýshylar «e-gov» saıtyna kirip, elektrondyq bılet alatyn sekildi óz ýaqyty men otyratyn jerin tańdaı alady. 2012 jyly aı saıyn testten 2300 adam ótetin bolsa, byltyr bul kórsetkish 4700 adamǵa jetken eken. Test qorytyndysyna tystan áser etýdi shektep, qaýipsizdik máselesi kúsheıtilipti. On ball alatyndardyń sany 66 paıyzdan 44 paıyzǵa deıin tómendegen. Qoǵamda testileýdi «barmaq basty, kóz qysty» emes, tek bilimi arqyly alýǵa degen senim kúsheıip kele jatyr, degen Á.Baımenov memlekettik organdar úshin konkýrs ótkizý rásimderi úsh esege jýyq azaıǵandyǵyn da ortaǵa sala ketti. Búgingi tańda elimiz boıynsha 25 myń adamnyń qolynda testileýden ótkeni týraly sertıfıkat bar kórinedi. 2015 jyldan bastap memlekettik qyzmetshilerden bilýdi talap etetin zańdar sanyn kezeń-kezeńimen qysqartyp, atalǵan testterdi «A» korpýsyna irikteýdiń basty quraly retinde aıqyndaýǵa múmkindik berý kózdelipti. Irikteýdiń osyndaı tásilin «B» korpýsy úshin de qoldaný kózdelýde eken. «Memlekettik qyzmet týraly» Zańǵa engizilgen túzetýlerge sáıkes komandalyq aýys-túıister kúrt azaıǵan. Konkýrspen iriktep taǵaıyndaýlardyń úlesi 2012 jyly 3,5 esege ósken. Bul konkýrstyq taǵaıyndaýdyń 28-den 82 paıyzǵa deıin artqandyǵyn kórsetedi. Memlekettik organdar arasyndaǵy aýysý tártibimen taǵaıyndaýlardyń úlesi 20 esege qysqarypty (60 paıyzdan 3 paıyzǵa deıin). Agenttik tóraǵasy, sonymen birge, «A» korpýsyna irikteýdiń aralyq qorytyndylary týraly da aıta ketti. Onyń aıtýynsha, «A» korpýsynyń kadr rezervinde 400 adam bolsa, olardyń ishinde jaýapty hatshylar men apparat basshylary laýazymdaryna – 79 adam, al qalalar men aýdandar ákimderi, komıtet tóraǵalary laýazymdaryna 296 adam úmitker retinde tirkeýde tur eken. Naqty irikteý úshin qujattar qabyldaý ústimizdegi jyldyń 13-28 naýryzy aralyǵynda júrgizilgendigin de aıta ketý kerek. 873 kandıdatty irikteý sheńberinde barlyǵy 1029 ótinish berilse, bul – bir orynǵa konkýrs 10,3 adamdy quraǵan degen sóz. «О́tken jylmen salystyrǵanda (bir orynǵa 2,4 adam) konkýrs 4 esege ósti, bul azamattar tarapynan «A» korpýsynyń kadr rezervine irikteý prosesine degen joǵary senimdilikti bildiredi», dedi Álıhan Muhamedııauly. Onyń málimdeýinshe, testke jiberilgen 792 kandıdattyń ishinen 381-i (51 paıyzy) testileýdiń shekti mánin eńsere almaǵan. Sóziniń sońynda agenttik tóraǵasy VII Astana ekonomıkalyq forýmy aıasynda tanymal halyqaralyq sarapshylardyń qatysýymen úshinshi ret «Memlekettik qyzmet personalyn basqarý: jaǵdaıy men perspektıvalary» degen taqyrypta jahandyq konferensııanyń ótetininen de habardar ete ketti. Asqar TURAPBAIULY, «Egemen Qazaqstan».