Parlament

Senatorlar saılaýshylar ortasynda

Elbasy bastamalary men eldik mindetterdi túsindirip júr Parlament Senatynyń depýtattary Hýsaın Valıev, Anatolıı Bashmakov jáne Jeńis Nurǵalıev Qostanaıda «G-Global» ıdeıasyn qoldaý jónindegi jurtshylyqtyń jınalysyna qatysty, dep habarlady Senattyń baspasóz qyzmeti. Sharaǵa máslıhat depýtattary, memlekettik mekemeler men ulttyq etnomádenı birlestikterdiń bas­shylary, ardagerler uıymda­ry­nyń, kásipodaqtardyń, úkimet­tik emes uıymdardyń jáne oqý oryndarynyń ókilderi keldi. Parlament Senatynyń depýtaty, Qazaqstan halqy Assambleıasy Tóraǵasynyń orynbasary Ana­tolıı Bashmakov Memleket basshysy N.Nazarbaevtyń bastamasy týraly aıta kelip, «jahandyq qu­rylymdy qalyptastyrýda eko­nomıkalyq, saıası jáne ekolo­gııalyq faktorlarmen ǵana shektelýge bolmaıdy. Endi mádenı kóz­qarastardy da nazarǵa alatyn ýaqyt keldi», – dep atap ótti. Senatorlar aqparattyq-kom­mýnıkasııalyq alańdar  memleketter men úkimettik emes uıymdar arasyndaǵy únqatysý úshin jańa múmkindikter ashatynyn aıta kelip, sharaǵa qatysýshylardy «G-Global» kommýnıkasııa alań­dary­nyń jumysyna qatysýǵa sha­qyrdy. «G-Global» bastamasy – bul tek aǵa jáne orta býyn urpaq­tarynyń isi emes. Bul basta­ma­ny qoldaýǵa jáne ony iske asyrýǵa jas urpaq ta aralasýy tıis. Jarqyn bolashaqqa jetý úshin qa­lyń kópshilik osy ıdeıamen ómir súrýi tıis»,  dedi senator H.Valıev. Sharaǵa qatysýshylar «ja­handyq sáýlettiń jańa qaǵı­da­laryn ilgeriletý ıdeıasyna» qoldaý bildirip, G-Global-dy qoldaý koalısııasyn qurdy. Sondaı-aq, senatorlar M.Dý­latov atyndaǵy Qostanaı ınje­nerlik-ekonomıkalyq ýnı­ver­sıtetinde bolyp, Qazaqstan halqy As­sambleıasy kafedrasynyń ashylýyna qatysty. *** Parlament Senatynyń depýtaty Jumabek Tóregeldınov jáne Lıýdmıla Poltorabatko Almaty qalasyndaǵy Bostandyq jáne Túrksib aýdandarynyń turǵyndarymen kezdesti. Kezdesý barysynda Memleket basshysynyń «Qazaqstan joly – 2050: bir maqsat, bir múdde, bir bolashaq» halyqqa Joldaýyndaǵy, Joldaýdy iske asyrý jónindegi jalpyulttyq sharalar josparynda alǵa qoıylǵan mindetterdi, sondaı-aq, Qazaqstannyń  álemdegi eń damyǵan 30 eldiń qataryna kirý tujyrymdamasyn talqylady. Qazaqstan Prezıdentiniń el halqyna Joldaýyndaǵy erejelerdi jan-jaqty talqylaýdan keıin Parlamenttiń zań shyǵarý qyzmeti týraly pikir almasyldy. Atap aıtqanda, «Ruqsattar jáne habarlamalar  týraly» jáne «Qazaqstan Respýblıkasynyń keıbir zań­namalyq aktilerine ruqsat berý júıesi máseleleri boıynsha ózgerister men tolyqtyrýlar engizý týraly» zańdarynda kózdelgen máseleler belsendi túrde talqyǵa salyndy. Depýtattar qujattyń negizgi maqsaty men mindetteri týraly túsinikteme berdi. Memleket basshysynyń tapsyrmasy boıynsha zań Qazaqstannyń ruqsat berý júıesiniń birqatar máselelerin sheshýge baǵyttalǵany atap ótildi. Kezdesý barysynda qoǵamdaǵy áleýmettik álsiz toptardy (zeı­net­kerlerdi, kópbalaly otbasy­lardy, múgedekterdi) qorǵaý ul­ǵaıa túskeni, sondaı-aq, halyqty áleýmettik qorǵaý salasyndaǵy zańnamany odan ári reformalaý jáne jetildirý jaıynda pikir almasyldy. *** Parlament Senatynyń depýtattary Ikram Adyrbekov, Lázzat Qıynov jáne Orynbaı Rahmanberdıevtiń Ońtústik Qazaqstan oblysyna sapary jalǵasýda. Sena­torlar Túrkistan qalasynda Q.A.Iаsaýı atyndaǵy Ha­lyq­aralyq qazaq-túrik ýnıversıtetiniń stýdentterimen jáne professorlyq-oqytýshylar quramymen kezdesti. Stýdentter aldynda sóz alǵan depýtat I.Adyrbekov Memleket basshysynyń «Qazaqstan-2050» Strategııasyn túsindire kelip, mańyzdy qujatta elimizdiń syrtqy jáne qorǵanys saıasatyn jańǵyrtýdy kózdeıtin sharalar da qamtylǵanyna toqtaldy. Atap aıtqanda, ol jahandyq básekelestik jáne aımaqtyq yq­pal­dastyq jaǵdaıyndaǵy ıntel­lektýaldyq áleýetti damytýdyń mańyzdylyǵyn atap ótti. Depýtat L.Qıynov ener­ge­tıkalyq qaýipsizdik jáne Qazaq­stannyń munaı jáne gaz salasyn damytý máselelerine toqtaldy. Kezdesý barysynda stýdentter Memleket basshysynyń saıasatyna qoldaý bildire otyryp, «Qazaqstan – 2050» uzaq merzimdi Strategııa­syn iske asyrýǵa óz úlesterin qosýǵa nıetterin jetkizdi, sondaı-aq, ózderin qyzyqtyrǵan saýaldarǵa jaýap aldy. Odan basqa, I.Adyrbekov pen L.Qıynov Túrkistan qalasynda Ońtústik Qazaqstan oblysynyń ákimi A.Myrzahmetov jáne basqa óńir­lerdiń ókilderi qatysqan «Yrys aldy – yntymaq» forý­my­nyń saltanatty ashylýyna qatysty. *** Parlament Senatynyń depýtaty Qýanysh Aıtahanov jumys babyndaǵy saparmen Ońtústik Qazaqstan oblysynda boldy. Sapar barysynda depýtat oblystyń ekonomıka, áleýmettik jáne mádenı salalaryndaǵy istiń jaǵdaıymen tanysyp, jurtshy­lyqpen, máslıhat depýtattarymen jáne kásipkerlermen kezdesti. Senator, sondaı-aq, ob­lys­taǵy shaǵyn jáne orta bıznestiń birqatar  kásiporyndaryn aralap, eńbek ujymdarymen kezdesti jáne kásiporyndardyń teh­nologııalyq úderisterimen tanysty. Q.Aıtahanov odan basqa Túr­kistan qalasynda ótken «Yrys aldy – yntymaq» shara­syna qaty­syp, Qazaqstan halqynyń dostyǵy men tutastyǵy jaıynda baıandama jasady. Shymkent qalasynda azamattardy qabyldady. *** Parlament Senatynyń depýtattary Birǵanym Áıtimova men Svetlana Jalmaǵambetova Aqmola oblysyndaǵy Bulandy aýdanynda besinshi shaqyrylǵan máslıhattyń kezekti sessııasyna qatysty. Sessııa jumysyna aýdan ákimi M.Balpan, Aqmola oblysy boıynsha tekserý komıssııasynyń mú­shesi R.Kárimov, aýyldyq okrýg­terdiń ákimderi, aýdandyq qury­lym­dardyń jetekshileri qatysty. Senatorlarǵa 2013 jylǵy aýdan­dyq bıýdjettiń oryndalýy týraly baıandaldy jáne 2011-2020 jyldarǵa arnalǵan mem­le­kettik bilim berý baǵdar­lamasynyń Bulandy aýdany boıyn­sha júzege asyrylý barysymen tanystyryldy. Bilim berý salasyndaǵy jańarýlar, ana­lardy qorǵaý, memlekettik áleý­mettik saıasatyndaǵy jańalyqtar máseleleri boıynsha aýdandyq depýtattar aldynda senatorlar S.Jalmaǵambetova men B.Áıtimova sóz sóıledi. Sondaı-aq, senatorlar Bulandy aýdanyndaǵy eki áleýmettik mańyzdy nysanda – qarttarǵa arnalǵan dárigerlik-áleýmettik mekemede jáne «Baldyrǵan» balalar baqshasy-mektebinde boldy. Depýtattar mekemeniń jaǵdaıy men materıaldyq-tehnıkalyq bazasymen tanysty. Depýtattar, sondaı-aq, Aqkól qalasyndaǵy «Respýblıkalyq ǵaryshpen baılanys ortalyǵy» aksıonerlik qoǵamynda boldy jáne Aqkól aýdandyq máslı­ha­ty­nyń kezekten tys sessııasyna qatysty. Senator S.Jalmaǵambetova odan basqa Ereımentaý aýdandyq máslıhatynyń kezekten tys 25-sessııasyna qatysyp, psıhologııalyq-pedagogıkalyq túzetý kabınetiniń jumysymen tanysty.