Qazaq dalasyn qobyzdyń muńdy únimen terbegen óner ıesi paıdalanǵan aspaptyń túpnusqasy búginde oblystyq tarıhı-ólketaný mýzeıinde saqtaýly tur. «Qobyzshy, áıgili kúıshi-kompozıtor Yqylas Dúkenulynyń ózi jasap, kúı shertip, paıdalanǵan mýzykalyq aspaby búginde bizdiń mýzeıdiń qundy jádigeri sanalady.
Atalǵan qobyzdy Yqylastyń urpaqtary 1916 jyldan búgingi kúnge deıin qasterlep, otbasynyń kıeli murasy retinde saqtap kelgen. Olar keltirgen derekke sensek, Yqylas Dúkenuly qobyzyn osydan 140 jyldan astam ýaqyt buryn jasaǵan eken. Qorqyt pen Qoılybaıdan keıin qazaq dalasyn sazben terbegen áıgili qobyzshy Yqylas ekeni málim. Yqylas Dúkenulynyń shóbere kelini Altyn Aqynbaeva mýzeı qoryna 2008 jyly ótkizgen jádigerdiń biz úshin orny bólek», deıdi oblystyq tarıhı-ólketaný mýzeıi dırektorynyń orynbasary Zarına Dúkenbaeva.
Onyń aıtýynsha, mýzeıge kelgen jurtshylyq Yqylastyń qobyzyna aıryqsha nazar aýdarady eken. Tipti qolyna ustap sýretke túskisi keletinder de az emes.
Jambyl oblysy
