Vatıkannyń qupııa muraǵattarynan Qazaqstanǵa qatysty málimetter tabyldy

ALMATY. 5 mamyr. Kolýmbııa ýnıversıtetiniń tarıhshysy, kópten beri ál-Farabı atyndaǵy Qazaq ulttyq ýnıversıtetimen birlesip jumys istep kele jatqan Rafıs Abazov Vatıkannyń qupııa muraǵattarynan Qazaqstannyń belgisiz kartalaryn tapty. Bul týraly Today.kz habarlady. «Rım jáne Alash: mádenı mura» ǵylymı jobasy aıasynda muraǵattardy zertteýge shaqyrylǵan Rafıs Abazov T.Júrgenov atyndaǵy Qazaq ulttyq óner akademııasynyń rektory Andreı Hazbolatov pen «Italııa» bilim berý ortalyǵynyń dırektory, ıtalıan tili oqytýshysy Karmıne Barbaromen birlese jumys istegen. Atalǵan ǵalymdar Reseı ımperııasynyń Eýrazııa kóshpeli taıpalarymen, sonyń ishinde qazaqtarmen ózara baılanysyna qatysty dálelder tabýǵa úmittenedi. Qupııa muraǵattardy zertteý kezinde elimizdiń aýmaǵyna qatysty kartalar tabyldy. Rafıs Abazov: «Menińshe, bul derekter Qazaq memlekettiliginiń naqty genezısi men damý dınamıkasyn túsinýge kómektesedi. Qazirgi qazaq memlekettiligi XVI-XVII ǵasyrlarda paıda boldy dep sanalady jáne tarıhshylarda sol kezdegi qazaq taıpalarynyń syrtqy álemmen baılanysy jaıly málimet az. Sonymen birge, ǵalymdar bizdiń eldiń Qytaı jáne Reseımen qarym-qatynasyna erekshe nazar aýdarady. Alaıda, bul kartalar qazaq halqy bıleýshileriniń syrtqy álemmen baılanysty keńinen ornatqanyn, Ońtústik Azııa, tipti, Batys Eýropaǵa deıin qarym-qatynas jasaǵanyn aıǵaqtaıdy», – dedi. Tabylǵan kartalar shamamen XVI-XVII ǵasyrlarǵa tıesili kórinedi. Sonymen birge, ǵalym Rım papasynyń tatar-mońǵol hanyna jazǵan hattaryn keziktirdi. Rafıs Abazovtyń aıtýynsha,  Vatıkannyń qupııa muraǵattaryna kirýge ruqsat alý ońaı emes. Ol oǵan kirý úshin 1 jyl kútken. Joldybaı Bazar. Derekkóz: Today.kz. Foto: mygazeta.com.