ALMATY. 5 mamyr. Almaty qalasy Almaly aýdandyq soty dúısenbi kúni burynǵy sýdıa Kúlpash О́temisovany (sýrette) 4,5 jylǵa bas bostandyǵyn aıyryp, jalpy rejimdegi kolonııada otyrý jazasyna kesti. Bul týraly «Qazaqstan jańalyqtary» habarlady.
Sot oǵan sońy aýyr zardaptarǵa aparyp soqtyratyn zańsyz sot aktisine jol berdi degen aıyp taqty. Buǵan qosa, burynǵy sýdıa úsh jylǵa deıin memlekettik qyzmet atqarý quqyǵynan aıryldy.
2013 jylǵy naýryz aıynyń sońynda Almatynyń arnaıy aýdanaralyq sotynyń úkimimen reseılik belgili bıznesmen, «Silicium Kazakhstan» JShS-nyń burynǵy bas dırektory Aleksandr Sýtıagınskıı kisi jaldap adamdy óltirýdi uıymdastyrǵany jáne oqty qarý men oq-dári saqtaǵany úshin 12 jylǵa sottaldy. Alaıda, Almaty qalasy apellıasııalyq sot alqasynyń sýdıasy О́temisovanyń 2013 jylǵy 12 tamyzdaǵy qaýlysymen bul áreket «kisi óltirýdi daıyndaýdy uıymdastyrý» bolyp ózgertilip, Sýtıagınskııdiń jazasy 6 jylǵa shartty túrde bas bostandyǵynan aıyrylý bolyp ózgertildi. Al oqty qarý men oq-dárini zańsyz saqtady degen aıyp dálel jetispedi degen jeleýmen alynyp tastaldy.
Sodan keıin Almaty qalasynyń kassasııalyq sot alqasy О́temisovanyń qaýlysyn buzyp, 2013 jylǵy 28 naýryzdaǵy sot úkimin ózgerissiz qaldyrdy, sondaı-aq О́temisovanyń ózine qatysty qaýly shyǵardy. Alqa sýdıanyń qylmystyq zań normalaryn durys qoldanbaı, jınaqtalǵan dáleldemelerdi durys baǵalamaý kórinis tapqan úkim shyǵarý arqyly zańnamasy qasaqana buzyp, óreskel kemshilikke jol bergenin atap kórsetti. Sýdıa О́temisova qabyldaǵan zańsyz sheshimniń nátıjesinde Sýtıagınskıı qylmystyq jaýapkershilikten qutylyp ketti. Qazir onyń júrgen jeri belgisiz. Qylmyskerge izdeý jarııalandy.
Qazaqstannyń bas prokýrory 2013 jylǵy qyrkúıekte sońy aýyr zardaptarǵa aparyp soqtyrǵan zańsyz sot aktisin shyǵarǵan sýdıaǵa qatysty Qylmystyq kodekstiń 350-babyna sáıkes qylmystyq is qozǵady. Prokýratýranyń málimeti boıynsha, ol 6 qyrkúıekte ýaqytsha ustaý oqshaýlaǵyshyna qamalǵan.
Qurysh Nurymbet.
Derekkóz: «Qazaqstan jańalyqtary».
Foto: rus.azattyq.org.
