Baýyrjan Momyshuly týraly serıaldy «Habar» telearnasy syǵymdap, tolyqmetrajdy kórkem fılm retinde usyndy.
Mereke kúnderi úlken ekranǵa prokatqa shyǵatyn «Baýyrjan Momyshuly» telehıkaıasy tulǵaly batyr taǵdyrynyń taǵylymdy tustaryn qamtıdy.
Sonymen, jańa joba Almaty men Astana qalalarynda mamyrdyń 5-6 kúnderi Uly Jeńistiń 69 jyldyǵyna oraı, ekinshi dúnıejúzilik soǵys pen tyl ardagerlerine, áskerı ýchılıshelerdiń kýrsanttaryna usynylmaq. Qysqasy, ótken jyldyń jeltoqsanynda tusaýyn kesken attas telehıkaıa kıno nusqasyna aýystyrylyp, kınoteatrlarda kórsetilý úshin DCP formatyna kóshirilgen.
Kórkem fılmde Baýyrjan Momyshulynyń general Panfılovpen tanysyp, ony batalon komandıri etip taǵaıyndaýyna deıin jáne onyń jaýyngerleriniń Germanııa fashıstik áskerine qarsy Máskeý mańyndaǵy Matrenıno derevnıasynyń janynda Volokolam tas jolyndaǵy shaıqasyn qamtıtyn erlik joly túgel kórsetiledi. Fılmniń sıýjetine Aleksandr Bektiń «Volokolam tas joly» povesi arqaý bolǵan.
Jobanyń avtorlary aty ańyzǵa aınalǵan qazaqtyń – Keńes Odaǵynyń Batyry Baýyrjan Momyshulynyń beınesin barynsha shynaıy jasaý ońaıǵa túspegendigin aıtady. Telehıkaıa Baýkeń urpaqtarynyń ruqsatymen, batyrdyń kózin kórgenderdiń keńesimen túsirilgen.
Basty róldi oryndaǵan M.Áýezov atyndaǵy Qazaq memlekettik akademııalyq drama teatrynyń beldi akteri Erkebulan Daıyrov kórkem fılmniń tusaýkeserinde zaldy toltyrǵan aq samaıly kórermenge búkil shyǵarmashylyq toptyń atynan rııasyz alǵysyn bildirip, taǵzym etti.
Atalmysh fılmge túsken akterlerdiń kóbi rejısser Aqan Sataevpen birge jasaǵan burynǵy kartınalardan tanys ekendigin aıta ketý kerek. Ssenarıı avtory – Temir Jaqsylyqov bolsa, operatory – Hasan Qydyrálıev.
Tarıhı fılmniń teń jartysy Almaty oblysynyń Talǵar óńirinde, keıbir jerleri Mınsk qalasyndaǵy «Belarýsfılm» kınostýdııasynyń pavılonynda túsirilgen.
Aınash ESALI,
«Egemen Qazaqstan».
ALMATY.
