Uly Jeńistiń 70 jyldyǵy qarsańynda «Nur Otan» partııasy «Ardagerlerdi ardaqtaıyq» jobasyn júzege asyrýda. Sonyń aıasynda keshe Astanada eki márte Keńes Odaǵynyń Batyry Talǵat Bıgeldınov týraly «Podnıatsıa v vozdýh» fılminiń tusaýkeser rásimi bolyp ótti.
Batyrlyq ǵumyrbaıan týraly bir jyldaı túsirilgen kınotýyndyny kórýge T.Bıgeldınovtiń ózi densaýlyǵyna baılanysty Almatydan ushyp kele almapty. Al atalǵan fılmdi elordadaǵy Uly Otan soǵysynyń ardagerleri, «Nur Otan» partııasy «Jas Otan» jastar qanaty men «Jas Ulan» respýblıkalyq balalar uıymynyń ókilderi jáne basqalar tamashalaýǵa múmkindik aldy. Endi bul fılm kórermender nazaryna 9 mamyr kúni saǵat 13:10-da «Astana» jáne 17:15-te «Habar» telearnalary arqyly usynylmaqshy.
Sóz reti kelgende fılmniń ssenarııin Mádenıet qaıratkeri Lavrentıı Son jazǵandyǵyn aıta ketý kerek. Al qoıýshy rejısseri Ergen Toqmyrzın bolsa, Talǵattyń jastyq shaǵyn jas akter Ázimhan Ahmet somdapty. 305 ret áskerı tapsyrmamen áýege kóterilgen eki márte Keńes Odaǵynyń Batyry, avıasııa general-maıory Talǵat Bıgeldınov týraly derekti fılmniń jelisine ushqysh-shabýyldaýshynyń 1966 jyly qalamynan týǵan «Ily atakýıýt» kitabyndaǵy estelikter arqaý bolypty.
Endi tarıhı derekti fılm týraly qysqasha aıta ketsek, onda Uly Otan soǵysy jyldary el qorǵaýǵa shaqyrylǵan 19 jastaǵy jigit taǵdyry baıandalady.
Onyń soǵys jyldaryndaǵy taǵdyry eshkimdi beıjaı qaldyrmady. Fashıster «Ushqysh tank» dep atap ketken T.Bıgeldınov óziniń Il-2 ushaǵymen alǵashqylardyń biri bolyp Kavkaz ben Ýkraınany azat etkeni belgili. Fılm avtorlary kompıýterlik keskindeýdiń qazirgi ádisterin paıdalana otyryp, «qazaq qyranynyń» áýe shaıqastaryn sheber ushtap, jaý qorshaýyn buzyp shyǵý kórinisterin beınelepti.
Soǵysqa qatysqan generaldar týraly arnaıy fılm túsirý ıdeıasy «Generaldar keńesi» respýblıkalyq birlestigi tarapynan usynylsa, onyń túsirilimi «Nur Otan» partııasy men «Altyn Qyran» qaıyrymdylyq qorynyń qoldaýymen júzege asyrylǵan. Fılmdi kórseter aldynda «Nur Otan» partııasy Tóraǵasynyń birinshi orynbasary Baýyrjan Baıbek, «Generaldar keńesi» respýblıkalyq birlestiginiń tóraǵasy, ádilet general-maıory Rústem Qaıdarov jáne «Altyn Qyran» korporatıvtik qaıyrymdylyq qorynyń prezıdenti Islambek Saljanov quttyqtaý sóz sóıledi.
B.Baıbek Uly Jeńis qarsańynda soǵys ardagerlerimen júzdesý úlken mártebe ári jastar úshin tárbıesi mol shara ekenin erekshe atap ketti. Arada 70 jyl ótse de aǵa býynnyń erlikteri jastar sanasynda árdaıym saqtalmaq. Bul rette «Nur Otan» partııasy ústimizdegi jyly «Ardagerlerdi ardaqtaıyq» degen jobany bastap otyr. Elbasynyń sarabdal saıasatynyń arqasynda elimizde beıbitshilik, turaqtylyq pen kelisim saltanat qurǵan. «Elbasy Nursultan Nazarbaev Qazaqstan halqy Assambleıasynyń sessııasynda «Biz Uly Otan soǵysyna qatysqan barlyq qazaqstandyq batyrlardyń aty-jónderin bilip, olardy qurmetteýge mindettimiz», deı kele, ardagerler erligin urpaq jadynda saqtaýdyń mańyzyn aıryqsha atap ótti», dedi Baýyrjan Qydyrǵalıuly.
Al ádilet general-maıory Rústem Qaıdarov 2012 jyldan beri Keńes Odaǵynyń Batyry, Halyq Qaharmany jáne Qazaqstannyń tuńǵysh Qorǵanys mınıstri Saǵadat Nurmaǵambetov pen KSRO ishki ister organdarynyń qurmetti qyzmetkeri, soǵys jyldarynda kontr-barlaýshy bolǵan general-maıor Ábdiqadyr Bolsambekov týraly fılmderdiń túsirilgenin erekshe maqtanyshpen jetkizdi. Bul – soǵys ardagerleri jaıly úshinshi fılm. Erlik eshqashan umytylmaıtyndyǵyn tilge tıek etken Islambek Saljanov onyń jastar úshin tárbıelik máni zor ekenin jetkizdi.
Asqar TURAPBAIULY,
«Egemen Qazaqstan».
