Dalada dúbir bastaldy

Dıqannyń beli búgildi. Soqa arbaǵa jegildi. Alǵashqy dán egildi. Alqapqa tuqym sebildi. Tamshylap ter tógildi. Qyzý jumys, tynymsyz tirlik kórindi. Bilek sybanyp kiristi, almaqqa mol jıyn-terindi. Sonymen, Qyzylorda oblysynyń dıqandary kúrish egýdi bastady. Bıyl 76,6 myń gektar jerge Syr salysyn egý josparlanǵan. Qazirgi tańda sonyń 3 myń gektarǵa jýyǵy egildi. Oblys ákimi Qyrymbek Kósherbaev Syrdarııa aýdanyna baryp, «Shaǵan jer» seriktestiginiń egis alqabynda tuqym sebý jumystaryn kórdi. Jalpy, aýyl sharýashylyǵy salasynyń máseleleri de osy jerde talqylandy. Aımaq basshysy qara jerden nesibesin kútetin sharýalarmen júzdesip, kóktemgi dala jumystaryna qatysty sharalardy talqylady. Bıyl oblys boıynsha 160,4 myń gektarǵa egis egý mejelenip otyr. Osy jyldyń egisine dıqandar byltyr kúzden daıyndyq jumystaryn bastaǵan-dy. Kúrish egisine 20,2 myń tonna tuqym daıyndaldy. Qoldaǵy tuqymnyń barlyǵy tekserýden ótkizildi. Sharýalar qajetti mıneraldy tyńaıtqyshtarmen tolyq qamtylǵan. Qazirgi tańda sý joldaryn tazalaý, gıdrotehnıkalyq qurylystardy jóndeý jáne jerdi sińire sýarý men jaıylymdyq jerlerdi sýarý jumystary aıaqtaldy. Sharýalardyń sýǵa qaryz máselesi de sóz boldy. – Bul másele bizdiń na­za­ry­myzda. Degenmen, qaryzy bar dep sharýashylyqtardy sýsyz qaldyrýǵa bolmaıdy. Al bereshekterin birlese sheshetin bolamyz,– dedi Qyrymbek Kósherbaev. Janar-jaǵarmaı – dıqan­dardyń basty máselesi. Kóktemgi egis jumystary bastalysymen suıyq otynnyń baǵasy sharyqtap ketetin. Bul túıtkildiń túıini tar­qatyldy. Munaı óńdeý zaýyt­tarynan dızel otynyn jet­ki­zýshi 12 operator belgilendi. Olar sharýalarǵa dızel otyny lıtrin 90 teńgeden jetkizip berýde. Aımaq basshysy kelisilgen merzimde jaǵarmaı jetkizip bermegen operatorlarǵa qatań talap qoıylatynyn taǵy bir eskertti. Sýbsıdııanyń da ýaqtyly tólenýi baqylaýda bolatyny aıtyldy. О́tken jyly kúrishten rekordtyq ónim jınalǵany málim. Bıyl da sol mejeden túsirmeý úshin bar kúsh-jigerdi salý kerek. Irgedegi Reseıdiń Krasnodar aımaǵy kúrishten jaqsy ónim alatyn ólke. О́ńir basshysy kórshilerden tájirıbe alý kerektigin atap ótti. Osy jıynǵa Krasnodar «Grýppa Kompanıı Agroplıýs» JShS-niń satý bóliminiń dırektory Evgenıı Nıkıtenko arnaıy kelip, ózderiniń kúrish ósirý ádisterimen bólisti. Al Syr dıqandary kúrish egý jumystaryn 1 maýsymǵa deıin aıaqtaýdy josparlap otyr. Erjan BAITILES, «Egemen Qazaqstan». Qyzylorda oblysy.