ASTANA. 6 mamyr. Ortalyq kommýnıkasııalar qyzmetinde uıymdastyrylǵan brıfıngte Ulttyq ǵarysh agenttiginiń tóraǵasy Talǵat Musabaev KazSat-3-tiń aldaǵy qyrkúıekten bastap iske kirisetinin jetkizdi. Bul týraly egemen.kz tilshisi habarlady.
Talǵat Musabaevtyń aıtýynsha, shamamen bıylǵy mamyr aıynyń ortasynda atalǵan jer serigi orbıtadaǵy tıisti núktesine jetýi tıis. Sodan soń ushý-konstrýktorlyq, tirkeý synaqtary júrgizilip, aldaǵy qyrkúıekte ony eksplýatasııaǵa qabyldaıdy.
Ulttyq ǵarysh agenttiginiń tóraǵasy ǵarysh salasynda atqarylǵan jumystar nátıjesinde elimiz baılanys jáne aqparat taratý sekildi strategııalyq mańyzdy baǵytta ózgege táýelsiz bolǵanyn atap ótti.
Esterińizde bolar, 28 sáýirde «Baıqońyr» ǵarysh aılaǵynan KazSat-3 úshinshi ulttyq geostasıonarlyq habar taratý jáne baılanys jer serigi sátti ushyrylǵan. KazSat-3-te Qazaqstan aýmaǵyn baılanys qyzmetimen qamtamasyz ete alatyn Ku-dıapazondy 28 transponder ornatylǵan. Ǵarysh apparatynyń jumys isteý merzimi 15 jyldaı.
Sondaı-aq, brıfıngte Talǵat Musabaev 2017 jyly elimizdiń taǵy bir azamaty ǵaryshqa ushýy múmkin dep málimdedi. Ol osyǵan baılanysty: «Biz óte kúrdeli jáne naqty sharalardy qolǵa alyp otyrmyz. Kelissózder júrgizilýde jáne oń sheshilip jatyr... Biz 2017 jyly osyndaı ıgi istiń júzege asýy múmkin dep aldyn ala aıta alamyz», – dedi.
Budan bólek, Talǵat Musabaev Memleket basshysynyń «Qazaqstan joly – 2050: bir maqsat, bir múdde, bir bolashaq» atty Joldaýynda kórsetilgen mindetterdi oryndaý sheńberinde agenttiktiń júrgizip otyrǵan jumysy týraly aıtty. Naqtylaı aıtqanda, ol vedomstvo qyzmetiniń eki strategııalyq baǵyty jóninde sóz etti: birinshisi – «Ǵarysh ınfraqurylymyn qalyptastyrý jáne damytý», ekinshisi – «Ǵylym jáne ǵylymı-tehnologııalyq bazany damytý».
Joldybaı Bazar.
Derekkóz: egemen.kz.
Foto: Lenta.kz.
