NOMADS arqyly ultymyzdyń tarıhy men tanymyn zerdeleýge bolady

ASTANA. 6 mamyr. Ortalyq kommýnıkasııalar qyzmetinde otandyq NOMADS onlaın-oıynynyń tusaýkeseri boldy. Bul týraly gazeta.kz habarlady. NOMADS-ta halqymyzdyń tarıhy men tanym-túsinigi, ádet-ǵurpy sátti qamtylǵan. Bul alǵashqy otandyq braýzerlik oıynnyń tusaýkeserinde KazBussinesMedia qoǵamdyq qory keńesiniń tóraǵasy Asqar Omarov: «Búginde ǵalamtorda onlaın-oıyndar óte kóp, alaıda, ulttyq ónim joq.  Sondyqtan da, ótken jyly Áset Ospanov degen baýyrymyzdyń oıyna qazaq tilindegi braýzerlik oıyndy qurastyrý ıdeıasy keledi.  Sodan, bizdiń KazBussinesMedia qory bul bastamany qoldap, oıyndy qurastyrýǵa kiristik. Ol tolyǵymen ejelgi túrkiler men qazaqtardyń tarıhyna negizdelgen. Ony qazaqstandyq mamandar jasady. Sheteldikter tartylǵan joq», – dedi. Tusaýkeser rásiminde belgili bolǵandaı, 2 aı buryn áleýmettik jelilerge ilki nusqasy shyǵarylǵan bul oıyn qazaq jáne orys tilderinde daıyndalǵan. Al onyń ózbek jáne qyrǵyz tilderindegi nusqalaryn jasap, Ortalyq Azııanyń ınternet keńistigine shyǵý josparda qarastyrylypty.  Sondaı-aq, buǵan bashqurttar da qyzyǵýshylyq tanytýda. Olar oıyndy óz tilderine aýdarýǵa nıet bildirýde. Jıynda Áset Ospanov oıyndy qalaı bastaý kerektigin úıretti. Munda qazaqtyń qarý-jaraqtary dál qalpynda, kompıýterlik nusqada jasalǵan. Oıyndy ázirleýshiler ony áli de jetildire túsemiz dep otyr. Joldybaı Bazar. Derekkóz: gazeta.kz. Foto: vk.com.