ASTANA. 6 mamyr. Búgin Qazaqstannyń 6 qalasynda premer-lıga chempıonaty 10-týrynyń oıyndary oınaldy. Týr munyń aldyndaǵylarǵa qaraǵanda, soǵylǵan golǵa baı boldy. Bul týraly egemen.kz tilshisi habarlady.
Eń iri esep Astanada tirkeldi. Jergilikti komanda Semeıdiń «Spartagy» qaqpasyna jaýapsyz bes gol soqty. Osy jeńilis qonaqtardyń bas jattyqtyrýshysy Almas Qulshynbaevtyń aıtylyp júrgen otstavkasynyń ýaqytyn jaqyndatyp jibergen sııaqty. О́tken jyly onymen birge Qaskeleńniń «Suńqaryn» jattyqtyrǵan belgili maman Vladımır Gýlıamhaıdarov semeılikterdi joǵary eshalonda saqtap qalýdyń birden-bir durys joly osy bas jattyqtyrýshyny neǵurlym tezirek ornynan bosatyp, tizgindi tájirıbeli mamanǵa berý ekenin ashyp aıtqan edi.
Atalmysh matchtyń birinshi taımy 1:0 esebimen aıaqtaldy. Esepti shabýylshy Tańat Nóserbaev 14-mınýtta ashty. Ekinshi taımda (51-mınýt) Tańat esepti eseledi. Budan keıin Vıktor Dmıtrıenko (71-mınýt) men Foksı Ketevoama (76-mınýt) birinen keıin biri gol salyp, komandanyń basymdylyǵyn arttyra tústi. Al eń sońynan Sısero (90-mınýt) sońǵy núkteni qoıdy.
Týrda 2:0 degen esep úsh ret qaıtalandy. Olardyń ekeýinde alań ıeleri basym tússe, bireýinde qonaqtardyń mereıleri ústem boldy. Sol syrt alańnyń ózinde qarqyndy oıyn tanytqan komanda «Aqtóbe» boldy. Ol Qostanaıda jergilikti «Tobyldy» tize búktirdi. Eki jasaqtyń kópten kútken kezdesýleri alań ıeleriniń jańa jattyqtyrýshysy Vardan Mınasıannyń birinshi sátsizdigin áıgiledi. Qonaqtar oıynnyń basynan sońyna deıin dopqa egelik etti. Olar jıi shabýylǵa shyǵyp turdy. Sondaı joryqtardyń birinde Danılo Nekonyń oń qaptaldan jóneltken soqqysy qaqpadan bir-aq tabyldy. Bul jetistikti ekinshi kezeńde Tımýr Kapadze ulǵaıtyp berdi.
Bıyl qurylǵanyna 60 jyl tolatyn Almatynyń «Qaıraty» Qazaqstannyń ózinen keıingi baıyrǵy komandasy – Qaraǵandynyń «Shahterinen» aılasyn asyra bildi. Almatylyqtar tez esep ashýdyń arqasynda jaǵdaılaryn biraz jeńildetip aldy. Darbazany Iosıp Knejevıch 9-mınýtta baǵyndyrdy. Al ekinshi taımda Vıktor Kýmykov alańǵa Andreı Fınonchenko men Vıacheslav Lýnındi shyǵardy. Bul almasýshylyq kenshilerdiń quramyn kúsheıtti. Biraq qaraǵandylyqtar budan nátıje shyǵara almady. Esesine, almatylyqtar Momodý Sıseıdiń kúshimen taǵy bir golǵa qol jetkizdi.
Estonnyń Tarmo Rıýıýtlı esimdi mamany bıylǵy kóktemde ǵana qabyldap alǵan Pavlodardyń «Ertisi» sońǵy tórt týrda jeńiliske ushyrady. Osydan keıin klýb basshylyǵy jańa jattyqtyrýshymen qoshtasýǵa májbúr boldy. Bir qyzyǵy, osydan keıin komanda shabýylda nátıjeli oınaı bastady. Pavlodarlyqtardyń búgin óz alańynda «Tarazben» oıyny barysy osyny anyq baıqatty. Birinshi dopty 19-mınýtta Konstantın Dýdchenko óz esebine jazdy. Al Ulyqbek Bakaev 72-mınýtta esepti ósirdi.
Taǵy bir jeńisti Qyzylordanyń «Qaısary» Atyraý qalasy komandamen oıynda tartyp aldy. Olaı deıtinimiz, meımandar birinshi bolyp qaqpa qulpyn ashty (Dmıtrıı Parhachev, 12-mınýt). Syrboıylyqtar esepti tek ekinshi taımda ǵana teńestirdi (Mılıan Iаblan, 56-mınýt). Al 80-mınýtta Rımo Hýnt soqqan gol alań ıeleriniń jeńisin aıǵaqtady.
Týrda jalǵyz teń oıyn Shymkentti jergilikti «Ordabasy» men Taldyqorǵannyń «Jetisýy» arasyndaǵy kezdesýde oryn aldy. Munda da qonaqtar birinshi bolyp gol soǵý qurmetine ıe boldy (Konstantın Zarechnyı, 31-mınýt). Al shym qala jigitteri 45-mınýtta esepti penaltıden teńestirdi (Azat Nurǵalıev). Ras, budan keıin Zarechnyı da 11 metrlik aıyp dobyn urý kezegine jetti. Biraq oıynnyń 69-mınýtynda tirkelgen bul jaǵdaıda alań ıeleriniń qaqpashysy sheberlik tanytyp, qaqpasyn kóldeneń doptan saqtap qaldy.
Top basynda áli de «Aqtóbe» keledi. Onyń 23 upaıy bar. Al mergen shabýylshylar kóshin «Ordabasy» komandasynyń forvardy Edın Iýnýzovıch 4 doppen bastap tur.
Damır Qojamqul.
Derekkóz: egemen.kz.
Foto: sports.kz.
