Áýejaıdaǵy jarylystyń sebebi belgisiz

Ázirge jarylysqa naqty ne sebep bolǵany belgisiz. Esterińizge salsaq, 9 tamyz kúni tús aýa Qyrymnyń Saq aýdanyndaǵy Novofedorovka aýylynda jarylys bolyp, saldarynan bir adam qaza taýyp, taǵy birneshe adam jaralandy. Reuters agenttiginiń habarlaýynsha, turǵyndar 15:20 shamasynda kem degende 12 jarylys estigenin jetkizgen.

Qyrymdaǵy Novofedorovkadan Ýkraına qarýly kúshteriniń Herson oblysyndaǵy pozısııa­laryna deıingi aralyq 200 shaqyrymnan asady. Atalǵan elde mundaı qashyqtyqqa ushatyn zymyrandardyń bar-joǵy týraly resmı málimet joq. Sondyqtan áýejaıdaǵy jarylystyń qalaı órbigeni áskerı sarapshylar úshin de túsiniksiz bolyp tur.

Jalpy, Qyrym túbeginde Keńes ókimeti kezinde-aq kóptegen áskerı nysan salynǵan. Son­dyqtan ony qorǵaýǵa, ásirese áýe shabýyldaryna toıtarys berýge múmkindik mol. Saq aýda­nyndaǵy áýejaı da osyndaı strategııalyq mańyzdy nysannyń biri.

2014 jyldan bastap aerodromda Qara teńiz flotynyń áskerı-teńiz avıasııasynyń 43-shi áskerı-shabýyldaýshy avıasııalyq polki or­nalasqan. Spýtnıkten túsirilgen sýretterge kóz júgirtsek, áýejaıda Sý-24M bombalaýshy, Sý-30 joıǵysh  jáne basqa da ushaqtar turǵanyn ańǵa­rasyz.

Al amerıkalyq Planet Labs kompanııasynyń 10 tamyzda túsirgen sýretterinde órtengen jer men qıraǵan tehnıka anyq baıqalady. BBC arnasynyń habarlaýynsha, áýejaıdyń ushý-qoný jolaǵy buzylmaǵan. Alaıda keminde segiz ushaq qıraǵan nemese qatty zaqymdanǵan.

Reseı qorǵanys mınıstrligi oqıǵaǵa baılanysty málimdeme jasap, oq-dári qoımasy ja­rylǵanyn habarlady. Biraq ushaqtardyń qıraǵany jóninde tis jarǵan joq. Sondaı-aq atalǵan eldiń buqaralyq aqparat quraldary bazaǵa shabýyl jasalmaǵanyn jazdy.

Ýkraına tarapy da soqqy jasaǵany týraly málimet taratqan joq. Degenmen el prezıdenti Volodımır Zelenskıı óz úndeýinde «Qyrymnan bastalǵan soǵys Qyrymdy azat etýmen aıaqtalýǵa tıis» dep aıtty.

Ýkraına prezıdenti keńsesi basshysynyń keńesshisi Mıhaıl Podolıak aerodromdaǵy ja­rylysqa Ýkraınanyń qatysy joq ekenin alǵa tartyp, oqıǵany Qyrymdaǵy partızandardyń isi bolýy múmkin degen boljam jasady. Washington Post gazeti de osyndaı yńǵaıdaǵy aqparat taratty. Basylym jarylysty Ýkraına arnaıy operasııa kúshteriniń áreketi dep jazdy.

Áıtse de, sarapshylar aıtylǵan nusqalardyń eshqaısysy senimdi emes ekenin alǵa tartady. Biraq jarylysqa naqty ne sebep bolǵanyn eshkim dóp basyp aıta almaı otyr.