Qazaqstanda kún sáýlesimen júretin arba jasaldy

Qazaqstan ónertapqyshtary kún sáýlesimen júretin, múgedekterge arnalǵan arba jasap shyǵardy. Ony Halyqaralyq qazaq-túrik ýnıversıtetiniń ǵalymdary ómirge keltirdi. Bul oqý ornynyń budan 22 jyl buryn Qazaqstan Prezıdenti Nursultan Nazarbaev pen Túrkııa basshysy Súleımen Demıreldiń ortaq mámilege kelýleri arqasynda ashylǵany málim. Mine, osy oqý ornynyń oqy­tý­shylar qaýymy Elbasynyń «Qa­zaqstan-2050» Strategııasynda ǵylymǵa qatysty atap kórsetilgen qaǵıdattarǵa erekshe nazar aýdardy. Al atalmysh qujatta elimizdiń úzdik 30 memlekettiń qataryna qosylýy úshin ınnovasııalyq júıelerdiń tıimdiligin arttyryp, ǵylym men bilim sapasyn jaqsartýǵa zor kóńil bólingen bolatyn. Túrkistandyq ustazdar birden qazirgi zamannyń alǵa qoıyp otyrǵan ózekti máselesi tóńireginde izdenýge kúsh saldy. Sonyń nátıjesinde joǵaryda aıtylǵan qolarba dúnıege keldi. Qazir bul oqý ornynyń korpýstaryn balamaly elektr qýatyna kóshirý jóninde jumystar jasalyp jatyr. Osy 22 jyldyń ishinde ýnı­ver­sıtetti 100 myńǵa jýyq túlek bi­tirip shyqty. Qazir olar elimizdiń ár túkpirinde túrli salada eńbek etip júr. Búginde oqý ornynda 26 memleketten 10 myńnan astam stýdent bilim alýda. Munda ǵylymı-ınnovasııalyq jobalarǵa da erekshe kóńil bólingen. Ýnıversıtet ǵalymy Ferhad Chaıyr uzaq jyldardan beri kún nurynan qýat alatyn birneshe jobany júzege asyrdy. Al Túrkııa tarapynyń qarjylandyrýymen iske asqan tórtinshi eńbegi múgedek jandar úshin taptyrmas qural boldy. Alǵashqy arbany oqý ornynyń basshylary Kentaý qalasynyń turǵyny Jánibek Berdimuratovqa tegin syıǵa tartty. Aǵashtan buıym­dar jasaýmen aınalysatyn jas kásipkerge bul úlken demeý boldy. Murat AITQOJA.