«Bıyl 15 maýsymda Mádenıet jáne sport mınıstri Dáýren Abaev zııaly qaýym ókilderimen, aqyn-jazýshylar, jýrnalıstermen kezdesip, elimizde tuńǵysh ret osy «Aıboz» ulttyq ádebı syılyǵy taǵaıyndalatynyn habarlaǵan edi. Sodan beri eki aı ótti, baıqaýdyń aıaqtalýyna bir aı ýaqyt qaldy. Ulttyq ádebı syılyqta «Úzdik proza», «Úzdik poezııa», «Úzdik drama», «Úzdik aýdarma», «Úzdik balalar ádebıeti», «Úzdik komıks» jáne «Úzdik kitap» nomınasııalary bar. Ár atalymnyń jeńimpazyna 5 mln teńgeden júlde taǵaıyndalǵan. Sonymen birge «Úzdik komıks» jáne «Úzdik kitap» nomınasııalary alǵash ret ótkizilip otyr», dedi Mádenıet jáne sport mınıstrligi Arhıv jáne qujattamany basqarý komıtetiniń tóraǵasy Qýat Borash.
Aıta keteıik, baıqaýǵa ótinimder aiboz@kitap-palatasy.kz elektrondy mekenjaıyna 1 qazanǵa deıin qabyldanady.
«Mundaǵy basty talap – jańa dúnıeler ǵana qabyldanady, shyǵarma buryn-sońdy esh jerde, áleýmettik jeliler men gazet-jýrnaldarda jarııalanbaǵan bolýǵa tıis. Eki aıda baıqaýǵa 150-den astam shyǵarma kelip tústi. Kóptegen týyndynyń qujattary durys bolmaǵandyqtan, olardy qaıtaryp, túzetip qaıta jiberýge múmkindik berip jatyrmyz. Suranys óte kóp, bir avtordan 4-5 eńbek keletin sátter de bar. Qyzyǵýshylyq tanytqandar kún saıyn arnaıy telefonymyzǵa habarlasyp jatyr. Shyǵarmalardyń deni qyrkúıek aıynda keledi dep oılaımyz», dedi Ulttyq memlekettik kitap palatasynyń dırektory Ádil Qoıtanov.
Spıkerdiń aıtýynsha, baıqaýǵa qatysýshylardyń jasyna shekteý joq. Erkin taqyryptaǵy barlyq kórkem shyǵarma qabyldanady.
«Mysaly, jaqynda 13 jastaǵy bala habarlasyp, óz shyǵarmalaryn jiberdi. Árıne, biz oǵan ruqsat ettik. Bizdiń baıqaýǵa 13 jasar baladan Memlekettik syılyqtyń laýreaty atanǵan kisiler de qatysyp jatyr. Negizinen proza, poezııa, balalar ádebıeti janrlaryna ótinim kóptep túsýde, kitap dızaıny boıynsha da qatysýshylar kóp, komıkster ázirge az», deıdi Ádil Qoıtanov.
Aıta keteıik, ádebı syılyq jeńimpazdarǵa jyl sońynda tapsyrylady. Konkýrs nátıjesinen soń jeńimpazdardyń shyǵarma-
lary 500 danamen jaryq kóredi.
Sondaı-aq brıfıng barysynda Jazýshylar odaǵynyń múshesi, jazýshy, aýdarmashy Lıýbov Shashkova, jas jazýshy Sadyq Sherimbek sóz alyp, shyǵarmashylyq baıqaýdyń mán-mańyzyna toqtaldy. Ádebıet salasyndaǵy taǵy bir jańalyq, 2023 jyldan bastap jas jazýshylar men aqyndar úshin arnaıy Prezıdenttik ádebı syılyq taǵaıyndalady. 18 ben 29 jas aralyǵyndaǵy avtorlarǵa arnalǵan baıqaý da jas talanttardy qoldaý maqsatynda jasalyp otyr.
