Almaty óńirlik kommýnıkasııalar qyzmetiniń alańynda ótken brıfıngte «QTJ-Júk tasymaly» JShS fılıaly – «JT Almaty bólimshesi» bas ınjeneriniń mindetin atqarýshy Aleksandr Igoshen: «Osy jyldyń tek 7 aıynda temirjoldyń Almaty fılıalynyń shekarasynda lokomotıv brıgadalaryna shuǵyl tejegishti 110 márte basýǵa týra keldi, onyń ishinde 5 oqıǵa ólimmen aıaqtaldy. Poıyzdy shuǵyl toqtatý sanynyń azaıǵanyna qaramastan, statıstıka óte jaǵymsyz», degen málimetterdi keltirdi.
Qaı kezde de temirjolshylar apattardyń aldyn alý, ásirese adamdardyń poıyz astyna túsip qalýyn boldyrmaý úshin qoldan kelgen sharalardyń bárin de jasap jatady. Mysaly, jelilik polısııa bólimimen birlesip reıdter júrgiziledi, túsindirý jumystary, oqý oryndarynda kezdesýler ótedi. Arnaıy saqtandyrý plakattary ilinip, jaıaý júrginshiler kópirlerin salý máseleleri jergilikti atqarýshy organdarmen birlesip pysyqtalyp jatady.
Eger osy amal-sharalardy naqtylaıtyn bolsaq, bıyl 2 myńnan astam adamdy qamtyǵan kezdesýler men Almaty-1 stansasyndaǵy joǵarydaǵydaı oqıǵalar jıi tirkeletin 10 ýchaskede reıd ótkizilgen.
«Temirjoldyń janynda turatyn adamdar qozǵalys qaýipsizdigin esten shyǵarmaǵandary jón. Olar belgilenbegen oryndarda joldardy kesip ótpeýi, temirjol kóligi nysandarynda oıyn-saýyqtar ótkizbegeni abzal. Jolaýshylar poıyzynyń jyldamdyǵy saǵatyna 140 shaqyrymǵa jetedi, al júk poıyzdary saǵatyna 110 shaqyrym jyldamdyqpen júredi, salmaǵy 7 myń tonnadan asady. Mundaı kezde lokomotıv brıgadasy jolda kedergini baıqasa, shuǵyl tejegishti qoldanýy ábden múmkin. Al lokomotıvti oqys toqtatqan kezde joldyń sapasyna, poıyzdyń salmaǵy men jyldamdyǵyna baılanysty keminde 500 metr, al keıde bir shaqyrymnan artyq qashyqtyq qajet bolady. Bul avtokólik emes, onda birneshe metr qashyqtyqta toqtaýǵa nemese bir jaqqa burýǵa bolady», dedi QTJ spıkeri.
Aleksandr Igoshen poıyzdardy shuǵyl toqtatý temirjol qozǵalysyna keri áser etetinin alǵa tarta kele: «Poıyzdardyń qozǵalysy adamdardyń, mal nemese avtokóliktiń kesirinen oqys, josparsyz toqtaǵan kezde úziledi. Qozǵalysta osyndaı irkilister oryn alyp jatady, bul kútpegen shyǵyn ákeledi», dedi.
Qalaı desek te, balalardyń temirjoldarda oınaýy, áleýmettik jeliler úshin rolıkter túsirilýi temirjolshylardy qatty alańdatady. Spıkerdiń aıtýynsha, temirjol kóligi nysandarynda beınerolıkter túsirý, qulaqqappen mýzyka tyńdaý, ásirese kapıýshondy kıip alý óte qaýipti. О́ıtkeni mundaı jaǵdaıda lokomotıv sıgnaldary estilmeı nemese baıqalmaı qalady.
Sonymen spıker sóziniń sońynda eldi temirjol tártip erejelerin múltiksiz saqtaýǵa shaqyrdy.
ALMATY
