Mádenı jıyn barysynda Jetisý oblysynyń ákimi Beıbit Isabaev aqynnyń shyǵarmashylyǵyna qatysty jańalyqtarmen bólisti.
«Jetisýdaǵy Eshkiólmes taýynyń baýraıynda dúnıege kelip, dúıim halyqtyń parasatty perzentine aınalǵan óner ıesiniń rýhanı murasy – barshaǵa ortaq qazyna. Aqynnyń lırıkalyq poezııasy, otanshyldyq rýhtaǵy jyrlary, kórkem aýdarmadaǵy sheberligi, jyraý Jambyl Jabaevtyń shyǵarmashylyǵyndaǵy róli, jýrnalıstik joly – jalpy qazaq rýhanııatyna qosqan úlesiniń qaı-qaısysy da jeke-dara bólip aıtýǵa laıyq eresen eńbek.
Bıylǵy mereıli jyl aıasynda oblys ákimdigi Ǵalı Ormanovtyń Lev Tolstoıdan aýdarǵan «Anna Karenına» romanynyń 2 tomdyǵyn basyp shyǵarýǵa qoldaý kórsetip otyr. Bul qazaq ádebıetine, aqynnyń shyǵarmashylyq jolyn nasıhattaýǵa qosqan azǵantaı úles bolmaq. Búgingi kesh osy ǵıbratty bastamalardyń jalǵasy dep bilemin», dep atap ótti oblys ákimi.
Aıta keteıik, rýhanı is-shara Ǵalı Ormanovtyń shyǵarmashylyǵymen keńinen tanysý jáne ǵıbratty ǵumyrynan ónege alý maqsatynda uıymdastyryldy. Ádebı keshke elordalyq zııaly qaýym men oqyrmandar qatysty.
