Urpaǵynyń keleshegin atamekenimen baılanystyrýdy qalaǵan qandastarymyzdyń alǵashqy toby áýeli Pavlodar qalasyna taban tirep, osy jerde kóshi-qon qyzmeti men jumyspen qamtý organdarynyń úılestirýmen aýyl-aımaqtarǵa bólindi. Arqa dalasyndaǵy qazaqtyń qutyn arttyryp, óńirdiń damýyna óz úlesimizdi qosamyz dep kelgen aǵaıynǵa qala-aýdandardyń atqarýshy bılik ókilderi bos jumys oryndary týraly áńgimelep, jergilikti jerdegi baspanamen qamtý múmkindikterin usyndy.
Dúnıejúzilik qazaqtar qaýymdastyǵy óńirlik fılıalynyń jetekshisi Bolat Zaýyttyń aıtýynsha, qandastarymyz Túrikmenstannan arnaıy vızamen kóship kelgen.
«Kezdesý barysynda memleket tarapynan kórsetiletin kómekter týraly tolyq aqparat berildi jáne shetel azamattarynyń Qazaqstanda bolý tártibi, olardyń qujattaryn rásimdeý máselesi egjeı-tegjeı túsindirildi. Sondaı-aq qandastardyń jeke sáıkestendirý nómirin ıelenýi, Qazaqstan Respýblıkasy azamattyǵyn rásimdegenge deıingi memlekettik qyzmetterdi alý tártipteri aıtyldy. Táýelsizdik jyldary oblysqa shetelderden kóship kelgen qazaqtardyń jetken jetistikterin baıandadyq, olardyń jańa ortaǵa tez beıimdelýine qatysty aqparattyq aqyl-keńesimizdi umytpadyq», deıdi ol.
Jyl basynan beri Pavlodar oblysyna Reseı, Mońǵolııa jáne О́zbekstannan jalpy sany 216 qandasymyz kóship kelgen. Syrttan qonys aýdarýshylar úshin bıyl 800 kvota bólinse, tek Túrikmenstannan 427 adam Ertistiń boıyn en jaılaǵan óńirimizden turaq tabady dep kútilýde. Bul azamattar oblysta keminde 5 jyl turýy kerek. Zańǵa sáıkes jeke sáıkestendirý nómirin alǵan soń olarǵa «qandas» mártebesi beriledi. Odan soń ornyqqan jeri boıynsha tirkelip, Qazaqstan azamattyǵyn alýǵa qujattar tapsyrady.
О́ńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova shetten kelgen qandastardyń Pavlodar oblysyn tańdaýy úlken qýanysh ekenin aıtyp ótti. О́ńirge qansha adam kelse de oblys bıligi olarǵa jaǵdaı jasaýǵa ázir.
– Bizdiń basty maqsatymyz – osy kisilerdi jumyspen qamtyp, óńirde turaqtap qalýyna múmkindik jasaý, – dep atap ótti basqarma basshysy.
Qonys aýdarýshynyń árqaısysyna memleket tarapynan 214 myń teńge kóleminde kómek beriledi. Bul kelýshilerdiń kóship-qoný shyǵynyna arnalǵan qarajat. Odan soń bir jylǵa deıin baspana jaldap turýyna qarajat bóledi. Ol soma bir otbasy úshin aı saıyn shamamen 45-91 myń teńge aralyǵynda, mólsheri qonystanýshynyń qala, aýdan ortalyǵyn nemese aýyldy tańdaýyna baılanysty bekitiledi. Al baspanany birden satyp alýǵa múmkindigi barlarǵa jaldaýǵa beriletin qarajattyń bir jyldyq jıyntyǵy birden tólenedi. Odan bólek, jeke kásippen aınalysqysy keletin azamattarǵa arnaıy grant qarastyrylǵan. Iаǵnı kásipker arnaıy bıznes kýrsyn oqyp, bıznes josparyn ázirlep usynǵan jaǵdaıda 1,2 mln teńge kóleminde qaıtarymsyz grant beriledi. Bul – memleket tarapynan bekitilgen resmı qoldaý túrleri. Budan bólek eńbekke qabilettilerin jumyspen qamtý, aýyl sharýashylyǵymen aınalysamyn deýshilerge jer telimderin rásimdeý, shaǵyn kásippen shuǵyldanýshylarǵa qajetine qaraı ǵımarattar men arnaıy oryndar taýyp berý sekildi jumystar da júrgiziledi.
Búginde Pavlodar oblysynda syrttan kóship kelýshilerge arnalǵan boljaldy karta ázirlengen. Onda 111 eldi meken belgilengen jáne myńnan astam bos jumys oryndary bar. Qandastarymyz qaı eldi mekenge baratynyn ózderi tańdap, jergilikti jerde mamandyǵy boıynsha eńbek ornyna ornalasady. Túrikmenstannan kóship kelip jatqandardyń basym bóligi – tehnıkalyq bilimdi ıgergender. Qazir óńirdiń densaýlyq saqtaý jáne bilim berý salalaryna mamandar asa qajet. Bolashaqta bul kem-ketiktiń orny da syrttan áli de keletin qandastardyń kúshimen toltyrylady degen senim zor.
Buǵan deıin Túrikmenstannan óńirge kóship kelgen bir otbasy Aqsýdyń aýyldyq aımaǵyna qonystanǵan bolatyn. Áýlet úlkeni, 67 jastaǵy Eskendirhan Súıiqulov qartaıǵan shaqta atamekenniń topyraǵyna taban tiregendi jón kórgenin aıtady. Bul jaqta jyly júzben, úlken qamqorlyqpen qarsy alǵanyn, baspana berip, barlyq kómekti kórsetip jatqanyn jetkizdi.
«Bir balam Atyraý óńirinde qalyp qoıdy. Nemerelerim ósip qaldy, olar Qazaqstanda jetilip, ana tilinde bilim alsa dep armandaǵan edim. Armanym júzege asqanyna aıryqsha qýanyp turmyn. Qudaıǵa shúkir, óz jurtyma kelip qosylǵanymyz úlken baqyt boldy», dep oı bólisti qarııa.
Qandasymyzdyń biri Maqsat Súıesinov aýyldyq jerge baryp, mal ósirýdi oıǵa alypty.
– Túrikmenstandaǵy Balqanabat ólkesinen kóship keldik. Otbasymyzda tórt jan bar, zaıybym ekeýimiz bir ul, bir qyz tárbıelep otyrmyz. Qyzym bıyl 8-synypqa barady. О́z mamandyǵym elektrık, al áıelim úı sharýashylyǵymen aınalysady. Bul óńirdegi Maı nemese Aqqýly aýdandarynyń birine baramyz dep sheshim qabyldadyq. Ol jerde mal ósirip, sharýashylyq qursaq pa deımiz. Balqanabatta biz tórt túlik ósirip, sonymen kúneltken edik, – deıdi otaǵasy.
Aıtyp óteıik, búginde Túrikmenstanda 20 myńdaı qazaq turady.
Pavlodar oblysy
