О́zderin «polısııa qyzmetkeri» nemese «Ulttyq bank qyzmetkeri» dep tanystyratyn qaskúnemder azamattardy aldap, nesıe, mıkrozaım rásimdeýge, sondaı-aq úshinshi tulǵalarǵa aqsha aýdarýǵa arbaıdy. Mundaı shemalar alaıaqtardy ustaý maqsatynda banktik «naýqan» degen syltaýmen júzege asyrylýy múmkin. Bul rette is-áreketteriniń zańdylyǵyn rastamaq bolyp «Ulttyq banktiń jalǵan qyzmetkerine» qońyraý shalǵan bolady, qyzmetkerdiń jalǵan kýáligin de kórsetedi.
Alaıaqtyq ádisterdiń taǵy bir túri – Ulttyq bank ázirlegen jeke ınvestısııalyq baǵdarlamalar dep atalady. Mundaı onlaın-platformalarda ınvestısııalar, jalǵan lısenzııalar jáne quqyq belgileıtin qujattar týraly jalǵan aqparat ornalastyrylǵan.
«Osyǵan baılanysty Ulttyq bank «quqyq qorǵaý júıesiniń» nemese «Ulttyq Banktiń jalǵan qyzmetkerlerinen» qońyraý túsken kezde lezde áńgimeni úzip, alaıaqtar oılap tapqan «operasııalardy» júrgizýge qatyspaý kerek ekenin eskertedi. Osyndaı zańsyz áreketterden zardap shekken azamattar dereý quqyq qorǵaý organdaryna habarlasqany jón. Sondaı-aq Ulttyq bank mobıldi qosymshalardy ornatpaý kerek ekenin, jeke derekterdi jarııalamaýdy, AnyDesk, Team Viewer sekildi smartfondy qashyqtan basqaratyn qyzmetterden saq bolýdy suraıdy. Qandaı jaǵdaıda bolmasyn, telefon arqyly berilgen nusqaýlardy oryndaýdan saqtanyp, úshinshi taraptyń esep shotyna aqsha aýdarmaý kerek, sebebi mundaı aýdarymdardy qaıtarý nemese ony daýlaý óte qıyn», dep jazylǵan Ulttyq bank habarlamasynda.
