Fınlıandııa Ulttyq arhıviniń negizi 1892 jyly qalanǵan. Onyń mindeti – ulttyq muranyń bir bóligi bolyp tabylatyn resmı qujattardyń saqtalýyn qamtamasyz etý. Bul – Fınlıandııada arhıv salasyndaǵy eń mańyzdy organ bolyp esepteledi. Shetelden kelgen ǵalymdarǵa ózderinde saqtalǵan qujattardy usynyp, ǵylymı-zertteý jumystaryna belsene qatysady.
«Issapar kezinde arhıv mamandarynyń jumys barysymen tanystym, olar óz tájirıbelerimen bólisti. Mekemeniń geraldıkalyq mádenıetti damytýda múmkindigi zor. Osyny eskere otyryp, arhıv salasyndaǵy birqatar jańalyqtan qulaǵdar boldym. Zamanaýı tehnologııa, qorlardy saqtaý tártibi týrasynda keńinen áńgimelestik», deıdi qalalyq arhıvtiń dırektory Meıram Bektembaev.
Onyń aıtýynsha, atalǵan arhıvte 240 adam jumys isteıdi. Ulttyq arhıvtiń Helsınkı, Vaasa, Inarı (Samı arhıvi), Ioensý, Mıkkelı, Oýlý, Týrký, Hamenlınna jáne Djıveskılla qalalarynda fılıaldary bar. Olardyń bári el ishinde belsendi jumys isteıdi ári oqyrmany da kóp.
Jalpy, Fınlıandııa Ulttyq arhıviniń kitaphanasy óte baı. Ol – qujat aınalymy jáne sfragıstıkaǵa arnalǵan jalpyulttyq mamandandyrylǵan ǵylymı kitaphana sanalady. Kitaphana qorynda 334 myńnan astam otandyq jáne sheteldik ǵylymı kitap, 200-ge jýyq merzimdi basylym bar.
Munda Fınlıandııanyń jáne kórshiles elderdiń tarıhy, zań ǵylymy, memlekettik basqarý jáne áleýmettik zertteýler, ólketaný boıynsha kitaptar jeterlik. Ol az deseńiz uly tulǵalardyń ómirbaıanyn qamtıtyn serııalyq jınaqtar da kezdesedi. Eń qyzyǵy, kitaphana geraldıka jáne sfragıstıka boıynsha ǵylymı hám ádebı jýrnaldardyń qoımasy ispetti. Sondyqtan arhıvke kelýshiler óte kóp.
