Tarıhı meken Mahambet aýdanyndaǵy Saraıshyq qalashyǵynan 25 shaqyrym jerde ornalasqan. Aýmaǵy – 1 gektar. Bul qalashyqtyń ornynda «Saraıshyq» memlekettik mýzeı-qoryǵynyń ǵalymdary arheologııalyq qazba jumystaryn júrgizip jatyr. Oǵan Reseıden kelgen ǵalymdar da tartylǵan.
Arheologter kóne qalashyqty zertteý maqsatyndaǵy qazba jumysy kezinde mazarǵa uqsas nysandy tapty. Bir ereksheligi, bul nysannyń irgetasy, tómengi qabaty osy kezge deıin buzylmaı, sol kúıinde saqtalypty.
– Qalashyq qundy jádigerlerge toly eken. Arheologterimiz qysh qumyralardyń synyǵyn, orta ǵasyrlarǵa tán jádigerlerdi, HIV ǵasyrdyń tıyndaryn taýyp otyr. Bul – táýelsiz qazaq eliniń shejireli tarıhyna qosylatyn qundy jádigerler, – deıdi «Saraıshyq» memlekettik mýzeı-qoryǵynyń dırektory Ábilseıit Muhtar.
Qazba jumysyna qatysqan tarıh ǵylymdarynyń doktory, professor Madııar Eleýovtiń aıtýyna qaraǵanda, sońǵy eki jylda 10-ǵa jýyq qalashyq pen eldi mekenniń orny ashylypty. Bul qalashyqtar arqyly Saraıshyq qalashyǵynan úsh baǵytqa shyǵatyn kerýen joly anyqtalyp otyr.
– Qazir Qaraǵaıly degen jerden shaǵyn qalashyqtyń orny tabyldy. Jerdiń betinde jatqan kóne zattardyń synyqtary kóp. Soǵan qaraǵanda, bul mekenniń tym áriden qozǵaıtyn tarıhy bar. Muny Altyn Orda dáýirindegi Qazaq handyǵynyń qalashyǵy dep topshylaýymyzǵa bolady, – deıdi Madııar Eleýov.
Atyraý oblysy
