Jyldar urshyǵyn jyldam aınaldyrǵanymen sol aıaýly sátter kóz aldynan alystaǵan emes. Áıgili Baýyrjan Momyshulymen qarýlas bolyp, Ekinshi dúnıejúzilik soǵys aıaqtalǵannan keıin de birneshe ret kezdesip, ekeýlep maıdandas baýyrlaryna degen saǵynyshyn basqan. Tipti ataqty partızan Qasym Qaısenovpen Ulan aýdanynda júzdesip, ótken kúnniń esteliginen syr tartqan eken. Sol sátterdiń bári búginde jańǵyryq sekildi.
Jalpy, jetisýlyqtarǵa Sársenbaı Qańtarbaıulynyń esimi jiti tanys. Jeńis kúni áýeli qarııanyń úıinen bastalady. Urys dalasynda kórsetken erligin oqýshylar maqtanysh tutyp, jyrlap ta júr. Artyndaǵy urpaqtary ata ónegesin ómirlik ustanyma aınaldyrǵan. Qaıda barsa da qaranar qarııanyń batasynsyz is bastalmaıdy.
Osy rette Sársenbaı Qańtarbaıuly jylnamasyna úńilsek. Aqylman aqsaqal 1924 jyly 10 mamyrda Kóksý aýdanynyń Balpyq bı kentinde dúnıege kelgen. 1942 jyly Muqyry orta mektebin támamdap, 18 jasqa tolǵannan Semeı oblysynyń Aıagóz qalasyndaǵy №1 qazaq polkinde kishi komandırlerdi daıyndaıtyn áskerı kýrsta 6 aı oqıdy. Ol jerden serjant ataǵyn alady.
Bir jyldan keıin ıaǵnı 1943 jyly Túrikmenstannyń Mary qalasyndaǵy pýlemetshiler ýchılıshesine aýystyrylyp, onda 6 aı tájirıbeden ótedi. Kýrsta sarbazdarǵa saıası sabaqpen birge salmaǵy 65 kılo, uzyndyǵy 2 metrlik iri kalıbrli stanokty pýlemettiń qurylysyn tanystyrady. Nátıjesinde, bilim-biligi kóterilip, starshına ataǵyn alǵannan keıin maıdanǵa suranady. Biraq jasyna baılanysty ony soǵysqa jibermeıdi. Soǵys órti tutanyp, el qıyn jaǵdaıǵa tap bolǵan shaqta jas sarbaz shydap otyra almaıdy.
Jaýyngerlik jolynda, úzdiksiz jattyǵýlar barysynda aty ańyzǵa aınalǵan batyr Baýyrjan Momyshulymen kezdesip, pikirlesedi. Batyr atamyz onyń qan maıdanǵa baryp, shaıqasqa qatyssam degen tilegine qoldaý bildiredi. Keıin oǵan 37 jaýynger berilip, sol jaýyngerlerdi 3 aı boıy túrli áskerı jattyǵýlarǵa úıretedi. Jastardy soǵys oıynyna baýlý merzimi aıaqtalysymen óz bólimshesine oralyp, qan maıdanǵa attanady. Ol soǵys kezinde «Katıýsha» atty joıǵysh qarýdy basqarǵan. Sársenbaıdyń qolyna «№49» degen «Katıýsha» berilgen.
1943 jyldyń sońynan 1944 jyldyń jeltoqsan aıyna deıin Máskeýden basqa, Polsha, Lıtva, Latvııa, Rýmynııa, Estonııada beıbitshilik ornatýǵa qatysqan. Ol 1944 jyly Gýmbınnen qalasynda jaralanyp, gospıtalǵa túsedi. «Oqqa túspes buryn qorqý degendi bilmeıtinmin. Jaralanǵannan keıin baryp qaýiptiń, jazymnyń ne ekenin uqtym», deıdi qarııa áńgimesinde. Sonda 6 aı emdelip, 1945 jyly gospıtaldan shyǵady. Bul sát Jeńis kúnine dál keledi. Sóıtip, maýsymnyń 24-i kúni Máskeý qalasyndaǵy Qyzyl alańda Jýkovtyń basqarýymen ótken Jeńis sherýine qatysyp, aýylyna II toptaǵy soǵys múgedegi bolyp oralǵan.
Soǵystaǵy erligi úshin «Otan soǵysy» ordeni, «Ekinshi dúnıejúzilik soǵystyń ardageri», I-II dárejeli «Eńbek ardageri», «Astanaǵa – 10 jyl» sekildi birneshe medalmen marapattalyp, Ekinshi dúnıejúzilik soǵystyń 60 jyldyq mereıtoıynda «Kóksý aýdanynyń Qurmetti azamaty» ataǵyn alǵan.
Sársenbaı Qańtarbaıuly men Baýyrjan Momyshuly ekeýi 1944 jyly qańtar aıynyń 22-si kúni jaralanyp, bir gospıtalda emdeledi. Birge Jeńis kúnin qarsy alyp, elge oralady. Otbasylaryna aman-saý oralǵannan keıin bir-birimen jıi kezdesip, emen-jarqyn sóılesip, úlken otbasy bolyp aralasyp turǵan eken.
Soǵystan keıin qarııa 1945-1951 jyldar aralyǵynda Jarshapqan aýylyndaǵy mektepte dene shynyqtyrý pániniń muǵalimi bolyp jumys isteıdi. 1951-1954 jyldar aralyǵynda Jarkent pedagogıkalyq ýchılıshesiniń bilim jetildirý kýrsynda oqyǵan. 1952 jyly Alǵabas aýylynyń orta mektebinde muǵalim bolady. Qarııany aýyldastary ulaǵatty ustaz retinde de qurmetteıdi. Talaı bilikti shákirtti tárbıelep shyǵarǵan. Búginde olardyń deni úlken qyzmette otyr.
1955 jyly Alǵabas aýyldyq keńesinde hatshy, esepshi qyzmetin atqarǵan. Odan keıin sol eldi mekende poshta bastyǵy bolyp qyzmet etken. Jan jary Bátıha Núsipqyzy ekeýi 9 balanyń ata-anasy. Olardan búginde 25 nemere, 45 shóbere taraǵan.
Jetisý oblysy
