Nurlan Ábdirovtiń tóraǵalyǵymen ótken Ortalyq saılaý komıssııasynyń kezekti otyrysynda Meıram Qajykenniń Qazaqstan Respýblıkasy prezıdenttigine kandıdattyqqa sáıkestigi týraly másele qaraldy.
Kún tártibindegi másele boıynsha Ortalyq saılaý komıssııasynyń múshesi Shavkat О́temisov baıandama jasady. Ol Qazaqstan Respýblıkasy Prezıdenttigine kandıdat Meıram Qajykenge qatysty saılaý týraly Konstıtýsııalyq zańnyń 59-babynyń talaptaryna sáıkes OSK ýákiletti memlekettik organdarǵa tıisti suraý jibergenin habarlady. Quzyretti memlekettik organdardan kelgen málimetterge saı M.Qajykenniń Qazaqstan Respýblıkasy Prezıdenttigine kandıdat retinde tirkelýine kedergiler joq ekeni anyqtaldy.
Máselen, Bas prokýratýranyń quqyqtyq statıstıka jáne arnaıy esepke alý jónindegi komıtetiniń málimetine saı Meıram Qajyken Qazaqstan prezıdenttigine kandıdattarǵa qoıylatyn Konstıtýsııa men «Qazaqstan Respýblıkasyndaǵy saılaý týraly» Konstıtýsııalyq zańynyń talaptaryna sáıkes keledi. Ishki ister mınıstrliginiń málimeti boıynsha ol týmysynan Qazaqstan Respýblıkasynyń azamaty, Qazaqstanda sońǵy 61 jyl boıy turady. 2022 jylǵy 8 qazandaǵy lıngvıstıkalyq komıssııanyń qorytyndysy boıynsha memlekettik tildi erkin meńgergen. Usynylǵan dıplomnyń kóshirmesine saı joǵary bilimi bar (dıplomnyń túpnusqasymen salystyryp tekserý júrgizildi). Qazaqstan Respýblıkasynyń Memlekettik qyzmet isteri agenttigi usynǵan málimetterge saı memlekettik qyzmettegi jáne saılanbaly memlekettik laýazymdardaǵy jumys tájirıbesi – 14 jyl. Ádilet mınıstrligi usynǵan málimetterge sáıkes, Qazaqstan Respýblıkasynyń Prezıdenttigine kandıdatty usynǵan «Amanat» Qazaqstan kásipodaqtarynyń yntymaqtastyǵy» respýblıkalyq kásipodaqtar birlestiginiń Ádilet mınıstrliginde tirkelgeni týraly qujaty bar.
