О́ńirlerden óris alyp, alǵyrlary anyqtalyp, bas qalada baıqaý qorytyndysy shyǵarylady. Jeńimpaz otbasylardyń qushaǵy gúlge tolyp, shaharyna shattyqpen attanady. Elordada da «Mereıli otbasy-2022» ulttyq baıqaýynyń qalalyq kezeńi ótip, júldegerler marapattaldy.
Uıymdastyrýshylardyń sózine qaraǵanda, baıqaýǵa ótinim berý maýsym aıynyń ortasynan bastap júrgizildi.
«Baıqaý qatysýshylarynyń sany jyldan-jylǵa artyp keledi. Máselen, 2018 jyly baıqaý komıssııasynyń qaraýyna 51 elordalyq otbasy ótinim berse, bıyl 151 otbasy qatysýǵa nıet bildirgen. Baıqaýdyń basty maqsaty – otbasylyq qundylyqtardy dáripteý, otbasy ınstıtýtynyń mártebesin arttyrý, nekeniń mańyzdylyǵyn túsindirý, ata-analardyń bala tárbıesindegi jaýapkershiligin arttyrý, qazaq halqynyń otbasylyq tárbıesin ulttyq qundylyq retinde jandandyryp, ony árbir otbasyna engizý», deıdi is-sharany uıymdastyrýshylar.
Baıqaý Aqparat jáne qoǵamdyq damý mınıstrligi, jergilikti atqarýshy organdar, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen uıymdastyrylyp otyr.
Elordada ótken baıqaý jeńimpazdaryn Nur-Sultan qalasy ákiminiń orynbasary Eset Baıken men qalalyq ishki saıasat basqarmasynyń basshysy Dáýren Babamuratov, Prezıdent janyndaǵy Áıelder isteri jáne otbasylyq demografııalyq saıasat jónindegi ulttyq komıssııa tóraǵasynyń orynbasary Saltanat Tursynbekova marapattady.
Komıssııa sheshimimen ulttyq baıqaýdyń qalalyq kezeńiniń jeńimpazy Saǵıtovtar otbasy boldy. Shańyraq kótergenderine 13 jyl bolǵan Dýlat pen Aınagúl alty bala tárbıelep otyr. Otaǵasy múmkindigi shekteýli jandarǵa arnalǵan paralımpıadalyq jattyǵý ortalyǵynda jáne «Astanalyq sırk» MKK dıspetcheri bolyp jumys isteıdi. Zaıyby Aınagúl Saǵıtova – «Mega Road» JShS kadrlar bóliminiń bastyǵy. Qyzdary respýblıkalyq bı jarystaryna qatysyp, júldeli oryndarǵa ıe bolsa, úlken uly «Astana» hokkeı klýbynda sporttyq mansabyn bastaǵan.
«Tuńǵysh balamyz dúnıege kelgende úlken synaqtan óttik. Bereke-birliktiń arqasynda ony jeńip shyqtyq. Tatýlyǵy jarasqan otbasynda qashanda bereke bolady. Sony este ustaǵan jón. Bul baıqaýdyń bereri mol. Otbasy múshelerin yntymaqqa, birlikke shaqyrady. Osyndaı baıqaýlar jıi bolyp turǵany durys dep oılaımyz. Jeńimpaz bolyp jatqanymyzǵa óte qýanyshtymyz. Qala ákimdigine rızashylyǵymyzdy bildiremiz», dedi Saǵıtovtar otbasy.
Ekinshi oryndy Oljabaevtar men Áýelovter otbasy ózara bólisti. Talǵat Oljabaev pen zaıyby Ásel ekeýi de áleýmettik qorǵaý salasynda Nur-Sultan qalasy ákimdiginiń «Qamqor» áleýmettik qyzmet kórsetý ortalyǵynda eńbek etedi. Olar búginde 7 bala tárbıelep otyr. Al otasqandaryna 20 jyl bolǵan Áýelovter otbasy 10 balanyń ata-anasy. Al úshinshi oryn Aıtqulovtar men Júnisbekovter otbasyna buıyrdy.
«Otandy súıý otbasynan bastalady» degen maqaldy jıi qoldanamyz. Onyń qadir-qasıetin arttyryp, qasyńyzda júrgen aıaýly anańyz ben ardaqty ákeńizdi bar kezinde baǵalaýǵa dáripteıtin dástúrli baıqaýdyń alar orny aıryqsha ekeni anyq. Sol sebepti ıgilikke jeteleıtin, otbasyna degen janashyrlyqty dáripteıtin jarys jalǵasa berse deımiz.
