Jaqynda osy korporasııanyń uıytqy bolýymen Koreıa Respýblıkasyna baspasóz saparymen baryp qaıttyq. Qazaqstandyq birneshe BAQ ókiliniń basyn qosqan sapar barysynda Dúnıejúzilik EKSPO-2030 kórmesiniń Pýsan qalasynda ótýine úles qosyp júrgen atalǵan kompanııanyń óz qalasy – Samsung Digital City-ge arnaıy at basyn burdyq. Resmı túrde aıtsaq, Samsung kompanııasynyń Sývon qalasynda ornalasqan Shtab páterine bardyq.
Seýlden 65 shaqyrym qashyqta jatqan qalashyqty Samsung-tiń «júregi» deýge de bolady. Sebebi munda kompanııa qyzmetkerleri úshin salynǵan emhana, saıabaq, turǵyn úı, fýtbol, golf alańdary, mýzeıden bólek, eń mańyzdysy – iri zertteý kesheni bar. Keshen birneshe kópqabatty úıdi, sonyń ishinde R4 zertteý ortalyǵyn qamtıdy.
37 qabatty jerústi jáne 5 qabatty jerasty bıik ǵımarattyń tik kólemi kózdi shaǵylystyratyn shyny paneldermen qaptalǵan. Álemniń sen tur, men ataıyn degen myqty sáýletshileriniń ózderi bul ǵımaratty kólemi men keńistigi, sondaı-aq syrtqy árleýine qoldanǵan sapaly materıaldaryna qarap «Samsung-tiń ústemdigin aıshyqtaıtyn keshen» dep joǵary baǵalaǵan.
Samsung City-ge kez kelgen adam kire almaıdy. Kirgenderdiń ózderi tyńǵylyqty ári jan-jaqty tekserýden ótedi. Onyń sebebi de túsinikti. Shtab páter – álemge áıgili Samsung-tiń ótkenin ǵana emes, bolashaǵyn da jalǵaıtyn tarıhı meken. Dál osy qalashyq ornalasqan jerde – Sývon qalasynda kompanııanyń alǵashqy zaýyty ornalasqan. Bastapqyda, naqtyraq aıtsaq, 1970 jyly osy zaýyttan aq-qara, sodan keıin túrli-tústi teledıdarlar qurastyrylyp, shyǵaryla bastaıdy. Alǵash ret osyndaı úlken jetistikke qol jetkizgennen beri kompanııa turmystyq tehnıka men elektronıka salasynda kósh bastap keledi. Kompanııanyń qarqyndy damýy jańa tehnologııalardy engizý jáne ártúrli turmystyq tehnıkany shyǵarýmen, joǵary tehnologııalyq elektronıkaǵa qaraı keńeıýmen qatar júrdi. Álemdik tehnologııa tarıhyndaǵy naǵyz sensasııa jedel jad chıpterin, SKD monıtorlaryn, jalpaq ekrandy teledıdarlardy jasaýmen tyǵyz baılanysty. Qazirgi ýaqytta Sývondaǵy bir kezdegi alaqandaı ǵana jerdi alyp jatqan zaýyt – úlken keshen, jumys isteýge jáne demalýǵa qajettiniń barlyǵy bar shaǵyn qala.
Árıne, kompanııanyń búkil syr-qupııasy saqtalǵan bul keshenderge bizdi kirgizgen joq. Bul qalashyqta jýrnalısterge esigin aıqara ashqan bir ǵana mekeme bar. Ol – SIM – Samsung Innovation Museum – Samsung ınnovasııalyq mýzeıi.
Mýzeıde qazaqstandyq BAQ ókilderin Samsung Electronics-tiń korporatıvtik vıse-prezıdenti Kım Hen dje myrza qarsy aldy. Alǵysózinde kompanııa ókili Pýsan qalasynda EKSPO-2030 Dúnıejúzilik kórmesin ótkizýdiń mańyzdylyǵy men tarıhı máninen keńinen toqtaldy.
«Árıne, biz Pýsan qalasynda EKSPO-2030 kórmesin ótkizýdi qoldaımyz. О́ıtkeni Koreıa da «Bolashaq energııasy» degen taqyryppen 2017 jyly Halyqaralyq mamandandyrylǵan kórme ótkizgen Qazaqstan sııaqty óz tájirıbesi men ınnovasııalaryn álemmen bólise alady dep sanaımyz», deıdi Kım Hen dje myrza. Al bizdiń «Koreıada kórmeni ótkizýdiń Samsýng úshin qandaı paıdasy bar?» degen suraǵymyzǵa kompanııanyń vıse-prezıdenti: «Samsung Electronics IT tehnologııalarynda tájirıbesi mol, jan-jaqty saraptamaǵa da ıe. Dúnıejúzilik EKSPO-2030 kórmesin elimizde ótkizý arqyly korporasııa jahandyq qoǵamnyń damýyna óz úlken úlesin qosyp, ózindik qoltańbasyn qaldyrýǵa múmkindik alady. Al bul maqsatty júzege asyrýda Samsung ónimderi men qyzmetterin kórsete alatyn tamasha alań bolyp sanalady. Sebebi bul – bizdiń basty mıssııamyz»», dep jaýap berdi.
Samsung-tiń týǵan jeri – Sývonda oryn tepken mýzeı alyp keshenniń 5-qabatty ǵımaratynda ornalasqan. Munda elektrondyq ınnovasııalar tarıhyndaǵy eń úzdik úlgiler usynylǵan. Mýzeı qyzmetkerleriniń ózderi bul ónertabystardy «adamzat ómirin jaqsartatyn ónimderdi damytýǵa jáne jetildirýge múmkindik beretin tehnologııa» dep tanystyrdy. Mýzeı tabaldyryǵyn attaǵan ár kelýshige adamzat órkenıetiniń qaıdan jáne qalaı ómirge kelgenin túsindirip qana qoımaıdy, ártúrli sanattaǵy Samsung ónimderin jasaý úderisinde qaıdan shabyt alǵanyn kórsetedi.
Aýdany 11 myń sharshy metrge jete ǵabyl mýzeıge kire salǵanda sizdi jyljymaly ekran retinde jabdyqtalǵan tanystyrý qabyrǵasy qarsy alady. Úlkendigi ekiqabatty úıdeı bolatyn ekrannan kórsetilgen kompanııa mıssııasy men tarıhy týraly beınebaıandy tamashalap turyp, ózińizdi quddy bir sol álemniń ishinde júrgendeı sezinesiz. Tek tanystyrylym aıaqtalǵannan keıin qabyrǵa birneshe bólikke jarylyp, aınalma esikke aınalǵanda ǵana ınnovasııalyq tehnologııalar mýzeıine kelgenińiz esińizge túsedi. Jalpy mýzeıge kelýshilerdi ishte osyndaı 30-dan astam ekran qarsy alady.
Mýzeıde kompanııanyń 200-ge jýyq ónertabysy men ónimi qoıylǵan. Bizdi tańǵaldyrǵan bir fakt – munda Samsung-ten bólek ózge de kompanııalardyń eksponattary kezdesedi. Mysaly, eksponattardyń qatarynan alǵashqy Apple iPhone nemese Sony Trinitron teledıdaryn kezdestirdik. Mýzeı qyzmetkerleriniń aıtýynsha, dál osy ónimder «Samsung-ke óz ónimderin damytýdyń jáne paıda tabýdyń senimdi jolyn kórsetip bergen». Iаǵnı bul da básekege qabiletti ortany qurýdyń bir joly dep túsingen durys bolar. Al mýzeıge qoıylǵan ónimder men olardyń damý tarıhyna súıensek, smartfondardyń qazirgi dáýiri Samsung Galaxy S II-den bastalady.
«О́nertapqyshtar dáýiri», «Indýstrıaldy ınnovasııalar ǵasyry» jáne «Qurý kezeńi» – mýzeıdiń úsh negizgi kórme zaly osylaı atalady. Iаǵnı kompanııa ónimderiniń tarıhy úsh negizgi taqyrypqa bólingen – «Innovasııa tuqymdary», «Innovasııanyń ózegi» jáne «Shabyttandyratyn ınnovasııa». Alǵashqy zalda elektr shamyn oılap tapqan Tomas Edıson, «telefonnyń túp atasy» Greıam Bell men elektr qozǵaltqyshynyń alǵashqy modelin jasap shyǵarǵan fızık Maıkl Faradeı ónertabystarynyń túpnusqa úlgileri saqtalǵan. Máselen, osy zaldaǵy ınteraktıvti móldir ekrannan 1875 jyly Aleksandr Greıam Bell jasaǵan telefondy kóre alasyz.
Ekinshi zalǵa Samsung pen ózge básekeles kompanııalardyń qyzyqty, biraq eski ónimderi qoıylǵan. Munda Samsung-ti turmystyq tehnıka bólimin qurýǵa shabyttandyrǵan Maytag elektr kir jýǵysh mashınasy men Hoover shańsorǵyshy da tabylady. Bul jerde, tipti ótken ǵasyrdyń tarıh enshisinde qalǵan kompanııanyń alǵashqy qalta telefondary, sonyń ishinde IBM Simon personal Communicator qalta kompıýteri, Samsung SCH-V200 kamerasy men Motorola Startac flıp-flopyn da keziktiresiń. 1999 jyly Samsung shyǵarǵan Watch Phone fýnksıonaldy saǵatyn taǵý bir kezderi Qazaqstanda da erekshe sán bolyp edi.
Tarıhı jádigerlerdiń arasynda Djon Logı Berd jasap shyǵarǵan, eń alǵash satylymǵa 1930 jyly shyqqan alǵashqy kommersııalyq teledıdar da bar. Al 1975 jyldan bastap shyqqan Econo aq-qara teledıdary Samsung-tiń energııa tıimdiligi arqasynda teledıdar naryǵyndaǵy alǵashqy sátti ónimderiniń biri atanǵan. Osylaısha, úsh jyldan keıin kompanııa Koreıa naryǵynyń 40 paıyzdan astamyn jaýlap úlgeredi. Al Samsung Galaxy S II 40 mıllıon danadan astam satylǵan kompanııanyń óte sátti smartfony bolyp sanalady.
Úshinshi zal Samsung kompanııasynyń B2B sheshimderi men «Aqyldy úı» sanatyndaǵy ónimderine arnalǵan. Ońtústik Koreıanyń jetekshi kompanııasynyń tarıhy men fılosofııasy týraly syr shertetin tarıhı zal, ár eksponat týraly aqparat beretin móldir, ınteraktıvti ekrandar, 4K ajyratymdy jáne 180° kórinisi bar áserli panoramalyq ekran – osynyń barlyǵy Samsung-tiń ınnovasııalar arqyly álemdi qalaı jaqsarta túskeni týraly syr shertedi. Sol sebepti de bolar SIM mektep oqýshylary ekskýrsııa jasaıtyn jaı ǵana mýzeı emes, búkil koreı ultynyń maqtanyshyna aınalǵan meken bolyp sanalady. О́ıtkeni munda tehnologııa áleminiń ótkeni men búgini ǵana beınelenbeıdi, munda tutas bir el tarıhynyń júrip ótkeni dańǵyl joly jatyr.
TÚIIN. Búginde Samsung korporasııasynyń 300 myńdaı qyzmetkeri álemniń 70-ten astam elinde jumys isteıdi. Qurylǵan sátten bastap búgingi kúnge deıin bir ǵana fılosofııany ustanyp kele jatqan brend «Álemdi jaqsartýǵa kómektesetin taýarlar men qyzmetterdi óndirý» deıtin baǵytynan alshaqtap ketken emes. «Bul maqsatqa jetý úshin tehnologııalyq jáne adamı resýrstardy paıdalaný qajet», deıdi korporasııa ákimshiligi. Al ony júzege asyrý úshin qyzmetkerlerdiń biliktiligin únemi arttyryp, olarǵa jaqsy eńbek jaǵdaıyn jasaý, talantty mamandardy izdeý ári qatarǵa qosý – mine, tarıhy shaǵyn ǵana otbasylyq kásiporynnan bastalyp, sanaýly jylda transulttyq korporasııaǵa aınalǵan Samsung-tiń basty kodeksi osyndaı.
ASTANA – SEÝL – PÝSAN – ASTANA
