Komıtet tóraǵasy Muhtar Qul-Muhammed dóńgelek ústelde Qazaqstan armııasynda áskerı qyzmetshilerdiń qaza bolýynyń jıilep ketkenine Memleket basshysy nazar aýdaryp otyrǵanyn atap ótti.
Senator qalyptasqan jaǵdaıǵa baqylaý jasaýdy kúsheıtý jáne áskerı qyzmetshilerdiń qordalanǵan kúrdeli máselelerin sheshýde birlesken kúsh-jigerge qarqyn berýdiń mańyzdylyǵyn atap ótti.
«Bul oqıǵalardyń sebepterin anyqtap alyp, áskerdegi áskerı qyzmetshilerdiń zańsyz áreketterin joıý kerek. Aldaǵy ýaqytta mundaı keleńsiz kórinisterdiń aldyn alý úshin zańnamalyq deńgeıde sharalar qabyldaý qajet», dedi Muhtar Qul-Muhammed.
Senator Sergeı Ershov otyrys barysynda taǵy bir máseleni qozǵady. Depýtattyń aıtýynsha, qazir kelisimshart boıynsha qyzmet etetin áskerı qyzmetshilerdiń elimizdiń qarýly kúshterinen jappaı ketýi tirkelýde. Kelisimshart boıynsha qyzmet etetin áskerı qyzmetshiler Qarýly kúshterdiń jalpy sanynyń 70 paıyzyn quraıdy. Senator tıisti áleýmettik qoldaýdyń joqtyǵy men jalaqynyń tómendigi osyndaı jaǵdaıdyń oryn alýyna sebep dep esepteıdi.
«Álemdegi turaqsyz geosaıası jaǵdaı men kadr áleýetiniń ulǵaıýy qaýpin eskere otyryp, áskerı qyzmetshilerdiń áleýmettik qamsyzdandyrý deńgeıin arttyrý kerek dep sanaımyn. Memleket basshysy 2019 jylǵy 1 qyrkúıekte Parlament palatalarynyń birlesken otyrysynda sóılegen sózinde áskerı qyzmettiń bedelin arttyrýdy, Qarýly Kúshterdi materıaldyq túrde jaraqtandyrý jáne Otanyna adal, kásibı daıyndyqtan ótken ofıserler men áskerı qyzmetshiler quramymen qamtamasyz etý qajettigin atap ótti», dedi senator Ershov.
Elimizdiń bas áskerı prokýrory Dastan Sekenov, qorǵanys mınıstriniń orynbasary Sultan Kamaletdınov, densaýlyq saqtaý mınıstriniń orynbasary Beıbit Esenbaev jáne taǵy basqa sóz alǵandar da Qarýly kúshter salasyndaǵy jaǵdaıdy jaqsartý jóninde usynys aıtty.
