Eýrazııalyq odaq qurylýymen Qazaqstan damý strategııasyn teksere alady

ASTANA. 28 mamyr. Eýrazııalyq odaqtyń qurylýy arqyly Qazaqstan damý strategııasynyń durystyǵyn taǵy bir márte teksere alady. Bul týraly BNews.kz tilshisine bergen suhabynda Parlamenti Májilisiniń depýtaty Aıgúl Soloveva málimdedi. «Eýrazııalyq odaq qurý aıasynda bolyp jatqan jaıttar Qazaqstanǵa damý strategııalarynyń durystyǵyn taǵy bir márte tekserýge, Eýrazııalyq keńistiktegi jahandyq jáne aımaqtyq múddeler toǵysynda óz ornyn aıqyndaýǵa múmkindik beredi. Búgingi kúni Kedendik odaq pen Biryńǵaı ekonomıkalyq keńistik aıasyndaǵy yqpaldastyq prosesteriniń jaı-kúıi men bolashaǵy, sondaı-aq qol jetkizilgen kelisimderdiń negizgi máseleleri talqylandy. Ásirese, kásipkerlik qyzmettiń básekege qabilettiligi jáne bıznesti damytý úshin qolaıly jaǵdaı jasaý aıasyndaǵy áńgimeler pysyqtaldy. Sarapshylar aýqymdy is tyndyrdy jáne eýrazııalyq ekonomıkalyq yqpaldastyqqa tartylǵan taraptar úshin ózara tıimdi tustaryn aıqyndaýda suraq týdyrǵan daýly máseleler boıynsha ortaq sheshimge kelý joldary izdestirilýde», - dedi Aıgúl Soloveva. Depýtat sondaı-aq ıntegrasııalyq prosesster aıasynda Memleket basshysy qol qoıǵan «Shaǵyn jáne orta kásipkerlik qyzmet úshin jaǵdaıdy jaqsartý jónindegi túbegeıli sharalar týraly» jarlyǵynda kórsetilgen tapsyrmalardy júzege asyrý aıasynda áli de sheshimin tabýy tıis aýqymdy jumystar bar ekenin atap ótti. Osy qujatta bızneske tekserý júrgizý sharalaryna moratorıı jarııalanyp, shaǵyn jáne orta kásipkerlik sýbektilerin taratý sharalaryn jeńildetý, memlekettik qadaǵalaý men baqylaýdy júzege asyrýda tekserýge jatatyn talaptar sanyn qysqartý jaǵdaıy qarastyrylǵan. Murat Aıtqoja. Derekkóz: BNews.kz. Foto: BNews.kz.