Jyldaǵy dástúrge saı, bıylǵy rásimge de sarbazdar úlken daıyndyqpen keldi. Bul rette er azamattardyń ómirinde bir-aq ret bolatyn mańyzdy oqıǵa – Otanyna adal qyzmet etýge ant beretin sát týdy.
Osy jyldyń kúzinde ásker sapyna shaqyrylǵan sarbazdardyń arasynda áskerden keıin Shekara qyzmetinde qalyp, áskerı qyzmetin kelisimshart negizinde jalǵastyrǵysy keletinder az emes. Ant qabyldaýshylardyń arasynan UQK Shekara akademııasyna oqýǵa túsip, bolashaqtaryn el shebimen baılanystyrǵysy keletin sarbazdar da bar.
Ant qabyldaý rásimi UQK Shekara qyzmeti Almaty oblysy boıynsha departamentiniń bastyǵy polkovnık Álibek Kaıýpovtyń buıryǵymen ashyldy.
Aıtýly sharaǵa ata-analarmen birge Shekara qyzmetiniń ardagerleri de qatysyp, jas sarbazdardyń aldaǵy qyzmetterine sáttilik tiledi. Shekaranyń shetine jaýdyń tabanyn tıgizbeý úshin «kún otyrmaǵan, tún uıyqtamaǵan» Tonykók bastaǵan batyr babalarymyzdyń izbasarlary – shekarashylar ekenin aıta kelip, «Otan qorǵaýshy» degen qasterli mamandyqqa syzat túsirmeýge shaqyrdy.
Mańyzdy sharanyń sońynda shekara basqarmasynyń arnaýly maqsattaǵy utqyr is-qımyldar tobynyń saıypqyrandary qalyń jurtshylyqtyń nazaryna shekara buzýshylardy quryqtaý operasııasynan sahnalyq kórsetilim usyndy. Sondaı-aq saıdyń tasyndaı iriktelgen áskerı qyzmetshiler qoıan-qoltyq urystan tamasha óner kórsetti.
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi
