Hat qorjyn

OQYRMAN ...alǵys aıtady Emi shıpa elgezek jandar Elbasymyz Nursultan Nazar­baev aıtqan: «Jastar – eli­mizdiń bolashaǵy», degen ulaǵatty sózine naqtylaı isimen jaýap berip kele jatqan «Respýblıkalyq balalardy ońaltý ortalyǵy» AQ ujymyna rızashylyǵymdy bildiremin. Osy mekemeniń «Qam­qor» bólimine ulymdy arnaıy dıagnozymen em qabyldaýǵa ákel­gen bolatynmyn. Kelgen kún­nen bastap bólim meńgerýshisi Gúl­jan Orynbaıqyzy bastaǵan ujym dárigerleri jyly júzben qabyl­dap, emdelýge kelgenderdi naý­qastaryna qaraı dárigerlerge bólip berip, emdeýdi birden bastap ketti. Meniń ulymdy emdeýdi dáriger Gúldana Hasenovaǵa tapsyrǵan bolatyn. Kúndelikti júıeli emdeýdiń arqasynda az kúnniń ózinde ulymnyń densaýlyǵynda kóńilge qonarlyqtaı ońalý baıqalýda. Emdelýshi balalarǵa em qabyldaýdan bosaǵan soń kúndelikti túrli mádenı sharalar ótkizilip, balalardyń týǵan kúnderi atalyp, syılyqtar berilip, konserttik qoıylymdar kórsetiledi. Bul rette tárbıeshilerdiń eńbegi zor. Budan basqa Astana qalasyndaǵy joǵary oqý oryndary stýdentteriniń uıymdastyrylýymen qaıy­rymdylyq konsertteri de ótkizildi. Osy ıgi sharalardyń uıym­das­tyrýshysy, «Qamqor» bóliminiń meńgerýshisi Gúljan Iskanovaǵa, top dárigerleri – Gúldana Ha­se­nova, Janat Tursynbekova, Al­magúl Álimjanova, Jadyra Ýaq­baeva, Elmıra Janǵozıeva, LFK dárigeri Azamat Estaev, aǵa medbıke Álııa Aıýpova jáne jalpy bólim qyzmetkerlerine zor alǵysymdy bildiremin. Ýálı QAIYSOV. ShYMKENT. ...usynysyn jetkizedi Til – tuǵyrymyz Til – halyqtyń jany, ulttyq bolmystyń negizi desek, ol arqyly halyqtyń dinin, mádenıetin, dás­túrin tanyp bilýge bolady. Qazaq tili – halqymyzdyń tarıhı shejiresi, búgini men erteńi, armany men úmiti. Tilimiz ata-babamyzdyń tarıhı bolmysy bolsa, búgingi jáne erteńgi urpaqtyń týǵan eline, jerine degen úmit artar senimi. Elbasymyz «Qazaq tili – Qazaqstannyń bolashaǵy» dep tegin aıtpasa kerek. Bul sózdiń astarynda tereń maǵyna jatyr. Osy rette men latyn álipbıine kóshý degen máseleni durystap qol­ǵa alyp qarastyrǵan abzal dep bilemin. Sebebi, barlyq memleketter latyn álipbıin qol­dan­ǵandyqtan, birin-birin ońaı ári tez túsinedi dep oılaımyn. Bul álipbıge kóshý birqatar úlken múm­kindikterge qol jetkizbek. Birin­shiden, qazaq tiliniń orfo­epııalyq jáne orfografııalyq júıe­si du­rys­talsa, ekinshiden, halyq­ara­lyq aqparattyq júıege erkin enýge múmkindik týmaq. Sondyqtan da, bul másele jiti kóńil bólýdi qajet etedi. Gúljan OZYQBAEVA, qazaq tili men ádebıeti pánderiniń muǵalimi. Ońtústik Qazaqstan oblysy, Otyrar aýdany, Shytty aýyly. ...ótinish aıtady Elektr jelisine zárýmiz Atyraý oblysy, Mahambet aýdany, Taldykól aýylynyń turǵyndary sharasyzdyqtan sizderge hat joldaýǵa májbúr bolyp otyrmyz. Biz atalǵan aýylǵa 2006 jyldan bastap kóship kelgen onshaqty úı turǵyndary aýyldyń bir shetinen zańdy túrde jer alyp, baspana salyp edik. 2011 jyly óz qarajatymyzǵa 600 metr qashyqtyqtan gaz jelisin tartyp aldyq. Aýyzsýdy qudyqqa avtokólikpen quıdyryp alyp otyrmyz. Endi bizge úlken qıyndyq týdyryp otyrǵany – elektr qýatyn tutyna almaı otyrǵanymyz. Aýdan ákimine biraz jyldar boıy ótinish jasap, «Nur Otan» partııasynyń basshylaryna da baryp, aqyrynda 2011 jyly oblys ákimshiligine hat jazǵan edik. Nátıjesinde, aýdan ákimshiliginen 2011-2013 jyldary elektr jelisine qosylady degen jaýap alsaq, al okrýg ákimi bıyl da elektr jelisine qosylmaıtyndyǵymyzdy aıtyp otyr. Gaz qubyryn da júrgizý máselesi sheshilmegen soń, aqyrynda nesıe alyp ózimiz sheshýge májbúr boldyq. Al elektr júıesin óz qarajatymyzǵa júrgizýge jaǵdaıymyz kótermeıdi. Qarajattyń jetispeýshiligi ákimderdi óz ýádelerinen taıýǵa májbúrlep otyrǵanyn túsinemiz, biraq bizdiń de jaǵdaıymyzdy túsinse eken deımiz. Tehnıka, kompıýter damyǵan zamanda 7 jyldan asa ýaqyt jaryqsyz, maıshammen otyrmyz. Tońazytqysh, teledıdar degenderdiń ıgiligin kóre almaı otyrǵanymyzǵa ishimiz ashıdy. Ýáde berilgen 2013 jyldy kútip úmittenip edik, ol úmitimiz úzilip, aqyry sizderge osy hatty jazýdy uıǵardyq. Sizderden osy ótinishimizdiń oryndalýyna, ıaǵnı bıyldan qaldyrmaı Taldykól aýy­lyna jańadan qonystanǵan on shaqty úıdi elektr jelisine qosýǵa yqpal etýlerińizdi suraımyz. Taldykól aýylynyń turǵyndary atynan Ernar IZJANOV. Atyraý oblysy, Mahambet aýdany, Taldykól aýyly. ...saqtandyrady Agent – altyn ýaqyt jaýy Qazirgi aqparattyń damyǵan zamanynda jasty da, jasamys­ty da óz yqpalyna eriksiz tartyp áketetin «agent» degenniń shyqqanynan barlyǵymyz da habardarmyz. Biz, ásirese, jastar agentke kirmesek – «asyl zatymyz» urlanǵandaı kúıde bolamyz. Rasynda, sol «asylymyz» urlanyp jatyr. Ol – altyn ýaqytymyz. Agent bizdiń azyǵymyz da, asylymyz da emes. Kúnine sol agenttiń 1 saǵatyn bıylǵy mektep bitirýshi túlekter UBT-nyń 10 suraǵyn jattaýǵa arnasaq, ózimizdiń bolashaǵymyzǵa jasap jatqan mol úlesimiz bolar edi. Elimizdiń bolashaǵy bizdiń ıaǵnı jastardyń qolynda. Qazaq elin ósiretin bizder jastarmyz. Qymbatty qurbylarym, bul ǵasyr báseke ǵasyry. Qazaqstan jastary básekege qabiletti, jigerli bolýy úshin de bilimge qazirden den qoıǵan abzal. Aıjamal BATYRHAN, 11-synyp oqýshysy. Qyzylorda oblysy, Shıeli aýdany, Eńbekshi aýyly. ... rızashylyq bildiredi Úlkenge izet, kishige qurmet «Jas kúnimde beınet ber, qartaıǵanda zeınet ber» deıdi halyq danalyǵy. Búginde jasymyz toqsannan asqan qos qarııaǵa osy baqyt buıyrypty. Astana qalasyndaǵy tıisti mekeme bizge Qostanaıdaǵy «Sosnovyı bor» shıpajaıyna joldama berip, biz munda 14 kún boıy em-dom qabyldap, erekshe serpilip qaıttyq. Shıpajaı qonaqtaryna uıymdastyrý alqasy barlyq jaǵdaıdy jasapty. Tipti arasynda kóńildirek bolýy úshin oblystyq fılarmonııa ánshilerin shaqyryp, konsert te qoıyp berdi. Sondaı-aq, taǵy bir erekshelik, on shaqty múmkindigi shekteýli jandardy da osynda kezdestirdik. Buryndary múgedek jandardy bul jerden kezdestirmegen edim. Olarǵa jasalǵan taǵy bir jaqsylyq – arbalary júretin joldardyń bolýy der edik. Úlkenge izet, kishige qurmet kórsetýde shıpajaı basshylary jáne barlyq dárigerler men medbıkelerge, aspazdarǵa jumystaryna bereke, otbasylaryna amandyq tileımiz. Olarǵa degen atalyq aq tilegimizdi aǵa basylym «Egemen Qazaqstan» arqyly jetkizsek deımiz. Kámetaı TOQABAI, Seıitjan ESILOV, Uly Otan soǵysynyń ardagerleri. ASTANA.