Bilim kóginde – 80 jyl!

Alataýdyń etegindegi stýdentter qalashyǵynda ál-Farabı atyndaǵy Qazaq ulttyq ýnıversıteti óziniń 80 jyldyq mereıtoıyn úlken sán-saltanatpen atap ótti. Bilim darııasynda jelkenin jaıǵan bul oqý orny óziniń ǵasyrǵa jýyq ǵumyrynda Qazaq eline eren eńbek sińirgen talaı alyptardy tárbıelep shyqty. Qara shańyraqtyń mereıli merekesine Joǵarǵy Sot Tóraǵasy Qaırat Mámı, Bilim jáne ǵylym mınıstri Aslan Sárinjipov, Konstı­týsııalyq Keńes Tóraǵa­sy Igor Rogov, sonymen qatar, Má­jilis depýtattary men osy oqý ornyn támamdap, búginde mem­le­ket­tik qyzmette júrgen birqatar belgili tulǵalar Astanadan arnaıy keldi. Merekelik shara stýdentterge qyzmet kórsetetin «Keremet» jan-jaqty jabdyqtalǵan keshenin ashý saltanatynan bastaldy. Aıta ketý kerek, stýdentterdiń áleýmettik-turmys jaǵdaıynyń barlyǵyna yqpal etetin «Keremet» ortalyǵy – TMD elderinde buryn-sońdy bolmaǵan joba. Bul jerde stýdentter qajetti qujattaryn resimdeýge, zańgerler men bilikti mamandardyń keńesine júginýge, qyzmetke ornalasý úshin qujat tapsyrýǵa, tipti, medısınalyq kómek, ınternet-kafe, ushaq jáne temirjol kassalary, kınoteatr, kıim-keshekti hımııalyq tazalaý, shaǵyn sýpermarket sekildi asa qajetti qyzmettiń barlyq túrine qoljetimdi. Táýligine bir­neshe myń stýdentke qyzmet kórse­týge múmkindigi bar bul ortalyq búgingi jas shákirtterdiń barlyq muqtajdyqtaryn óteý úshin óz jumysyn bastap ketti. О́.Joldasbekov atyndaǵy stý­dentter saraıynda ál-Fa­rabı atyndaǵy Qazaq ulttyq ýnı­ver­sıtetiniń 80 jyldyǵyn atap ótý aıasynda «QazUÝ túlek­teri­niń forýmy» bolyp ótti. Oǵan jo­ǵaryda atalǵan qurmetti qonaq­tarmen qatar, qala ákimi Ahmet­jan Esimov, QazUÝ rektory Ǵa­lymqaıyr Mutanov, Májilis depýtaty Qýanysh Sultanov, sondaı-aq, elimizdegi irgeli oqý oryndarynyń rektorlary men memleket jáne qoǵam qaıratkerleri, bıznes elıta ókilderi, Olımpıada chempıondary men zııaly qaýym ókilderi qatysty. Merekelik saltanatty keshti Ǵ.Mutanov quttyqtaý sózimen ashyp, odan keıin A.Esimov Qazaq­stan Prezıdenti Nursultan Nazar­baevtyń quttyqtaý hatyn oqyp berdi. Elbasy joldaǵan hatta ál-Farabı atyndaǵy ýnıversıtettiń qazaq qoǵamyna, ǵylymy men bilimine, sonymen qatar, rýhanı-mádenı qazynasyna qosqan ólsheýsiz úlesi, atalǵan shańyraqtan túlegen bilikti mamandardyń el ekonomıkasy men damýyna úlken úles qosyp kele jatqandyǵy aıtylǵan. Joǵarǵy Sot Tóraǵasy ári ál-Farabı atyndaǵy Qazaq ulttyq ýnıversıteti túlekteri qaýymdastyǵynyń prezıdenti Q.Mámı óz sózinde ýnıversıtet túlekteri elimizdiń mańyzdy salalarynda ǵana emes, alys-jaqyn shetelderdiń ǵylymı ortasynda eńbek etip, el abyroıy men keleshegi úshin aıanbaı azamattyq boryshyn ótep júrgenin aıta kelip, ózi jetekshilik etetin qaýymdastyq taǵaıyndaǵan arnaýly stıpendııany ǵylymı olımpıadalar men keńesterde úzdik tanylǵan jas ǵalymdarǵa, ýnıversıtet shákirtterine tabys etti. Qanat ESKENDIR, «Egemen Qazaqstan».