EAEO bolashaq úshin quryldy

Keshe Ortalyq kommýnıkasııalar qyzmetinde ótken brıfıngte reseılik sarapshylar qazaqstandyq jýrnalısterdiń birqatar suraqtaryna jaýap berdi. Sarapshylar qata­ryn­da RǴA Ekonomıka ınstıtýty post­keńestik elderdiń ekonomıkasy damýyn zertteý sektorynyń bas­shysy Elena Kýzmına, RF Úkimeti janyndaǵy Saraptamalyq orta­lyq­tyń saraptamalyq-ǵylymı jumys­tardy baqylaý bóliminiń basshysy Aleksandr Konkov, «Saıası konıýnktýra ortalyǵynyń» saraptamashysy, saıasattaný ǵylymdarynyń kandıdaty Evgenııa Mahmýtova qatysty. Úsh saraptamashy óz taraptarynan Eýrazııalyq ekonomıkalyq odaqtyń kópshilik qyzyqtyrǵan tustaryn taldaı ashyp, pikirlerimen bólisti. Qurylǵan Eýrazııalyq ekonomıkalyq odaqtyń bolashaǵyna qatysty, sondaı-aq odaq shtabynyń qarjylyq jáne basqa da shtabtarynyń úsh elde ornalasýyna baılanysty qoıylǵan suraqtarǵa qatysty jaýap berdi. Elena Kýzmına odaqqa kez kelgen eldiń kirýine shekara ashyqtyǵyn jetkizip, bul máselede eń aldymen postkeńestik keńistiktegi elderdi aıtyp ótti. «Jalpy EAEO-ǵa túrli formattarda kirýge bolady. Ol úshin odaqqa kirýge múddeli el ekonomıkasyn, qarjy júıesin daıyndaýy tıis. Ekinshi jol, memleketter tobymen erkin saýda aımaǵy týraly kelisim. Bul óte perspektıvaly jol. Osyndaı kelisimge qol qoıýdy aıaqtaý kezeńinde Vetnam tur», dedi ol. Jalpy sarapshynyń pikirinshe, ózge memleketter tarapynan EAEO aıasyndaǵy yntymaqtastyqqa qyzyǵýshylyq artýda. Al A.Konkov ózine baǵyttalǵan Reseıge qatysty saýalǵa oraı EO men AQSh qoldanyp jatqan ekonomıkalyq sharalar EAEO qyzmetine esh áser etpeıdi, dep jaýap berdi. Onyń aıtýynsha, EAEO DSU erejelerine sáıkes qalyptasqan. «Saıası konıýnk­týra ortalyǵynyń» saraptamashysy, saıasattaný ǵylymdarynyń kandıdaty E.Mahmýtova «Reseı azamattaryna qatysty salynyp jatqan ekonomıkalyq sanksııalardyń maqsattarynyń biri – EAEO ishinde turaqsyzdyq engizý, eýropalyq ınvestorlar tarapynan oǵan degen senimdi joıý. Sondyqtan olardyń mańyzyn asyra aıtpas edim, EAEO-daǵy kásipkerlerdiń ózi osy sharalardy engizýge kúdikpen qaraıdy. Sebebi jaǵdaı osy sanksııalarǵa jaýap retinde qoldanylatyn sharalarǵa baılanysty bolady», – dep túsindirdi. Al sarapshylardyń pikirinshe, qarjylyq retteýshi organnyń Almaty qalasynda ornalasýynyń ózindik máni bar. О́ıtkeni, bul EAEO-nyń mańyzdy fýnksııalarynyń biri bolyp tabylady. Venera TÚGELBAI, «Egemen Qazaqstan».