Astana qalasyndaǵy Táýelsizdik saraıynda 2022 jyldyń 26 qarashasynda ótken ulyqtaý rásiminde sóılegen sózinde Qasym-Jomart Toqaev: «Halyqtyń senimi – eń qundy nárse. Saılaý nátıjesin halqymyzdyń saıası baǵdaryma – baǵasy, aldaǵy josparyma batasy dep qabyldaımyn!» degen bir aýyz sózimen óz qadamyn halyqtyń seniminen artyq, el senimin esh nársemen ólsheý múmkin emestigin alǵa tarta otyryp, ózi de senimdi jáne halqyn da sendire otyryp, bolashaqqa qadam jasadyq.
Alda – jeti jyl. Bul – Qasym-Jomart Toqaevtyń Qazaq eline Prezıdent retinde qyzmet kórsetýiniń merzimi. Saılaý aldynda, naqtylap aıtsaq, 2022 jylǵy 16 qarashada Almaty qalasy jurtshylyǵymen kezdesýinde Qasym-Jomart Toqaev: «Meniń túsinigimde, Prezıdent – jaldamaly menedjer, halyq onymen belgili bir merzimge kelisimshart jasaıdy. Azamattardyń erkin tańdaýynyń nátıjesinde eldegi eń joǵary memlekettik laýazymǵa ıe bolǵan adam mıllıondaǵan otandastarynyń daýysymen bekitilgen kelisimshartqa qol qoıady. Sondyqtan Prezıdenttiń laýazymy – artyqshylyqtan buryn zor jaýapkershilik. Bul qyzmetti atqarǵan jáne atqaratyn árbir adam eń qatal úsh sottyń – halyqtyń, tarıhtyń jáne óz ar-ujdanynyń aldynda jaýap beredi», degen edi. Memleket basshysynyń osy bir aıtqanynda tereń mán bar ekendigine oı júgirtsek eken.
Halqynyń, tarıhtyń jáne óziniń ar-ujdanynyń aldyndaǵy jaýapkershilikti bir sezingen adam bolsa, ol Qasym-Jomart Toqaevtaı bolsa etti. Keshegi Qańtar oqıǵasy kezinde basyn báıgege tikkeni jáne de Táýelsizdik taǵdyry úshin batyl sheshim qabyldaı otyryp, eldikti saqtap qalǵandyǵy bólek áńgime. Al endi Qazaqstan qoǵamyn shyn nıetimen demokratııalandyrý, ádil de adal qoǵam ornatý, prezıdenttik bılikti monopolııalandyrmaý, zań ústemdigin qamtamasyz etý sııaqty búgingi kúnniń ańsarly múddesin júzege asyrýǵa batyl qadam jasaýyn halyq pen tarıh aldyndaǵy jaýapkershilikti óz moınyna alǵany dep túsinemiz.
Ulyqtaý rásimindegi sózinde Prezıdentimiz zań men tártip ústemdik quratyn, azamattardyń quqyǵyna laıyqty qurmet kórsetiletin Ádiletti Qazaqstan qurý bizdiń ortaq maqsatymyz ekendigin atap kórsetti. Bizdiń qoǵam zań men tártiptiń ústemdik qurýyna shóldep otyrǵany anyq. Bul oraıda Qasym-Jomart Toqaevtyń óz bastamasymen, usynysymen jalpyhalyqtyq referendým arqyly konstıtýsııalyq ózgeristerdiń jasalýy jańa da ádiletti Qazaqstan qurýdyń basy bolsa kerek.
Endi Qasym-Jomart Toqaevtyń málimdeýinshe, bilim berý isinen bastap ındýstrııalandyrýǵa deıin qoǵamnyń barlyq salasyn jańǵyrtý memlekettik saıasattyń negizgi baǵyty bolmaqshy. Demek qoǵam aldynda eń áýeli bilim berýdi jetildirý jáne sol bilimdi osy zamanǵy ozyq úlgide uıymdastyra bilýge umtylý mindeti tur. Qazirgi ýaqytta Qazaqstanda tehnıkalyq bilim berý baǵytyna basymdyq berilýde. Biraz joǵary oqý oryndary bazasynda ózge memleketterdiń tehnıkalyq mamandaryn daıarlaý bastalyp ta ketti. Jáne de Prezıdenttiń pármenimen jańa mektepter salý, stýdentterdi jataqhanamen qamtamasyz etý máselesine de úlken mán berilip otyrǵanyn eskersek, biz bilimdi urpaq ósirý arqyly bilimdi ult qalyptastyrýdy basty nysana etýimiz kerek.
Bilimdi ult qalyptastyra otyryp, elimizdiń uzaq merzimdi ekonomıkalyq ósiminiń negizin jańa tehnologııalar, joǵary eńbek ónimdiligi arqyly damytý jónindegi Prezıdent alǵa qoıyp otyrǵan mindettiń elimizdi órkendetýdiń sheshýshi tetigi ekendigin tereń paıymdaý arqyly biz endigi arada eńbekqor ult bolyp qalyptasýǵa zor yntamen umtylýǵa tıistimiz ǵoı dep oılaımyz.
Eldiń óz bolashaǵyna degen senimi de berik bolǵany jón. Biz muny nege aıtyp otyrmyz. О́ıtkeni Qasym-Jomart Toqaevtyń óziniń Ulyqtaý rásiminde: «Shynaıy zań ústemdigin qamtamasyz etpeı, ádiletti ári naryqtyq ekonomıkany qurý, jeke menshikti qorǵaý, básekelestikti damytý, sybaılas jemqorlyqty joıý múmkin emes. Sondyqtan zań aldynda báriniń teń bolýy – memleketimizdiń uzaq merzimdi damýynyń negizgi sharty», dep atap kórsetýi memleketimizdiń basty ustanymy ekendigine ılanamyz.
Ulyqtaýdan keıin Prezıdent birden aýyldy órkendetý jáne shetelderge zańsyz shyǵarylǵan aktıvter men qarjylardy qaıtarý jónindegi jarlyqtarǵa qol qoıdy. Bular uzaq jyldardan beri halqymyz aıtyp kele jatqanymen, eshkimge qulaq asyra almaǵan ózekti de tolǵaqty máseleler bolatyn. Aýyldy órkendetý eńbek etýdi qajet etedi. Aýyldy órkendetý jańa tehnologııany qajet etedi. Eńbek pen tehnologııany ushtastyra bilsek, sóz joq, sharýamyzdyń ilgeri basary anyq.
Qazirgi ýaqytta álemde azyq-túliktiń jetispeýshiligi jyl saıyn aıqyn baıqalyp otyr. Bul másele BUU Bas Assambleıasynyń da minberinen sóz bolyp júr. Sondyqtan da Prezıdent elimizdiń azyq-túlik qaýipsizdigin qamtamasyz etý máselesin jıi qozǵap, aýyl sharýashylyǵy salasyn damytýǵa zor kóńil bólýi jáne de aýyldy damytýdy zańmen bekitýi bul salada úlken betburys jasalatynyna sendiredi.
«Babalarymyz qaı zamanda da birligin bárinen bıik qoıǵan. Biz ata jolyn saqtaı bilgen, zamanaýı jáne órkenıetti el ekenimizdi búkil dúnıe júzine pash ettik. Birligimizdiń bekemdigin taǵy da dáleldeı aldyq jáne de biz halyqtyń tilegi men zaman talabyna saı tıimdi memleket qurýǵa mindettimiz. Munyń mańyzdy tarıhı mindet ekendigin tereń túsine bilýimizdi elimizdiń búgini men bolashaǵy aldyndaǵy paryzymyz dep sanaımyz.
«Shyn máninde, elimiz aman bolsa, jerimiz bútin, birligimiz bekem, memlekettiligimiz máńgi bolady. Osy qundylyqtardy myzǵymastaı etip bekitý – qazaqtyń perzenti, Qazaqstannyń Prezıdenti retindegi meniń qasıetti paryzym», degen Qasym-Jomart Toqaevtyń «qyzmetti – ýaqytsha, al halyqty – máńgi» dep túsinýi jáne sol oıyn ashyq málimdeýi adal da ádiletti qoǵam ornatýǵa bastaıtyn mańyzdy ári basty qaǵıdat bolsa kerek. Jáne de «Men prezıdenttik mıssııamdy halqymmen birge aldaǵy jeti jylda abyroımen atqaryp shyǵamyn dep senemin. Bizdiń Otanymyz – bir, memleketimiz – bir, halqymyz – bir! Sondyqtan árqashan birge bolaıyq, aǵaıyn!» degen prezıdenttik te perzenttik oı-múddesi ámanda halqymyzdy jaqsy da jarqyn kúnderge bastaı bersin.
Jabal ERǴALIEV,
Qazaqstannyń eńbek sińirgen qaıratkeri, Senatorlar keńesiniń múshesi
KО́KShETAÝ
