Qorjynymyz júldemen qomaqty

Jeksenbi kúni Qaraǵandyda velosporttan ótken Azııa chempıonaty márege jetti. Osy synda Qazaqstan quramasy 7 altyn júldege ıe boldy. Sóıtip, jaqynda Astanada aıaqtalǵan qurlyqtyq dodany eseptegende ulttyq qurama barlyǵy 11 altyn medaldi jeńip aldy. Jarystyń sońǵy kúni Rýslan Tileýbaev, Maksım Iglınskıı men Dmıtrıı Grýzdev tas joldaǵy toptyq jarysta barlyq medaldardy ıelendi. Olar 204,1 km ar­nalǵan synda top jardy. Bul Azııa chempıonatyndaǵy eń qıyn qashyqtyqtaǵy jarys bolyp esepteledi. Osy báıgede oza shapqan veloshabandozdarymyz jarysqa qatysqan 18 eldiń 77 sport­­shysynyń arasynan qara úzip, márege birinshi jetti. Sóıtip, osy kúni Qazaqstan quramasy altyn medaldar sanymen birinshi oryn aldy. Al jalpy júldeler sany boıynsha elimiz 32 medaldi ıelengen Ońtústik Koreıa quramasyn alǵa jiberip, ekinshi orynǵa ıe boldy. Bizdiń komanda Azııa dodasynda 22 medaldi enshiledi. Jalpy, bıylǵy Azııa chempıonaty jaqsy deńgeıde ótti deýge bolady. As­tana­da­ǵy jarysta otandas­tary­myz 4 altyn júlde alsa, Qaraǵandy tas joldarynda 7 ret qurmet tuǵyrynyń eń bıik satysyna kóterildi. Jarys kezinde qazaqstandyqtardan joǵaryda atalǵan sportshylardan basqa Vıktor Okıshev, Grıgorıı Shteın, áıelderden Nadejda Geneleva, Ekaterına Iýraıtıs chempıondyq ataqty ıelendi. Al ulttyq quramaǵa sońǵy kúnderi kúmis júldeni Evgenıı Gıdıch, Oleg Zemlıakov, qola medaldi Alekseı Voloshın men Maqsat Aıazbaev syılady. Osy kúnderi Qaraǵandyda tańerteń +4S, qatty jel soǵyp, jańbyr jaýsa da otandastarymyz namysty qoldan bermedi.  Aýa raıynyń qolaısyzdyǵyna qaramastan 45 km qashyqtyqqa, odan keıin 30 km qashyqtyqqa arnalǵan synda Dmıtrıı Grýzdev (erler) pen Vıktor Okıshev (ander) márege birinshi keldi. Odan keıin Qazaqstan quramasy bir kúnde bir qashyqtyqta ótken jarysta júldeli oryndardyń bárin aldy. 125 km arnalǵan synda Grıgorıı Shteın altyn medaldi, Evgenıı Gıdıch kúmis, Alekseı Voloshın qola júldeni ıelendi. Chempıonattyń sońǵy kún­deri Qazaqstan qurama­­­synyń jasóspirimderi de aǵalarynan qalys qalmady. Qyzdar arasynda 75 km qashyqtyqqa ar­nalǵan básekede Nadejda Geneleva top jarsa, 23 jas­qa deıingi jasóspirimder ara­syndaǵy 172,7 km toptyq jarysta Vadım Galeev máre syzyǵyn birinshi bolyp kesti. Oleg Zemlıakov ekinshi, Maqsat Aıazbaev úshinshi oryn aldy. Taǵy bir sportshymyz Baqtııar Qojataev márege besinshi bolyp jetti. Áıelder 125,6 km toptyq jarysta altyn júldege qol jetkize almady. Bul báıgede Qytaılyq Taıpeı sportshysy Meı Iý Hsıao birinshi oryndy, kúmis  medaldi Qytaılyq Sıangannyń ókili  Hsıao Iýan Dıao, qola júldeni koreıalyq Sangýn Gý ıemdendi. Dastan KENJALIN, «Egemen Qazaqstan».