Ǵylym • 02 Jeltoqsan, 2022

Jas ǵalymnyń jetistigi

410 ret

kórsetildi

2 mın

oqý úshin

L.N.Gýmılev atyndaǵy Eýrazııa ulttyq ýnıversıtetiniń magıstranty Kamıla Egizbek «Ǵylym» atalymy boıynsha «Daryn» memlekettik jastar syılyǵynyń laýreaty atandy. Jas ǵalym bıomedısına salasy jáne sý ortasyn tazartý úshin nanoqurylymdy temir bar materıaldardy qoldaný tehnologııasyn zerttep jatyr. Ol 15-ten astam ǵylymı jarııalanymnyń avtory, onyń ishinde 10 maqala ımpakt faktory joǵary halyqaralyq basylymdarda jarııalanǵan. Scopus bazasy boıynsha 23 jastaǵy ǵalymnyń Hırsh ındeksi 4-ke teń.

Egemen Qazaqstan

Kamıla fızıka-tehnıkalyq fakýltetinde ıadrolyq fızıka mamandyǵy boıynsha magıstratýranyń ekinshi kýrsynda oqıdy. Ol buǵan deıin EUÝ bakalavrıat deńgeıin osy bilim berý baǵdarlamasy boıynsha támamdaǵan.

Jas ǵalym 2015 jyldan beri nanoqurylymdy temir bar materıaldardy sý ortasyn tazartý jáne bıomedısınada katalızatorlardyń negizi retinde qoldanýdy zertteýmen belsendi aınalysyp keledi.

Zertteýdiń negizgi baǵyty sý ortasyn organıkalyq boıaǵyshtardan nemese aýyr metaldardan tazartý úshin katalızator retinde paıdalanylatyn magnıttik nanobólshekterdi alýdyń tehnologııalyq sheshimderine baǵyttalǵan. Olardy zııansyz komponentterge ydyratý nemese sińirý joldary qarastyrylyp otyr.

Kamıla Egizbek tazartý salasynda joǵary tıimdiligi bar shpınel tárizdi qurylymy bar serıı men gadolınıı qosylǵan temiri bar nanobólshekterdi alý ádisin oılap tapty. Sondaı-aq magıstrant sıntez jaǵdaılaryna baılanysty sıntezdelgen nanobólshekterdegi qurylymdyq erekshelikter men fazalyq ózgeristerge irgeli zertteýler júrgizedi.

EUÝ magıstranty «Bóbek» jalpyulttyq qozǵalysy» ZTB jáne BǴM «Memleket tarıhy ınstıtýty» MM uıymdastyrǵan «Úzdik jas ǵalym – 2020» jáne «Úzdik jas ǵalym – 2021» halyqaralyq jobalarynyń úsh márte jeńimpazy atanǵan.

Sonymen qatar Kamıla 2021 jyly elimizdiń ǵylymı ýnıversıtetteri arasynda stýdentterdiń úzdik ǵylymı-zertteý jumysy úshin I dárejeli dıplommen marapattalǵan.