«Avtoýragandy» aldaı almaısyń

Aqtóbelik polıseıler jyl basynan beri «Avtoýragan - P» jyljymaly kesheniniń kómegimen jol qozǵalysy erejelerin buzǵany úshin aıyppul tóleýden jaltaryp júrgen júrgizýshilerdi anyqtaýmen aınalysyp keledi. Oblystyq ishki ister departamenti baspasóz qyzmetiniń derekterine súıensek, olardyń memleketke jáne ekinshi deńgeıli bankterge jalpy tólenbegen bereshegi 200 mıllıon teńgege jýyqtapty. Oblystyq ishki ister depar­tamenti jańa jyldyń qarsańynda «Toıota Haıes» avtomashınasy bazasynda ornatylǵan «Avtoýragan-P» jyljymaly ke­shenin alǵan bolatyn. Bul tehnıka avtomashınalardyń memlekettik tirkeý nómiri belgisin kólik tasqynynda anyqtaı alady. Ol stasıonarlyq avtomatty jyldamdyq ólshegishter jumysynyń nátıjesinde aıyp­pul salynǵany týraly qaýly shy­ǵarylǵan júrgizýshiler derek­teri boıynsha tehnıkalyq qural­dardy retteıdi. Bul jol qoz­ǵalysy erejelerin buzýshy­lardan alynatyn aıyppul mól­sherin anaǵurlym arttyrýǵa yqpal etken. Sondaı-aq, keshen shekteýlerdiń ártúrli bazalary jáne jedel baǵdarlaý boıynsha kólik quraldaryn izdeýdi júzege asyrady. Osy kezge deıin «Avto­ýra­gan-P» jyljymaly ap­­pa­­rattyq-baǵdarlamalyq ke­sheni­­niń kómegimen 3309 avtokólik júrgizýshi tekserilip, olardyń 9-ynyń tehnıka quraldaryn jalǵan memlekettik tirkeý nómiri belgisimen júrgizip júrgeni, 35-iniń kólik quraldaryn júrgizý kýáliginen aıyrylǵany jáne 200 shoferdiń jol qozǵalysy erejelerin buzǵany anyqtalypty. Bul jol polısııasynyń jumysyn jeńildetýge kóp kómek eken. «Avtoýragannan» aıdaǵyshtardyń ózi aıylyn jıyp, tizginderin tejeýge úırene bastapty. Satybaldy SÁÝIRBAI, «Egemen Qazaqstan». Aqtóbe oblysy.