Konferensııa jumysyn asha otyryp, partııa tóraǵasy aldaǵy saılaý naýqany kezeńindegi partııalyqtardyń aldynda turǵan birqatar basym mindetti aıqyndap berdi.
«Saılaý ózgeshe saıası tártipte, jańa ereje boıynsha ótedi. Sondyqtan saılaý naýqanynyń strategııasyn qazirden daıyndap alýymyz qajet. О́tken prezıdenttik saılaý kezinde bizge halyqtan 51 myń usynys pen tilek kelip tústi. Sonyń 3 myńnan astamy Túrkistan oblysynyń halqynan jınaldy. Turǵyndardy jalaqynyń tómendigi, turǵyn úı máselesi, jumyssyzdyq qatty alańdatady. Sondyqtan atalǵan máseleler saılaýaldy tuǵyrnamada kórinis tabýy kerek», dedi partııa tóraǵasy.
Partııa tóraǵasy barlyq deńgeıdegi máslıhat depýtattaryn, bastaýysh partııa uıymdary men qoǵamdyq qabyldaý bólmelerin azamattardyń máselelerin sheshý úshin jumyldyrý mańyzdy ekenin atap ótti.
«Biz óz saılaýshylarymyzben jáne jaqtastarymyzben árdaıym tyǵyz baılanysta bolýymyz kerek. Partııa – el Prezıdentiniń qoǵamdyq tiregi. Onyń óńirlik jelileri de, Májilistegi jáne barlyq deńgeıdegi máslıhattardaǵy depýtattar sany da kóp. Amanattyqtar árqashan aldyńǵy qatardan tabylady», dedi E.Qoshanov.
Ol Ekibastuzdaǵy tótenshe jaǵdaı kezinde volonterler men partııa belsendileri alǵashqy kúnnen bastap qala turǵyndaryna gýmanıtarlyq kómekti taratýǵa atsalysqanyn atap ótti. Turǵyndarǵa jylytqyshtar, jyly kórpeler jáne birinshi kezekte qajetti zattar tabystaldy. Ekibastuzdyqtarǵa kómek kórsetý jumysy jalǵasyp jatyr.
«Zardap shekken otbasylardyń baspanalarynda jóndeý jumystary bastalady. Osy kezde Ekibastuzdaǵy balalardy elimizdegi, sonyń ishinde Túrkistan oblysyndaǵy shıpajaılarǵa jiberýge de bolady. Partııa 1300-den astam oqýshynyń qysqy kanıkýl ýaqytynda eldegi demalys keshenderine barýyna jaǵdaı jasaıdy», dedi Erlan Qoshanov.
Ol sondaı-aq, partııalyqtar jastarmen jumys isteýge erekshe nazar aýdarýy tıis ekenin atap ótti. Jastar qataryna kiretin azamattardyń jasyn 35 jasqa deıin ulǵaıtýdy kózdeıtin jastar saıasaty týraly jańa zań jobasyn eskere otyryp, budan bylaı saılaýshylardyń 40%-dan astamy osy sanatqa jatatyn bolady.
Sonymen qatar aımaqtardaǵy amanattyqtar turǵyndardyń áleýmettik-ekonomıkalyq ál-aýqatyn jaqsartýǵa baǵyttalǵan partııalyq jobalardy iske asyrý jumysyn kúsheıtý qajet. Olardyń qatarynda «Jer amanaty», «Aýyl amanaty» jáne t.b. jobalar bar.
Konferensııa barysynda fılıaldyń jańa tóraǵasy saılandy. Osylaısha, konferensııa jumysyna qatysqan delegattar ashyq daýys berý arqyly Altynsary Úmbetálıevti «Amanat» partııasy Túrkistan oblystyq fılıalynyń jańa basshysy retinde saılady. Ol buǵan deıin Shymkent ýnıversıtetiniń «Ekonomıka» kafedrasynyń professory qyzmetin atqardy.
