Qazaqstandyq 7 boksshy álem chempıony atandy

Almatyda maýsymnyń 3-i kúni márege jetken bokstan áskerıler arasyndaǵy álemniń 55-shi chempıonatynda 7 qazaqstandyq chempıon atandy. Bizdiń quramanyń birde-bir múshesi júldesiz qalǵan joq. Olar 7 «altynnan» bólek, taǵy 1 kúmis jáne 2 qola medaldardy jeńip aldy. Fınaldyq aıqasty 49 kıloǵa deıingi Oljas Baınııazov pen reseılik tarlan Belık Galanov bastady. Bizdiń jas peri kórshi eldiń 2012, 2013 jyldarǵy chempıonynan qaımyqqan joq. Nátıjesinde tóreshilerdiń baǵamy boıynsha 3:0 esebimen jeńiske jetti. Al týrnırdi shırek fınaldan bastaǵan Oljas alǵashynda pákstandyq Asıf Razany 2-raýndta tehnıkalyq nokaýtpen jeńse, jartylaı fınalda Soltústik Koreıa ókili Ho Choı Taıdy 3:0 etip utqan bolatyn. Komandalas attasynyń jeńisti jolyn 52 kılodaǵy Oljas Sáttibaev ta sátti jalǵastyra bildi. Onyń bul jolǵy qarsylasy – marokkolyq Abdelalı Darra ońaı shaǵylatyn jańǵaq emes edi. Soǵan qaramastan, bizdiń baǵlannyń basymdyǵy eshkimniń kúmánin týǵyzǵan joq. Bir aıta ketetini, bul kúni ótpeı qalǵan fransýz Aleksıs Vastın men reseılik Aleksandr Bespýtın arasyndaǵy urystan basqa aıqastardyń bári joǵarydaǵy eseppen aıaqtaldy. Týrnırge shırek fınaldan at qosqan Oljas sol synaqta týnıstik Moýntasar Boýalıdi 1-raýndta-aq iske alǵysyz etip tastady. Onyń sońynan koreıalyq Kım Ja Kııýngti 3:0 etip tize búktirdi. Qazaqstan qorjynyna úshinshi altyn medaldy 56 kılolyq Qaırat Erálıev túsirdi. Osy kezge deıin grýzın Tornıke Totladzeni (3:0), KHDR boksshysy Chol Gýk Kvondy (3:0) jáne ıtalıan Alessıo Dı Savınony (2:1) joldan taıdyrǵan ol aqyrǵy shaıqasta aljırlik Fahem Hammachıden basym tústi. Munyń artynsha 60 kıloǵa deıingi salmaq dárejesindegi Bekman Soılybaevtyń da altynnan alqa taǵatyn kezegi keldi. Ol muny qytaılyq Ksıa Lıngjıeni talassyz jeńý arqyly jasady. Sóıtip, osynyń aldyndaǵy Birikken Arab Ámirliginiń atleti Hamad Alzaabı men shrılankalyq N.L. Padmakýmaranyń ekeýin birdeı 1-raýndta nokaýtqa jibergen eńbegi fınalda qaıtty. Budan keıin qazaqstandyq boksshylar 75 kıloǵa deıingi salmaqta aqtyq jekpe-jekke shyqty. Onda elimiz jalaýyn jelbiretken Babyrjan Momynov brazılııalyq tanymal boksshy Pedro Lımaǵa besinshi burysh izdetti. Al onyń osy kezge deıin jarys jolynan shyǵaryp tastaǵan qarsylastary arasynda Ámirlikten Mohamed Moýsabıh al-Shablı (nokaýt, 1-raýnd) men germanııalyq Abý-Lıbdeh Abdýlrahman (3:0) boldy. О́kinishke qaraı, osynyń sońyn ala rıngke kóterilgen 81 kılodaǵy Arman Ryspek belgili golland sportshysy Peter Mýllenbergten asa almady. Munyń esesine, osydan keıin sońǵy eki salmaqtaǵy sańlaǵymyz da tileýlesteri kóńilinen shyqty. Atap aıtqanda, 91 kılolyq Asqar Abdýllaev ıtalıan Fabıo Týrchıdi, al 91 kılodan joǵary salmaqtaǵy Qamshybek Qońqabaev brazılııalyq Rafael Lımany emin-erkin utty. Buǵan qosymsha aıta ketetin nárse, bulardyń birinshisi altyn júldege deıin úsh boksshyny orasa, ekinshisi eki básekelesin qapy qaldyrdy. Asqarǵa irikteý synaǵynda qytaılyq Vang Ksýanksýan qarsy shyǵa almaı qalsa, pákstandyq Nısar Han odan 2-raýndta nokaýt aldy. Jartylaı fınalda nemis Iohann Vıtt 0:3 bolyp jeńildi. О́z kezeginde Qamshybek sońǵy synǵa pákstandyq Ahmed Alı (3:0) men kýveıttik Salem al-Shammarıdi (3:0) utyp keldi. Chempıonatta Eldos Sarqulov (64 kg) pen Saǵadat Rahmanqulov (69 kg) qola júldeni qanaǵat tutty. Týrnırde sondaı-aq fransýz Aleksıs Vastın men gollandııalyq Peter Mýllenbergten bólek, fınalda týnıstik Shılı Alaany utqan mońǵol Battarsýkh Chınzorıg (64 kg) te chempıondyq ataqqa qol jetkizdi. Damır QOJAMQUL.