Táýelsizdik kúni qarsańynda Astanada stýdentterge arnalǵan 110 oryndyq jańa jataqhana ashyldy. Mundaı jobalar bıznes pen memleket yntymaqtastyǵynyń jaqsy úlgisi, sondaı-aq jastardyń bolashaǵyna úlken ınvestısııa bolyp sanalady. Menedjment, bıznes jáne bilim kolledjiniń stýdentteri úshin sport zaly men tegin ınterneti bar jańa jataqhana ashyldy. Ǵımarat oqý ornynyń aýmaǵynda ornalasqan. Nysan tıisti talaptarǵa tolyq sáıkes keledi. Korpýsta demalys bólmesi, as úı, sport zaly, dýsh bólmesi, medısınalyq pýnkt, kir jýýǵa jáne keptirýge arnalǵan turmystyq bólme bar. Qaýipsizdikti qamtamasyz etý úshin beınebaqylaý júıesi ornatylǵan. Jataqhananyń jalpy aýdany – 1 525 sharshy metr.
Kolledj dırektory Balqııa Pishenovanyń aıtýynsha ǵımarat memlekettik-jekemenshik áriptestik tetigin paıdalana otyryp salynǵan. Ol úshin 2020 jyly sol kezdegi Bilim jáne ǵylym mınıstrligi, sol sııaqty QR BǴM janyndaǵy «Qarjy ortalyǵy» AQ men kolledj arasynda úshjaqty shart jasalǵan.
«Jataqhana zamanaýı jıhazdarmen, kir jýǵysh jáne keptirgish zattarymen, as úıler elektr plıtalarymen, tońazytqyshtarmen jáne mıkrotolqyndy peshtermen jabdyqtalǵan. Sondaı-aq jataqhanada zamanaýı jýynatyn bólmeler men dýsh bólmeleri, saqtaý kameralary bar. Stýdentter demalys oryndarymen, medısınalyq kabınetpen qamtamasyz etilgen. Ǵımaratta qajetti jabdyqtar men dýsh kabınalary qarastyrylǵan sport zaly bar. Barlyq qabatta jáne kolledj aýmaǵynda beınebaqylaý ornatylǵan. Múgedektigi bar adamdar úshin tıisti jaǵdaı jasalǵan», dep tolyqtyrdy kolledj dırektory.
Stýdentter úıinde tórt, alty jáne segiz oryndy bólmeler bar. Ár qabatta tártipti komendanttar qadaǵalaıdy, táýlik boıy beınebaqylaý jumys isteıdi.
Elordalyq Menedjment, bıznes jáne bilim kolledjiniń stýdenti Nurgúl Isenova úshinshi kýrsta oqytýshy mamandyǵy boıynsha oqıdy. Jańa jataqhanaǵa ol bir aı buryn alǵashqylardyń biri bolyp qonystandy. Buryn kolledjge barý jarty saǵattan astam ýaqytty alsa, qazir nebári bes mınýtty alady deıdi.
Qazir kolledjde 1360 stýdent oqıdy, onyń 100-ge jýyǵy baspanaǵa muqtaj. Buryn stýdentter úshin kolledj jataqhanalardaǵy oryndardy jalǵa alǵan. Astana qalasy bilim basqarmasynyń basshysy Qasymhan Senǵazyev atap ótkendeı, atalǵan kolledj bilim berý qyzmetterin kórsetý men saýatty josparlaýdyń úlgisin kórsetedi.
«Kolledj aýmaǵynda ornalasqan jyly jataqhanada stýdentterdiń turýy jáne oqýy óte mańyzdy. Endi aıaldamalarda avtobýs kútip, ýaqyt joǵaltpaıdy. Ákimdik osyndaı jataqhanalardy salý kezinde kolledjderdi qoldaý sharalaryn josparlap otyr», dep atap ótti Astana qalasy bilim basqarmasynyń basshysy.
Qazir elordalyq kolledjderde 32 myńǵa jýyq adam oqıdy. Ákimdik kolledj stýdentteri úshin jataqhanalardaǵy oryn tapshylyǵyn kezeń-kezeńimen sheshý boıynsha is-sharalar josparyn ázirledi.
