ALǴA ADYMDAÝDYŃ AIQYN ALǴYShARTY
Oblys ortalyǵynda «Birlik-Edınstvo.kz» halyqaralyq jastar forýmy bolyp ótti. Bıyl tórtinshi ret uıymdastyrylǵan «Shekaralyq yntymaqtastyq jastar forýmyna» kórshiles Reseı oblystarynan, sondaı-aq, Ońtústik Koreıa, Polsha, Belarýsten kelgen jastar, etnostyq birlestik ókilderi jınaldy. Sharaǵa Qazaqstan halqy Assambleıasy Tóraǵasynyń orynbasary Eraly Toǵjanov, oblys ákimi Qanat Bozymbaev qatysty.
Bul forým shekaralyq óńirlerde turatyn eki eldiń jastary arasyndaǵy ózara túsinistikke yqpal eteri sózsiz. Jastar uıymdary baǵdarlamalaryn iske asyrý boıynsha is-sharalar bir-birlerimen tájirıbe almasýǵa múmkindik beretin turaqty únqatysý alańyna aınaldy. Al, jalpy, «Reseı óńirlerimen yntymaqtastyqty nyǵaıtý» barysyndaǵy «Qazaqstan halqy Assambleıasynyń» qyzmeti týraly QHA Tóraǵasynyń orynbasary Eraly Toǵjanov aıtyp berdi.
– Sizder, jastar, eldegi oń ózgeristiń qozǵaýshy kúshi bolasyzdar, – dedi forým qatysýshylaryna oblys ákimi Qanat Bozymbaev. – Jas jigitter men qyzdar bilim alýda memlekettiń barynsha qoldaýyna ıe. Myńdaǵan qazaqstandyq jastar «Bolashaq» prezıdenttik baǵdarlamasy boıynsha álemdegi úzdik oqý oryndarynda bilim aldy, búginde olar el ıgiligi úshin qyzmet etip jatyr. Jalpy, bizdiń oblysta memlekettik grant boıynsha 6 myń stýdent bilim alýda. Kóptegen úzdik stýdentter oblys ákiminiń shákirtaqysyn alady. Jergilikti jerde úkimettik emes jastar uıymdarymen tyǵyz jumys júrgiziledi. О́ńirdegi Assambleıa janynan 15 etnostyq jastar birlestikteri qurylǵan.
Mysaly, Aıman Ábdikárim Novosibirdegi «Otan» qazaq mádenıeti ortalyǵynyń ókili, onyń aıtýynsha, búginde ol jaqta 12 myńnan asa qazaq turady eken. Ultymyzdyń dástúrin saqtaımyz, ana tilimizde sóıleımiz, deıdi ol. Oblystyq Assambleıa janyndaǵy jastar birlestigi keńesiniń basqarýshysy Elına Paýlıdiń aıtýynsha, 2011 jyly oblys ortalyǵynda oblystyq etnomádenı birlestikterdiń jastar qurylymy elimizdegi Assambleıanyń jastar birlestigi úılestirý keńesiniń bastamasymen alǵashqy ret shekaralyq óńirlerdiń «Birlik – Edınstvo.kz» forýmynyń jobasyn ótkizdi. Forýmda jastar áleýmettik ınnovasııalyq bastamalarynyń kórme-jármeńkesi, «HHI ǵasyrdyń jastary: ýaqyt jáne ózi týraly dıalog» plenarlyq májilisi jáne zamanaýı jastar saıasatyn damytýdyń kókeıkesti máseleleri aıtyldy. Osydan eki jyl buryn eki memleket basshylarynyń qatysýymen Qazaqstan jáne Reseı óńiraralyq yntymaqtastyǵynyń IH forýmyn ótkizý qarsańynda «Birlik – Edınstvo.kz» shekaralas yntymaqtastyqtyń ekinshi jastar etnomádenı forýmy uıymdastyryldy. О́tken jyly shekaralas yntymaqtastyqtyń úshinshi halyqaralyq jastar forýmy oblystaǵy «Chernoıarskaıa jemchýjına» demalys aımaǵynda kıiz úıler etnoqalashyǵynda jalǵasty.
Mysaly, Ombyda oqyp júrgen pavlodarlyq Maksım Spotkaı qazaqstandyq jastarmen birlesip, stýdentter klýby, qazaq tilinde «Zamandas» gazetin shyǵarýda. Novosibirdegi Belarýs mádenı ortalyǵynyń jetekshisi Anastasııa Trýbenkovanyń aıtýynsha, olar qazaqstandyq jastarmen jıi kezdesýler ótkizedi. Qazaqstandyq Assambleıa bizder úshin úlgi, deıdi ol.
Sonymen qatar, Halyqaralyq jastar forýmy aıasynda «Dostyq» úıinde Qazaqstan halqy Assambleıasy Tóraǵasynyń orynbasary, hatshylyq meńgerýshisi Eraly Toǵjanov jergilikti etnomádenı birlestikterdiń múshelerimen kezdesti. Jıyn barysynda eki el arasyndaǵy mádenıetaralyq únqatysýdy damytý, jastar arasynda tájirıbe almasýǵa jol ashý, ózara kelisim men yntymaqtastyqty nyǵaıtý, Qazaqstan halqy Assambleıasynyń HHI sessııasynda aıtylǵan maqsat-mindetterdi oryndaý jaıy baıandaldy. Al «Birlik – Edınstvo.kz.» atty shekaralyq yntymaqtastyqtyń jastar etnomádenı forýmynyń da maqsaty – kórshiles óńirler arasynda jastardyń mádenı, rýhanı baılanysyn ornatý. Olar muny ózara áriptestik týrasyndaǵy suhbattar arqyly «Bolashaqty birge qalaımyz» atty avtomotokross, fleshmob syndy sharalar uıymdastyryp kórsetti.
Forým «Eki el jastary: bolashaqqa kózqaras», «San-alýandylyqtaǵy birlik» atty baǵdarlamalarmen jalǵasty. Sultanmahmut Toraıǵyrov atyndaǵy oblystyq kitaphanada qazaq tilinde sóıleıtin, án salatyn ózge ult ókilderiniń jastary kezdesýler ótkizdi. Jastar joǵary oqý oryndarynda qazaq tilindegi oqýlyqtardyń sanyn kóbeıtý kerek degen usynys aıtty. Forým sońynda kóńildi konsert, oıyn-saýyq baǵdarlamalary kórsetildi.
Farıda BYQAI,
«Egemen Qazaqstan».
Pavlodar oblysy.
Sýretti túsirgen
Valerıı BÝGAEV.
