Kómir basseıninen gaz alýdyń múmkindigi

Keshe «QazTransGaz» aksıonerlik qoǵamy men «LeMarCAInc» kompanııalar toby arasynda Qaraǵandy kómir basseıninen metan shyǵarý jáne barlaý jobalaryn júzege asyrý úshin birlesken kásiporyn qurý týraly quryltaıshylyq kelisimge qol qoıyldy. Osynyń aldynda «QazTransGaz» AQ Elbasy N.Nazar­baevtyń  2010 jylǵy kómir ken oryndarynan metan shyǵarý jáne ony kádege jaratýdy uıymdastyrý týraly tapsyrmasyna oraı, sondaı-aq, elimizdiń sol­tústik jáne ortalyq aımaqtaryn gazdan­dyrýǵa balama nusqalardy zerdeleý maqsatynda Qaraǵandy kómir basseınindegi kómir qyrtysynan metan alýdyń múmkindigin qarastyrǵan bolatyn. Bul kómirsýtegi shıkizatyn shyǵarý salasyndaǵy ınnovasııalyq baǵyttardyń biri ári elimizdegi otyn-energetıka bazasynyń balama jıyntyǵyn qarastyrýǵa  boljamdy qory múmkindik beretin dástúrli emes qýat kózi bolyp esepteledi. Al, «LeMarCAInc» kompanııasynyń jónine keler bolsaq, AQSh aýmaǵynda jańa tehnologııanyń múmkindikteriniń arqasynda jylyna 36 mlrd. m3 gaz shyǵarylatyny belgili. Sol eldiń  kómir qyrtysyn burǵylaýdaǵy aldyńǵy qatarly jumys tájirıbesin  úırenip ári ony qoldanysqa engizý barysynda  joǵaryda atalǵan qujatqa qol qoımaı turǵanda birqatar ozyq  amerıkalyq kompanııalar tobymen kelissózder júrgizildi. Atap aıtqanda, kómir qyrtysynan metan óńdeıtin «CoreLaboratories» ǵylymı ortalyǵymen,  óńdeý jáne burǵylaý tehnologııasyn jasaýmen shuǵyldanatyn «ScientifficDrillin» kompanııasymen, ken oryndaryn keshendi ıgeretin  «LeMarCAInc.» ınjınırıngtik kompanııasymen birge jumys atqarý úshin kelissózge qol jetkizildi. «QazTransGaz» AQ pen «LeMarCAInc» kompanııalar tobynyń arasynda quryltaıshylyq kelisimine qol qoıý josparlanǵanda taraptar zańdy tulǵa qurýǵa jáne Qaraǵandy kómir basseıninen metan shyǵarý jáne barlaýdy júzege asyratyn ınvestısııalyq jobalar boıynsha birge atqaratyn isteriniń  retin anyqtaýǵa mindettelgen bolatyn. Endi mine, josparlanǵan sharýalardy ári qaraı birge atqaryp, metan alýǵa múmkindik týyp otyr. Bul týraly «QazTransGaz» AQ bas dırektory Serik Sultanǵalı bylaı deıdi: «Osy qujattyń arqasynda elimizdiń soltústik aımaqtaryn gazben qamtamasyz etýge start berildi. Bul sharýalardyń barlyǵy Elbasy N.Nazarbaevtyń tapsyrmasy boıynsha jasalýda». Atap óteıik, birlesken qujatqa «QazTransGaz»AQ-tyń bas dırektory Serik Sultanǵalı men «LeMarCA Inc» prezıdenti Leon Popık qol qoıdy.   «Egemen-aqparat».