Bir mektepten – 6 altyn medal!

Qaraǵandydaǵy bilimniń qara shańyraǵy atan­ǵan 87 jyldyq tarıhy bar Jambyl atyn­daǵy №7 mamandandyrylǵan mektep-ınternatynyń ­aty ańyzǵa aınalǵan. Olaı bolatyn sebepteri kóp. Qaraǵandy kómir basseınimen túıdeı qurdas. Osy mektepte talaı ataqty adamdar oqyǵan. Sonyń biri jáne biregeıi – Keńes Odaǵynyń Batyry, ush­qysh Núrken Ábdirov. Sońǵy jyldary mektep-ınternat óz oqýshylary men tárbıelenýshileriniń úzdik oqýymen, úlgili tártibimen jıi-jıi kózge túsip júr. Kúni keshe ótken UBT qorytyndysy boıynsha 6 oqýshy altyn medaldi jeńip alsa, taǵy bir altaýy qyzyl attes­tatqa ıe boldy. Osy 12 oqýshynyń jeteýi birinshi synyptan osynda oqyp kele jatqan shákirtter. Keıingi jyldary bul oqý orny mártebesin ózgertýine baılanysty kóbine aýyldan kelgen qabiletti oqýshylardy 5-shi synyptan bas­tap qabyldaıdy. Besinshi synyptan bastap shákirtterdiń jan-jaqty durys bilim alýy uıymdastyrylady. Mektep bıyl da sol údeden shyqty. 11-shi synyp oqýshylary ótken jylǵy tamyz aıynan bastap daıyndaldy. Sapaly daıyndyqtyń, ádil baǵalaýdyń jarqyn dáleli – 12 birdeı oqý ozaty. Bıylǵy mektep túlekteriniń ortasha bally – 106. Ardager ustazdar N.Jumaqasova, Q.Smaǵulova, B.Taýyqbaeva, T.Maıkopova, Ú.Berekelova, A.Smaıl, K.Tileýbaeva, M.Tabynbekova, G.Bekbolatova, N.Ámirhan UBT pánderi boıynsha uıymshyldyqpen bilim básekesine jattyqtyrý, ıakı daıyndyq jumystaryn júrgizdi. Mektep dırektory Q.Ilimbaevtyń ózi matematıka páninen kánigi bapker bolyp aldy. Mektep psıhologtary Q.Kúzeýova, B.Bekseıitova jyl boıy shákirtterdiń daıyndyq jáne demalys túzimderin, kóńil kúılerin baqylap, erik-jigerlerin ushtap, nysanaly maqsatqa baǵyttap otyrdy. Aıqyn NESIPBAI, «Egemen Qazaqstan».     Qaraǵandy.