Balanyń taǵdyry kimge oıynshyq?!

Byltyrdan beri túlekter Ulttyq biryńǵaı test tapsyratyn kezde mem­­le­kettik komıssııanyń múshesimiz. Talaı qyzyqtyń kýásimiz-dúr. Jylaǵan-syq­taǵan, qýanǵan-shattanǵan sátterdi kór­dik. Jas balany emtıhanǵa kirgizer aldyn­da sheshindirip teksergendi de «tama­shaladyq». Munyń bári búginde qalypty jaǵdaı. Oqýshylardyń ózderinen de bar. Qolyndaǵy telefonyna emes, basyndaǵy bilimine senip kirse, esh bále de joq. Biraq, olaı etetin túlek kem. Túrli tehnıkany arqalap kirýge daıyn. Onysy kireberiste qalady. Aýdıtorııaǵa ótkenniń ózinde baqylaýshy men kameranyń kózinen tys qalmaıdy. Paıdalanyp úlgermeıdi. Sony bile tura, ishke telefon men rasııa kirgizýge qumar. Biraq, aıtpaǵymyz bul emes. Astanadan Qyzylordaǵa keletin baqylaýshylarǵa qatań tapsyrma berile­tinin ishimiz sezetin edi. Qabaqtary­nan qar jaýǵan baqylaýshylar balanyń záre-qutyn qashyryp, onsyz da jylaýdyń sál-aq aldynda turǵan túlekti shoshytyp tynatyn. Bıyl da sondaı boldy. UBT-nyń úshinshi kúninde oqýshylardy aýdıtorııaǵa kirgizý úshin tórt saǵat tekserý boldy. Tańǵy saǵat 7:30-da kelgen balalardyń aldy túski 11:30 kezinde test tapsyrý zalyna kirdi. Munyń bári balanyń psıhologııasyna keri áser etetini belgili. Ony qoıshy, testiń jaýaptary belgili bolyp jatqan. Jalpy, qorytyndy 73,1 balldy qurady degen aqparat aldyq. Osy sátte Astanadan kelgen baqylaýshylardyń basshysy qýanǵanynan «ýralap» qoıa berdi. Jan-jaqqa telefon shalyp, qýanyshymen bólisip jatyr. Aqyryn ǵana sebebin suradyq. Sóıtsek, álgi apaı: «Eger bıylǵy kórsetkish byltyrǵydan edáýir ósip ketse, meniń basym keter edi. Bıylǵy byltyrǵymen birdeı» dep kúlip qarap tur. Buǵan ne deısiń?! Jaraıdy, test kezinde paıdalanýǵa bolmaıtyn quraldardy sypyryp alsyn. Balalardy qatań teksersin. Olar bilimderine ǵana júginsin. Onysyna esh qarsylyq joq. Al endi «byltyrǵy kórsetkishten aspaýy kerek» degen ne tapsyrma? Sonda Qyzylordanyń balalarynyń bári bilimsiz be? О́tken jylǵy túlekterdiń bilim deńgeıi tómen bolǵanmen, bıylǵysy bilimdi shyǵar. Sonda ne bolmaq? Nege kópe-kórineý balalarǵa qııanat jasalady? Mundaı tapsyrmany kim berdi? Osyndaı suraq kóp. Biraq jaýaby joq. «Ala qoıdy bóle qyrqýǵa bolmaıdy». Emtıhan – balanyń taǵdyry. Osy áreketteri arqyly Astanada otyrǵan aq jaǵaly aǵaıyndar jastardyń tamyryna balta shabatynyn bile me? Onsyz da ázilkesh Tursynbek Qabatov aıtpaqshy, UBT-yńyz «ulttyq bir kúndik tóńkeris» sıpatynda ótedi. Daýryǵyp, dúrligip bir basylamyz. Máseleni qıyndata bergennen ne tabamyz, aıtyńyzdarshy?! Qaıbir jylǵy Jańaqorǵan aýdanynda oryn alǵan jaǵdaı búkil oblysqa keri áserin tıgizip turǵanyn shamalaımyz. Degenmen, sottalǵan adamnyń ózi aqtalyp jatady ǵoı. Bir kezdegi qatelik ómir boıy aımaqtyń mańdaıyna shirkeý bolyp tura bere me?! Osyny oıladyńyzdar ma? Erjan BAITILES, «Egemen Qazaqstan». QYZYLORDA.