Amangeldi aǵamyzdy qalyń jurtshylyq Májilistiń depýtaty retinde jaqsy tanıtyn. Júzdiń atyn bilse de, birdi, biregeıdi birden tanıtyn halyq kóptiń janashyry Ábekeńniń qazaqqa degen júreginiń aqtyǵyna, shynshyldyǵyna, týrashyldyǵyna senetin. Keı-keıde kópshilikten «joǵary jaqta, depýtattyq korpýsta kimdi bilesiz?» dep surap qalsańyz, eldiń aýzyna eń aldymen A.Aıtalynyń aty-jóni túsetinine talaı kýámiz. Shynaıy halyq senimi degen, shynynda da, osy shyǵar.
Professor A.Aıtalynyń ulaǵatty ustazdyǵy týraly aldyn kórgen shákirtteri talaı-talaı syr da, sher de sherterine kúmán joq. Marqum Muhtar Aryn men Ábekeń ekeýi kezek-kezek Aqtóbe ýnıversıtetiniń minberine kóterilgende, mundaı baqytty sátterdi birneshe ret bastan keship edik. О́zimiz de oblys ortalyǵynda emes, aıǵa azýyn bilegen ataqty álemdik oqý ordalarynyń birinde dáris tyńdaǵandaı bolatynbyz. Urpaq qamy dese uıqysy qashatyn Ábekeń sońǵy kezde stýdentterge ilim-bilimdi jańasha jetkizýdiń tyń formalaryn izdep, ulttyń ıntellektýaldyq áleýetin kóterýdiń joldaryn oılastyryp, tyń tujyrymdaryn aıtyp taýysa almaýshy edi. Osy joldaǵy eren jospary da erekshe kóp-tin. Sonyń bastamasy retinde shákirtter ómirinen alyp, «Din týraly 50 suraq-jaýabyn» bizge jazyp berip edi. Bir kem dúnıe ǵoı, ókinishke qaraı, joba-josparlary kemel zııalymen birge ketip barady...
Seńgirge shyqqan mereıtoıynda segiz tomyńyzdy shyǵaraıyq degen ini-dosyna: «Jazǵan-syzǵanym, aıtqan-qaıtqanym úsh kitapqa jetse, onan asqan abyroı bar ma?» dep shyn kóńilimen, jymıyp qoıyp, pátýalasqan-dy. Osylaısha, qazaqqa kerek, jańa Qazaqstanǵa kerek «Ulttaný» men «Dintaný» hám «Diltaný» jasaqtalyp edi. Bir shúkirligi – «Ulttanýynyń» súıinshi danasyn kózben kórip, kóńili toǵaıyp edi.
Baqul bol, qaıran Ábeke! Ult rýhanııatynyń úsh ustynyn kóterip turǵan eńbekterińizben aýyzdanǵan urpaǵyńyz rýhyńyzdy nalytpaı, shyraǵyńyzdy jaǵatynyna senińiz.
Ǵarıfolla ÁNES
