Búgingi tańda elimizde balabaqsha jetispeýshiligi erekshe baıqalady. Bul halyq sanynyń kúrt ósýimen de tyǵyz baılanysty bolar. Árıne, biz oǵan tek qýanamyz, alaıda, balalarymyzdy balabaqshamen tolyq qamtamasyz ete almaý máselesi kezek kúttirmeıtin másele ekendigi anyq. Osy turǵydan kelgende, memleketimizdiń jekemenshik balabaqshalardyń uıym-dastyrylýyna múmkindik berýi asa mańyzdy qadam bolyp tabylady. О́skeleń urpaqtyń sapaly tárbıe, ozyq bilim alýy úshin memleket tarapynan bar jaǵdaıdyń jasalyp jatqandyǵy barshamyzǵa belgili. Onyń bir aıǵaǵy retinde «Balapan» baǵdarlamasynyń júzege asýyn atap ótýge bolady. Elbasynyń «Bala tárbıeleý – bolashaqqa eń úlken ınvestısııa» degen sóziniń astarynda qanshalyqty tereń mán jatyr. Osynaý saýapty iske atsalysý úshin biz de otbasymyzben jekemenshik balabaqsha ashýdy jón sanadyq. Sóıtip, 2014 jyldyń 5 tamyzynda «Dýman» shaǵyn aýdanynan «Nur-Aıbek» atty balabaqsha ashtyq. Balabaqsha eki qabatty ǵımaratta ornalasqan. Jas ereksheligine qaraı bólingen úsh top balalary úshin arnaıy jabdyqtalǵan bólmeler men oıyn alańdary, medısınalyq kabınet bar. Bizdiń búldirshinder memlekettik «Balbóbek» baǵdarlamasy boıynsha bilim alady, til úırenedi, án men bı úıirmelerine qatysady. Sanıtarlyq erejeler men normalarǵa sáıkes bes ýaqyt tamaqtanady.
Balabaqshamyzdyń basty qaǵıda-sy – «Bar jaqsylyq balalarǵa». Ujymymyzdyń árbir múshesi osy qaǵıdany basshylyqqa ala otyryp, jumys isteıdi. Halqymyz qashan da bala tárbıesine beıjaı qarama-ǵan ǵoı. «Tárbıe basy – tal besik» demekshi, balanyń boıyna sábı kúninen adamgershilik pen izgiliktiń dánin seýip, onyń rýhanı baı adam bolyp ósýine erekshe kóńil bólgen. Osyndaı keremet halyqtyq dástúr búgingi balabaqshalarda óz jalǵasyn tabýy tıis dep oılaımyn. Dene bitimi durys qalyptasqan, aqyl-oıy jetilgen, oıly, sanaly azamattyń ósip shyǵýyna balabaqsha áser etedi. Bizdiń búldirshinderimiz balabaqshada tulǵa retinde damıdy, áleýmettik ortaǵa beıimdeledi. Týǵan jerin, tili men dilin súıýge úırenedi. Sondyqtan da tárbıeshiniń kóteretin júgi óte aýyr. Búgingi balabaqsha pedagogtarynan biliktilik, izdenimpazdyq pen iskerlik sııaqty asa mańyzdy qasıetter talap etiledi. Osynaý talaptyń údesinen shyǵa bilý úshin eren eńbek qajet.
«Nur-Aıbek» balabaqshasynyń árbir búldirshini – jeke tulǵa. Olardyń árqaısysynyń ózindik orny bar. Balabaqsha qabyrǵasynda balanyń qamqorlyqqa bólenip, erekshe jylylyqty sezinýi – birinshi shart. О́ıtkeni, bala ózin úıde júrgendeı erkin sezinýi kerek. Onyń mańdaıynan ıiskep, basynan sıpap qoıýdyń qanshalyqty mańyzdy ekendigine men osy balabaqshada jumys isteı júrip kóz jetkizdim. Adal, úlken júrekti asyl azamattar meıirimdilik shýaǵyna bólenip ósken balalardan qalyptasady. Búldirshinderimizdiń óz zamanynyń baqytty urpaǵy bolyp ósýi úshin, jańasha oımen, jańasha kózqaraspen qalyptasýy úshin balabaqsha ujymy aıanbaı eńbek etedi degim keledi.
Baný OMAROVA,
«Nur-Aıbek» balabaqshasynyń meńgerýshisi, fılologııa ǵylymdarynyń kandıdaty, dosent.
ALMATY.
