Aýyr kúnderde alǵy shepte qyzmet kórsetkenderdiń biri – medısına qyzmetkerleri, dárigerler. Bizdiń №7 aýrýhanamyzdyń qabyldaý bólimshesine túskenderdiń bári aýyr jaǵdaıda edi. Bul oqıǵa tóbemizden sý quıyp jibergendeı, jan túrshigerlik jaǵdaıǵa aınalǵan bolatyn.
Aýrýhana belgisiz adamdardyń qorshaýynda qaldy. Árıne, qorqynysh, úreı boldy. Aýrýhanadaǵy áriptesterimiz ben emdelýshilerdiń taǵdyryna alańdadyq. Sanamyzdyń túkpirinde, júregimizdiń tórinde oryn alǵan qorqynysh ómirimizden aıyrylyp qalardaı úreı qaldyrdy. Alaıda osynaý qıyn-qystaý kezeńde bizdi qorshap alǵan sodyrlardyń úrkitkenine, áınekter men qural jabdyqtardy syndyrǵanyna qaramaı, «bir jaǵadan bas, bir jeńnen qol shyǵaryp» óz mindetimizdi oryndadyq.
Túrli jaraqattarmen túsken naýqastardyń kim ekenine, qandaı salada jumys isteıtinine qaramastan pasıent retinde qabyldadyq. Ol adamdardyń bári óte aýyr jaǵdaıda keldi, óıtkeni kópshiligine oq tıgen, ashyq jaralary boldy. Dárigerler men naýqastardyń ómiri qyl ústinde turdy. On besten astam ota jasadyq. Eki táýlik boıy kóz ilmeı, kúsheıtilgen rejimde qyzmet kórsettik. Árıne, osyndaı jaǵdaıda anestezıolog, hırýrg dárigerlerdiń adamı faktorǵa jol berip, shatasyp ketý qaýpinen seskendik.
О́kinishke qaraı, qanshama azamatymyz qaza tapty. Halqymyz «Tas túsken jerine aýyr» deıdi. «Osyndaı kúrdeli shaqta qalaı jumys istep, qyzmet kórsetýge bolady?» degen suraq týyndaıdy. Aq halatty abzal jandar qıyndyqtarǵa qaramastan jumys istep, batyr minez kórsetip, antqa adaldyq tanytty. Áriptesterime kóp rahmet aıtqym keledi. Qańtardyń yzǵarly kúnderi biz úshin eń aýyr kezeń boldy. Osylaı bir ujym bolyp búkil jumysty qoldan kelgenshe atqaryp shyqtyq.
Biz de qaıǵyly, aýyr synaqqa toly kúnderdiń qaıtalanbaýyn tileımiz. Bul – barshanyń kókeıindegi ortaq tilek. Qazir bárine ádil baǵa berip, sol basbuzarlardyń bárin bandıt dep óz atymen ataýymyz kerek. О́ıtkeni osyndaı ońbaǵandyq keleshekte qaıtalanbaýǵa tıis. Osyǵan búkil qoǵam bolyp jumys isteýimiz kerek. Buzaqylardan batyr jasaýdyń qajeti joq.
Esenaı ESPENBETOV,
Almaty qalasy №7 aýrýhanasy reanımasııa bólimshesiniń meńgerýshisi
