Kúni keshe ǵana ǵasyr toıyn toılaǵan Zaısan aýdandyq aýrýhanasynda dárigerler kúndelikti óz jumystaryn atqaryp, naýqastarǵa em-domdaryn kórsetip jatty. Kenet Zaısan aýdanynan 60 shaqyrymdaı taýly aımaqtaǵy Shilikti aýylyna qarasty «Doıka» qystaǵyna barǵan 1984 jylǵy áıel adamnyń tolǵaǵy qysyp, jolǵa shyqqany habarlandy.
4 qańtar. Zaısanda aqtútek boran turyp, aýyl arasyn qoıyp, qala ishinde qatynaý muń bolǵan edi. Tolǵaǵy qysqan anany estı sala bar jaýapkershilikti moınyna artyp, aýdandyq aýrýhananyń jedel járdem kóligimen gınekolog jas dáriger Ińkár Muhametqalıqyzy jáne balalar meıirbıkesi Úmitgúldi Orazahımova saǵat 10.00 shamasynda jolǵa shyqty. Aýdan ortalyǵynan shyǵa beris jol ashyq bolǵanymen, alda qaýipti jol aımaǵy bar. Shilikti taý jolynda boran údeı túsip, keıbir jol bólikterin qar alyp qalyp jatty. Jedel járdem júrgizýshisi Symbat Byqaevtyń sheberligi men batyldyǵynyń arqasynda qasat qarlardy buzyp otyryp jol júrdi. Aqtútek boranda aq jeleńimen alyp ushqan dáriger men medbıke Shilikti aýylyna taqaı bergende, qarsy baǵytta shyqqan kólikpen kezdesedi. Bul aýyl ákiminiń qyzmettik kóligi edi.
Sonymen saǵat 12.25-te jatqyzyp ákeletin jaǵdaı bolmaǵan «Nıva» kóliginen júkti áıeldi qalaı jedel járdem kóligine jatqyzdy, solaı bosanýǵa yńǵaı tanytady.
– Aldymen dereý tekserdim. Balanyń moınyna kindiginiń úsh ret oralyp qalǵanyn jáne áni-mine dúnıege keleıin dep turǵanyn baıqadym. Mundaı jaǵdaıda júkti áıelge aýrýhanada kesar tiligi jasalynady. Biraq oǵan ýaqyt joq. Kesar tiligin kútsek, balanyń da, ananyń da ómirine qaýipti. Táýekelge bel baılaýǵa týra keldi. Kóp oılanýǵa da, qorqýǵa da ýaqyt joq. Birden meıirbıkemen bosandyryp alýymyz kerek degen sheshim qabyldadyq, – deıdi jas dáriger Ińkár Muhametqalıqyzy.
Qabyldanǵan sheshimnen keıin dáriger men meıirbıke birden betimen kelip turǵan balanyń jatysyn aýystyrady. Sodan keıin moınyna oralǵan kindikti sheshedi. Sol sátte, saǵat 12.35-te kishkentaı ǵana tirshilik ıesi shyr ete tústi. Dúnıege salmaǵy 2 kılo 300 gramm, boıy 54 santımetr balpanaqtaı qyz bala keldi.
Mine, shyr etken úndi estip, ana men balany aman alyp qalǵan soń, barlyq medısınalyq qajettilikterdi jasap, keri jol júrýge asyǵady. Boran ekpini basylar emes. Jolda qalyp qoıamyz ba degen úreı aıadaı ǵana jedel járdem kóliginiń ishinde otyrǵan estııar jandardyń boılaryn bılep aldy. Dárigerdiń mundaı sátte taǵy bir mindeti – ananyń kóńilin aýlap, psıhologııalyq qoldaý kórsetý qajettiligin de umytpaǵan. Sóıtip, tájirıbeli júrgizýshi aýrýhanaǵa da jetkizgen.
Zaısan aýdandyq aýrýhanasynda jalǵyz ınternatýra, rezıdentýrany tolyǵymen bitirgen taptyrmas maman, 2 dárejeli dáriger akýsher-gınekolog, hırýrg-gınekolog, sonology Ińkár Muhametqalıqyzynyń júkti áıeldi jolda bosandyryp alýy birinshi jaǵdaı emes. Ol buryn stýdenttik shaǵynda osyndaı jaǵdaıǵa tap bolǵan. 2017 jyly stýdent Ińkár Astanadan Semeı baǵytynda poıyzda kele jatady. Shamamen Semeı qalasyna 20-30 km qalǵanda vagonda áıeldiń tolǵaǵy qysyp, jatqanyn estıdi. Áp-sátte vagonnyń ishinde ý-shý bolyp, jolaýshylar dáriger izdep, vagondar ishin aralap qoıa beredi. Poıyzda dáriger mamany bolmaǵandyqtan, Ińkárdiń tolǵatyp jatqan áıeldiń qasyna barýyna týra keldi. Qolynda eshqandaı medısınalyq quraly joq. Ana men balanyń ómirine arasha bolýy kerek ekenin túsingen bolashaq dáriger birden bosandyryp alýym kerek dep sheshti. Áıteýir jol ústindegi bul bosandyrý da sátti aıaqtalyp, aman-esen ana men sábıdi kútip turǵan jedel járdem dárigerlerine tapsyrady.
– Sol sáttegi qýanyshym – meniń naǵyz dáriger bolatynyma senimim men maqtanysh sezimimdi aıtyp jetkizý múmkin emes, – deıdi Ińkár Muhametqalıeva.
Osyndaı jaǵdaıǵa baılanysty ana men balanyń ómirine qaýip tónip turǵanda táýekelge baryp, aman alyp qalǵan dáriger men meıirbıkege, jedel járdem kóliginiń júrgizýshisine qandaı qurmet kórsetilse de artyq etpes. Aldaǵy ýaqytta Densaýlyq saqtaý mınıstrligi nemese oblystyq densaýlyq saqtaý basqarmasy shalǵaıdaǵy shekaraly Zaısan aýdanyndaǵy áriptesteriniń iskerligi men sheberligin, batyldyǵy men batyrlyǵyn baǵalap, laıyqty qurmet tanytar degen senimdemiz!
Erkebulan ZAǴYPAROV
Shyǵys Qazaqstan oblysy,
Zaısan aýdany
